雖然而家 hk 乜都買得到, 新貨又追得日本好貼, 不過點計都係日本買會新啲啲 + 抵少少 + 更齊貨嘅~ Share 上個月去日本買咗啲咩 / 好唔好用先, 部份妝品 hk 都有售~
由於篇文太長, 今次只介紹化妝品, skincare 下篇再分享, 要啲時間寫 😉
* 文章內價格以 100 yen 兌 7.1 港元 + 免稅 + 四捨五入計算
** 所有相片均可按圖放大 🔍
KOSE 旗下 ESPRIQUE
總覺得佢 image 同 Shiseido MAQUILLAGE 好似, 都係主攻 OL 路線, 包裝同價位都差不遠
買咗新出嘅「Juicy Cushion Rouge」氣墊唇膏 →
海綿頭設計, 含乳木果油 + 澳洲堅果籽油 + 摩洛哥堅果油 + 角鯊烯等保濕成份, 簡單推開即能自然暈染雙唇, 緊貼雙唇形成水潤光澤膜, 帶來持續 6 小時水漾滋潤感, 經過長時間亦不會滲入唇部肌膚造成傷害。
2000 円約 HKD 141
共 12 色, 隨意試咗幾隻色俾大家睇 →
最終買咗中間嗰隻 #PK 891, 上唇效果都頗輕薄 sheer, 滋潤度高, 不現唇紋 👍🏻
不過就唔覺得有佢講到 "可 last 6 小時" 咁持久, 色效約 2 小時左右就退色, 但 "不會滲入唇部肌膚造成傷害" 係 key point, 卸妝時亦不見有唇色殘留~
另外海棉頭設計雖然方便塗抹, 但就因棉頭太大未能勾畫唇形, 會較易搽出界.....
仲買咗「Rich Creamy Rouge」液體唇膏 →
使用 "不會導致色素沉澱" 之顏料, 配合透明質酸 + 角鯊烷 + Airy Stay + Melty Cream + Warpping Oil 等保濕成份, 實現 Creamy 觸感 + 濃密色效 + 滋潤保濕唇妝, 持妝度 6 小時。
2300 円約 HKD 163
共 10 色, 比起上面嗰支「Juicy 氣墊唇膏」質地更滋潤, 色澤更濃厚 →
買咗 #BE 372 啡色, 薄搽一層淡淡哋夠 natural, 又可 tune down 本身過紅嘅唇色 😍
不過持久度又係冇佢所講可 last 6 小時咁耐, 都係 2 小時就甩晒色了.....
Lip Treatment 唇部護理 →
含維他命 E 衍生物 + 透明質酸 + 薄荷萃取液 + 凡士林, 不含香料, 可防止唇部乾燥及破裂, 撫平因乾燥而產生的唇紋及皮屑, 實現光澤滋潤雙唇。可早晚使用, 亦可用作為唇妝打底。
共 2 色 (#001 透明 / #002 淡粉紅), 我呢支係淡粉紅
效果並冇咩唔好, 只係我嘴唇較 sensitive, 唔太鐘意佢種薄荷清涼感, 覺得有少少剌激, 搽完好明顯見到唇邊開始刺激泛紅.....
1600 円約 HKD 113
Shiseido
免卸妝 makeup base →
據指用咗佢打底後可形成保護層薄膜, 阻隔全個妝, 然後全個妝都可以於沖涼時用 40 度溫水輕易卸除, 無需使用其他卸妝品! 仲話連嘴都搽得, 唇妝都唔使卸! 😱
呢支我係冇買嘅, 不過覺得幾得意想 share 一下
本來都想買嚟試, 不過佢又冇 tester, 完全唔知係咩質地 / 有冇色, 加上又有啲猶疑就咁用溫水卸妝會唔會唔夠乾淨? 會唔會堵塞毛孔? 於是就放棄了 🤔
980 円約 HKD 69
KATE
Water In Oil BB Cream 精華油防曬 BB 霜 →
1400 円約 HKD 99
唔知自己點解要喺日本買 KATE 咁趣緻, 其實只比 hk 平幾蚊, 不過咁啱試上去又覺得幾啱用, 見買開嘢就順便 😆
共 2 色, 我用嘅係 #02 →
睇中佢添加咗好多精華油, 質感特別柔滑保濕, 啱晒我呢類乾肌 🙌🏻
BB cream + 薄掃一層碎粉後效果 (冇搽遮瑕膏) →
試上面同試上手背一樣咁柔滑貼皮膚, 薄身唔厚重, 亦能撫平到一半以上乾紋毛孔! 😍
不過遮瑕度就唔算高, 只能淡薄均勻膚色, 但搽埋碎粉後都覺得 coverage 係足夠嘅, 勝在夠 natural 唔厚妝~
驚喜在佢添加咗咁多精華油, 但搽完都冇滿面油光, 唯一缺點係佢始終只係 BB cream 唔係 foundation, 持久度唔高, 只能 last 約 2-3 小時慢慢開始溶化需補妝。
Shiseido MAQUILLAGE →
大家知 hk Shiseido 專櫃已經冇咗 MAQUILLAGE 喇, 好可惜呀! 話晒都係一個唔錯嘅牌子, 仲陪伴住大家成長, 以前都不知買過幾多佢嘅化妝品...... 😔
所以一場去到日本當然要去探下佢~
主要係為咗補購呢支「精華油潤唇膏」 →
注入高純度美容唇油, 搽完即時掩蓋晒所有唇紋, 潤到爆燈又持久, 好似搽咗透明唇采咁 💋
共 2 色 (透明 / 淡粉), 我一向用開透明, 今次都係買返透明, 而淡粉色係上年新出的
2000 円約 HKD 141
經已回購過無數咁多支, 又介紹過俾唔少閨蜜用, 個個都讚好用 🥰
唯一缺點係容量不多, 搽得密的話好快約 3 個月就 K.O 一支.....
新出嘅「開運漸層 eyeshadow」本來都想買 →
內有一格 eyeshadow base, 最大嗰格係 3 色漸層眼影粉, 可獨立使用, 亦可自行 mix 顏色用
可惜最靚、最想買嗰 3 隻色都 sold out!
得返 2 隻唔多靚嘅色, 似乎好受歡迎咁喎 😮
2800 円約 HKD 199
新出「Dramatic Jelly Compact Foundation」果凍粉底 →
以水凝果凍為基底 (gel-based), 含豐富玻尿酸保濕成份 + 儲水膜定妝技術, 能緊密貼合肌膚, 於表面形成清爽薄膜, 妝效清爽不黏稠, 同時能持續為肌底注入保濕力, 更能遮蓋毛孔, 塑造似有若無的輕透裸妝感。
具 13 小時持妝度, 防油光 / 防脫妝 / 防結塊 / 防氧化變暗沉
SPF30 PA+++
共 3 色
粉底連 case 4000 円約 HKD 284
粉底上有彈力網層, 可避免過量沾取粉底 👍🏻
而水滴形粉樸亦能更貼合眼底 / 鼻翼 / 嘴角等微細位置
我係買 #2 自然色
搽上面效果 (只搽粉底冇其他) →
的確能 cover 到毛孔, 妝感又夠淡薄自然, 係唔差嘅~ 👍🏻
不過始終係屬於 "防油清爽型" 粉底, 就算已加入保濕成份保濕力都偏低, 冬天用甚至覺得乾, 比較適合春夏用, 而家冬天用就有啲勉強, 有點乾到浮粉。
遮瑕度屬中等, 黑眼圈 / 斑斑約能 cover 6-7 成, 而皮膚泛紅 / 暗瘡之類就只能遮到約 4-5 成。持久度方面約 5 小時部份位置開始溶化。
暫時只能話係不過不失, 夏天再攞出嚟試過~
KOSE 旗下 Visée →
一向好鍾意呢個牌子, 有啲似 KATE, 價位又相似, 但總覺得佢啲 product 吸引過 KATE 🥰
hk Visée 官網 : https://www.kose.com.hk/v2/visee
Perfect Look Powder 碎粉 →
共 2 色, 我係買 #01 色
1500 円約 HKD 107
粉質都打磨得頗幼滑, 夠貼面夠自然 (我用碎粉掃), 又唔覺得特別乾 (不過都唔覺特別保濕), 屬中規中舉吧, 係定到妝但又冇乜特別, 屬普通碎粉一盒, 勝在夠平。
至於 "控油度" 暫時都覺得滿意, 不過冬天冇乜油出好難得真, 要等夏天先試得清楚了。
My Nudy Eyes 眼影粉 →
共 5 色
1200 円約 HKD 85
上年一出已在 hk SaSa 買咗, 一直到而家都仲日日用緊, 覺得都幾唔錯, 今次去日本又再 encore 買多隻色~ 😊
Powder Tip Eyecolor 雙頭眼影粉筆 →
共 10 色, 眼影與筆杆係分開出售, 一支筆杆可配 2 色眼影, 夾埋約 HKD 113
眼影單色 650 円約 HKD 46
筆杆 300 円約 HKD 21
眼影粉藏於筒內, 每次關蓋時棉刷會自動沾粉 →
配一深一淺 color 就可輕易掃出雙色漸層眼妝 👀
趕時間嗰陣 / 出 trip 用佢係超方便! 🙌🏻
除咗可用於上眼蓋, 連下眼影都一掃就掂, 又唔覺佢會好易溶化, 正喔~
唯一缺點係海棉刷頭偏大 + 唔夠尖細 , 粉量好易沾取太多, 掃眼頭 / 眼尾時好易出界, 建議掃上眼前先印一下手背或紙巾。不過點計都方便過 + 快過用傳統 eyeshadow 嘅 👍🏻
Shiseido 旗下 ELIXIR →
一向對呢個中女牌子冇乜好感, 皆因以前用過佢嘅洗面 + 防曬日霜都覺得好一般.....
不過見到佢有粉底霜又八卦想試 😝
Luminous Glow Foundation 光聚焦粉底霜 →
以半透明粉末 + 反光珍珠粉末, 配合光聚焦技術精心調配, 注入高保濕成份, 具完美修飾毛孔 + 斑點 + 均勻膚色功效, 同時能保留肌膚原生的裸透光澤, 仿如補光板般將光源聚焦在雙頰最高處, 一抹瞬間貼服, 清爽不黏膩, 綻放緊緻透亮的水玉光。
粉底連 case 3500 円約 HKD 249
粉底膏內貌 →
#OC 30 雖然望上去勁深色, 奇在搽上面係一啲都唔深色, 同我平時用開啲粉底色差不多
搽上面效果 (只有粉底冇其他) →
說好了的 "原生裸透光澤高光效果"...... 係有嘅! 不過就冇佢講到咁勁識集中於面頰, 係全塊面都有微光 😆
得意在佢純粹係「光」, 但一啲都唔「油」唔黏膩, 摸上面係清爽的, 保濕度屬中等。本來都幾鐘意呢種光采妝感, 不過佢實在太唔持久、太快溶妝了! 只能 last 2-3 小時開始溶化, 而且遮瑕度略低, 只比 color base 好一點, 唔太 cover 到我嘅泛紅膚色, 塊面仍然紅卜卜.....
LB
Smudge Gel Eyeliner 超極限持久抗暈眼線膠筆 (旋轉式) →
具乳霜般的輕柔質感, 軟硬適中, 能輕易畫出理想粗幼度, 亦可快速暈開營造眼影效果。採用超強防水設計, 化妝新手都能輕鬆打造各種持久眼妝。
共 7 色
800 円約 HKD 57
呢支真心唔錯! 👍🏻
筆芯夠幼, 防溶度又高, 我買咗支 #Royal Brown 啡色用嚟畫下眼內眼線, 全日都唔覺有溶妝, 價錢又平喎~
日本熱銷開架品牌 Kiss
雪紡珠光持妝蜜粉 →
被喻為「零破綻、會呼吸的輕透蜜粉, 有忘了上妝般的輕透舒爽感」
含玻尿酸 + 蠶絲粉 + 摩洛哥堅果油等美容保濕精華, 搭配「皮脂吸收粉末」能有效吸取多餘油脂, 添加 bright-up powder 能修飾令人在意的暗沉感, 實現透明感無瑕肌。無香料, 不易致痘痘及粉刺配方。採用 SPF12 PA++ 物理防曬, 不添加紫外線吸收劑
價錢唔記得咗, 大約係 $110-120 左右
分 Natural (啞光) / Lucent (珠光) 2 款, 我係買啞光
我一向唔鐘意用粉樸印碎粉定妝 (用開碎粉掃), 覺得用粉樸會太乾 / 太厚, 不過呢盒 Kiss 粉質確係極度幼滑! 保濕到就算用粉樸印都唔覺得乾、唔現乾紋喎! 正正正! 定妝慳返好多時間! 😍
雖然都有控油成份, 不過我就覺得佢效果偏向保濕多啲, 持久度相對冇控油粉咁 long lasting, 但幾個鐘都 keep 到嘅, 到時輕輕補一補粉就 ok。
呢盒 dry skin 記得入貨, 好用過 SUQQU 嗰類貴牌, 拍得住 cle de peau! 🙌🏻
特別鐘意呢類 "網層隔" 設計, 不易沾取過多粉量 →
MSH
Time Secret Moist 24H 防曬保濕零毛孔粉餅 →
添加美容成份, 能服貼肌膚不易脫妝, 輕塗一層即可均勻膚色 + 高度遮瑕 + 遮蓋細紋毛孔 + 高效保濕, 更不會卡粉或浮粉, 除可用作補妝, 也可用來定妝或直接當粉底用, 輕鬆打造無瑕陶瓷肌。具 SPF30 PA++ 防曬度
Msh 呢款 Time Secret 粉餅其實都經已好出名, 仲攞過日本 Cosme 大賞 No.1 🏆 以乾肌來講最啱用就係呢款 "Moist 冬季限量版", 仲有支細 size "膠原蛋白定妝噴霧" 附送!
1800 円約 HKD 129
共 3 色, 我係買中間自然色
日本官網詳盡資料 :
搽上面效果 →
由於用 "粉餅取代粉底" 化法並唔足以 cover 黑眼圈或其他瑕疵, 所以都要預先搽少少 BB cream 或遮瑕膏打底。下圖係搽咗 KATE BB Cream + 少量遮瑕膏, 再全面用呢盒 Time Secret Moist 定妝。
以咁 close up 近睇都 cover 到毛孔細紋兼唔厚粉計, 個粉餅都算勁! 仲要一啲都唔覺得乾 / 冇卡粉 / 冇龜裂嗰下犀利! 粉質摸上手都比專櫃貴牌的更幼滑, 保濕度亦係我用過的粉餅之中最好的! 😍
不過始終係高保濕粉餅, 控油度唔高, 約幾個鐘後都有輕量出油 + 少少浮粉要補妝, 除此之外係好滿意🥇不過佢遮瑕度著實高, 唔想厚妝記住輕手啲
跟住落嚟介紹呢 3 支定妝噴霧, 描述指噴咗之後帶口罩都唔會磨甩個妝! 🤩
售價由 HKD 幾十至 $120 支
上個月去日本時仲未有疫症, 為咗 keep 住個妝我 3 支都買齊試試, 不過而家為咗防禦, 去邊都唔會除低口罩, 個妝溶唔溶都冇關係了.....
Anyway, 反正之前都試用咗, 就報告一下效果俾大家知, 總有唔使再帶口罩出街的一天, 大家齊心加油防疫, 好快會捱過去的 💪🏻💪🏻
結論係 3 支嘅測試結果都差不多, 一日過後個妝都仍然會甩會溶 😅
有冇覺得噴完 spray 帶口罩個妝甩少啲?
咁又真係好咗啲嘅, 甩少一半咁囉, 都好過冇~
驚安開架化妝品分享完畢~~
至於專櫃牌子, 今次去日本就只買了 ADDICTION →
百貨公司個個 counter 都要排隊, hk 又唔係冇得買, 又唔係好有必要, 實在唔想浪費時間排。去 ADDICTION 都係因為要幫朋友買嘢。
見咁辛苦排完隊, 自己都唔執輸買咗盒胭脂 →
係雙色胭脂 + 光影粉, 單用一色又得, 混合 2 色一齊掃又得~
屋企都有用開 ADDICTION 單色胭脂覺得唔錯, 今次呢盒同一價錢有 3 隻色感覺更抵 👍🏻
hk 專櫃賣 $195 @ https://www.hk.addiction-beauty.com/cn/
hk 同日本售價不算差太遠
色號 #002 效果 →
顏色好靚好 natural~ 唔會太深色, 蜜桃色 tone 咩膚色年齡都啱用 😍
見日本化妝師哥哥咁細心幫我試化妝品.....
我又幫襯買咗支粉底液試試 →
The Glow Foundation 光澤粉底 →
「不是珍珠的光芒, 也不是油光感, 而是 "DEWY" 的水潤光澤」
蘊含保濕成份玫瑰果油 + 百葉薔薇玫瑰精華 + 橄欖果實萃取油, 質感輕盈絲滑, 水潤保濕, 由內而外滋潤飽滿肌膚, 讓肌膚散發如露珠般的 dewy 水潤光澤, 締造透明素肌感。
hk 專櫃賣 $315 / 30ml @ https://www.hk.addiction-beauty.com/cn/
質地比一般 liquid foundation 更柔滑 →
感覺的確係好輕盈無重, 睇相都 feel 到好水潤 →
搽上面效果 (只搽粉底冇其他) →
係好滑好貼好保濕嘅, 如同搽緊貴價精華粉底咁, 質感一流, 又撫平到毛孔乾紋, 仲有種自然光感, 望上去好似好有健康氣息, 好光滑 👍🏻
但就略嫌遮瑕度低咗啲, 雖則佢話係 buildable, 但就算搽 2 層都只能均勻膚色 (下圖係已搽 2 層), cover 不到泛紅或斑斑, 只適合瑕疵不多的 dry skin 用, 同埋持久度唔高, 冬天都只能 last 3 小時左右就開始溶妝了, 應該要好乾嘅地方先用到......
報告完畢~~ 🤗 下次再分享 2020 驚安 skincare~
沒有留言:
張貼留言