2017年10月10日 星期二

「韓式美瞳線」我紋咗喇~

韓式美瞳線 / 4D 或 6D 飄眉霧眉,有幾 hit 唔使我多講啦,好多人都整咗~

其實我早 4-5 個月前都已經紋咗美瞳線喇~ 🎉

而家每朝瞓醒就已經有條自然眼線,精精神神好鬼爽,慳返唔少化妝時間,就算唔化妝個樣都唔會太殘嗰吓最正~

咩係「美瞳線」?

其實即係紋眼線,只不過係紋得勁貼睫毛根位、好自然嗰種,而色料就採用 "半永久天然植物萃取色乳",過幾年會漸漸變淺色,唔會好似舊式紋眼線咁假,耐咗亦唔會變藍綠色咁肉酸,可理解作新式紋眼線技術。

而家係化個底妝都出得街,雙眼精精神神 

睫毛根位濃濃黑黑咁,唔經唔覺放大咗雙眼,好自然 😍 


點解紋完隔咁耐先 share?

當然係為咗俾個真實效果大家睇啦~ ✌🏻

其實初初紋完頭 1-2 個月時,人人效果都差不多,冇乜值得咁快介紹。但如果要講到 "持唔持久 / 顏色有冇化開" 呢點,就要時間去見証,等多幾個月先知紋得好唔好了!

而家我條眼線顏色仍然 keep 得好好~


由於我屬內雙眼皮,唔想紋得太幼冇嘢睇,刻意叫師傅紋粗啲 →

粗幼係個人喜好,最緊要係紋之前同師傅好好溝通,講清楚自己想要嘅效果~


一般紋美瞳線都會於幾個月內 "包補色",係點解?

其實係因為新式色料係天然植物萃取成份,能被皮膚安全吸收,而落位亦會於皮膚較淺層,加上每人吸收 / 退色的速度亦唔同,所以會有補色的必要。

而補色都係免費包埋的 = 俾 1 次錢可做 2 次 = 一次未滿意仲有下次可以修補。

由於係半永久,一般整完可 keep 3-4 年左右,快慢人人唔同,中途會隨時日慢慢變淡色。不過如果師傅手勢未到家、又或者用嘅色料唔夠好,就會好快於 1 年內退到冇晒色,所以都係要小心揀。


要返工又要湊仔點會唔忙? 所以話呢條「美瞳線」係我今年送俾自己最好嘅禮物! 😍


方便到近幾個月拍 video 妝都見得人 →

效果亦好 natural,唔講都唔知紋咗,但望上去就精神好多~

慳返好多化妝時間之餘,又唔使怕佢會溶妝~


想化眼妝嗰陣,亦只需要 :

1. 响眼尾畫長一筆
2. 夾一夾睫毛

前面完全唔使畫,eyeshadow 都唔使掃,成件事就已經好完滿,爽到形容唔到~ 🤗


就連去 event 我都懶到只係做上述 2 步,都好夠效果了 


要化濃妝時,亦只係加掃少少 eyeshadow 就成事 

唔使 1 分鐘就化完眼妝~


爽係爽爆,但一街都係紋繍點揀好?

唔係嚇大家,但真係要小心揀!

我有好多化妝學生同朋友都紋咗美瞳線 / 飄咗眉,實在聽過又見過太多唔愉快嘅例子.....

例如用假相 / 去到唔係嗰個師傅整 / 整完唔係嗰回事之類,甚至有紋到要入院睇醫生嘅例子! 真係輕易上個網一 search 就揾到!

皆因...... 人人都覺得做紋繍好賺嘛,個個都衝住去學,學完就即刻租舖接客賺 $,最多劈價收平啲咁樣.......


我紋美瞳線前的 before 圖 →


要留意紋繍唔同化妝,化妝如果功夫未到家,至少都可以卸妝,但紋繡唔得喎! 

紋繍要做得好,係需要好長時間磨練鑽研,比做化妝師責任大好多,唔係話學識就可以接客咁簡單,紋一紋就留响塊面幾年,紋衰咗點算?

所以千萬唔好貪平,避免做咗實習工具自己都唔知~


剛紋完後的 after 圖,會有少少紅腫,就似喊完一晚咁 →


而今次紋美瞳線,我係揀咗由我老師幫我整,自費的~

上年我都已經攞咗韓國紋繍師証書了,只係唔會接客。

我對化妝咁有要求,紋繍就更加啦,絕對唔會用客人做白老鼠,打算深造多 1 年先考慮,所以今次係由我讀紋繍証書時嘅老師操筆~


紅腫情況隔咗 45 mins 後,開始漸漸退減 →


老師有 10 紋繍教學經驗,亦有 12 個國際資格及獎項,精通港、台、 日、韓、歐美紋繍技術,加上我又跟佢學過,信得過~

用嘅當然係貴價外國高級天然植物色料,唔會用平價貨 / 大陸貨,色澤效果可維持 3-5 年,唔會後期變藍變紅,而且冇致害水銀成份,唔會有色素永久殘留於皮膚內。

針具唔使講,一定係用真空無菌包裝即棄式,唔會重複使用,安全衛生呢點好緊要!



紋完後第 2 日的紅腫情況 →


紋完後第 3 日 →

仲有少少紅腫,但我已經開始化妝,只不過就剩係化咗底妝 + 畫長咗眼尾,冇畫前面。


又痛唔痛嘅呢?

話唔痛係呃你嘅,唔會真係完全無痛,點都會有感覺,但屬於忍得到嘅程度。(至於 sell 自己話無痛嗰啲,其實係因為點到即止紋得勁表層,好快會退色唔 long last)

隨後一星期亦會有酸酸痺痺感覺,可以想像喊完一晚後第二朝起身嗰種 feel。而紅腫情況約一星期會逐漸退減,我係去到第 5 日已經收晒腫唔紅。期間係會結焦的,只係微細到唔會 feel 到,甩完焦都唔會察覺嗰隻。

紋嘅過程其實只係幾分鐘 

只不過因為過程中要敷色,敷完又要再上色,紋完又要休一休息,所以攪吓攪吓都要預一個鐘,佔大部份時間係做準備功夫同休息。


當日我係同閨密一齊紋,呢個係佢剛整完飄眉 + 眼線的一刻 →

眼線效果同我差不多,而飄眉剛剛整完則會深色幾日,等結焦甩完焦後,就會變得更自然同淡色了。(閏密話飄眉係完全唔痛冇感覺)


價錢方面呢?

其實揾導師整都唔係好貴,但當然唔可以同新手或用內地貨的價錢相提並論,都係正常價 $2000 - $3000 左右,包補色。

至於呢個價錢係預約老師去我公司整的 freelance 價,平常如 through 美容學校揾佢整,每項會貴多幾百。


韓式隱形美瞳眼線 $2400
選用頂級色乳配合獨家技術,填補睫毛間空隙,使睫毛看起來更濃密漆黑,雙眼更顯神采,大大節省化妝時間。包半年內補色一次

韓式輕淡無框粉霧眉 $2900
只有底色,冇線條感,仿如掃上眉粉後的自然輕淡效果,適合有眉毛但稀疏 / 眉色淺淡的人。包半年內補色一次

4D 仿真飄眉 $3000
只有線條感,冇底色,適合眉型本身唔太幼又夠色、只係想加幾筆的人,例如崩咗少少 / 想加粗一行仔嗰啲。如果整大範圍的話就會冇咁靚

6D 韓式仿真飄眉 $3300
揉合飄眉仿真眉毛線條感 + 粉霧輕氧眉技術,效果立體自然,適合眉毛稀少 / 沒有眉毛 / 斷眉的人 (如果要整嘅範圍比較大,咁揀 6D 係最好嘅選擇,效果會像真好多。) 包半年內補色一次


同場加映: 「韓式飄眉 vs. 霧眉」係點揀?(點擊連結)




有興趣約老師去我公司整的話,歡迎透過我公司 Makeup Secret Facebook 專頁 查詢及預約。 https://www.facebook.com/makeupsecret.hk/ 

In case 如果大家未知道,我公司係响尖沙咀~ 😁



5 則留言:

  1. Hi Isa,如果紋左甩左唔再紋會唔會好核突?係咪要一直紋落去?我平時戴眼鏡,唔化妝,因為有好多色斑,同眼乾,所以少戴隱形眼鏡,如果甘紋左會唔會好怪?

    回覆刪除
    回覆
    1. 新式顏料過幾年退色後只會變自然淡黑 / 或完全被皮膚吸收冇咗,唔會變色的,到時再紋又得、唔紋又得,並冇影響,唔使話紋過就要一直紋落去~ 而就算戴眼鏡唔化妝都係可以紋,本身效果係好 natural 的,粗幼亦可以自己揀 (我紋的係揀了粗身),唔會話紋咗係人都睇得出好礙眼嗰種,但望落又會精神好多~

      刪除
    2. 我自己都有做霧眉同整內眼線, 我覺得其實都有少少不歸路。因為學Isa話齋會退色變淡, 黑色眼線退了雖然不會變灰但淡黑其實都有D假, 唯有出街自己補色, 然後大概一年補一次; 霧眉反而好少少, 雖然D色甩得最快, 不過都幾自然, 因為冇人想素顏時都有條化妝眉, 甩左色妝感無咁重, 但到後期出街同樣要自己補下lor, 如果唔係日頭太陽猛個陣條眉又變左唔夠色 XD

      刪除
  2. 無紋過眉,但接過眼睫毛。中意有放大眼睛的感覺。請問你覺得兩者會有咩分別? 想知道係咪單做一樣都差不多效果呢? (以放大眼睛來說)

    回覆刪除
    回覆
    1. 植睫毛紋問眼線兩樣都會有放大眼睛嘅效果,通常貪靚嘅人都會兩樣一齊做,咁就直頭真係唔使化眼妝,雙眼又會再精靈好多,而如果單做其中一樣的話,其實都係要夾睫毛或畫返眼線咁~

      刪除