2020年5月22日 星期五

Laser 洗眼線係點? 十級痛但好有效

(溫馨提示, 內圖會有點恐怖, 怕血的慎入)

紋「下眼線」大家都知係咩啦~ 由於紋完會好惡好實色, 所以而家都冇乜人會紋了。  

然後上年開始新興如同淡眼影般的「啡色點霧下眼線」, 唔係一條黑線咁實色,亦會隨住時間淡化, 唔會好似舊式眼線咁永久殘留, 效果比舊式的自然好看, 可慳返化妝時間兼唔會溶妝, 於是我又心動了, 自己响屋企幫自己紋咗次, 覺得效果都幾 ok 喎~

不過始終紋自己同幫人紋唔同, 紋落自己隻眼都真係有啲難控制唔夠就手, 於是半年後佢就淡化消失咗了。  


心諗既然自己試過效果都 ok, 不如就俾錢出去俾人紋吧, 點知又賴嘢 😓  

我明明係話要用淺啡色 + 點霧技術, 強調唔係要一條線, 點知整完之後係粗黑色一條實線..... 😭 

之後周圍上網搵洗眼線嘅資料,「laser 洗眼線」當然係最徹底, 但價錢貴、創損亦最大, 於是就先試過出去用比較溫和嘅「除色液」洗, 過程同紋眼線冇分別, 都會有少少紅少少結焦, 每個月洗一次, 每次 $800, 但洗完 3 次都只係淡得極少..... 

下圖經已係出去用「除色液」洗過 3 次, 都仲係好深色 →


心諗咁樣洗落去, 每次俾 8 百都唔係辦法, 不如徹底去做次 laser 算啦!  

偶然响 fb 見到 NuMe 嘅洗紋身廣告, 見佢有做洗眼線, whatsapp 問完資料就 book 了 →  


去到首先坐低填個人資料 + 聽姑娘講解程序、做完會點、downtime 期有咩要留意等等.....

姑娘話我個 case 要洗 2 次先完全洗得走, 不過我只係想洗淡啲, 唔使完全洗走晒, 所以做 1 次都 ok, 價錢係$2800 / 次


機係用 Picosure 755 波長專洗紋身的皮秒激光, 只需幾秒就完成 →

姑娘話洗眉就未必係醫生做, 但洗眼線就比較有風險, 會係由醫生打


然後就入房敷麻醉膏 20 mins →

都有心理準備預咗係會有啲痛、會紅腫幾日、會結焦之類, 心諗既然雙眼皮吊線我都經歷過,laser 洗眼線應該難我唔到啩?  

敷完麻醉醫生入嚟幫我戴眼罩, 眼罩係戴入眼球內的, 好似個五蚊咁大嘅黑色膠 con 咁, 一戴咗就黑色一片乜都睇唔到, 同埋會有啲硬好唔舒服, 不過都係忍一陣啫還好。  

然後醫生就開始打 laser 了......

想講紋眼線唔係好痛, 但原來洗眼線係痛到彈起㗎! ( 個身真係嚇到彈咗一下 🤣 )

我已經係忍得痛嗰堆, 敷咗麻醉都痛到想嗌救命! 短短幾秒「啪啪啪」都已經好似來回咗地獄一轉咁, 痛到我要捉實張被, 邊打邊發出「唔~唔~唔~」嘅聲好似生仔咁樣, 好彩真係幾秒攪掂咋, 耐啲我驚我會頂唔住 😬 

好快打完後醫生就幫我除低眼罩......


擘大眼照鏡嗰吓都有少少嚇親! 有血嘅? →

雖然姑娘有講過話會好紅會損, 但就冇講會流血, 所以嗰刻自己望到真係有少少驚 😨

血水要按住 10 mins 先止到, 期間都會流少少眼水。

同埋姑娘話 laser 掂到嘅睫毛位置會變「白毛」 (之前係冇提到)。因為我係下眼線, 所以還好唔太覺眼, 要好近睇先會見到有啲睫毛變白咗, 而姑娘話新生出嚟嘅睫毛會變返正常黑色的。  


10 mins 後 →

開始有啲腫起了, 至於傷口就用紙巾印上去仍會微滲血水, 之後嗰一個鐘都係覺得好痛好熱、好紅腫咁, 要返屋企敷冰 + 搽醫生開嘅消炎膏。  


即晚情況 →

望落去好似有條紅色眼線咁, 仍然會痛, 眼底會紅同腫漲, 努力敷冰揸藥膏 💪🏻   


第 2 日情況 →

都預咗冇咁快會消腫同散紅嘅, 但傷口已經埋好咗, 見到下睫毛有啲根位係變咗白毛, 不過要好 close up 先察覺到, 其他人望係唔覺的。

至於眼底啲紅色圓印, 應該係因為皮膚有創傷, 爆微絲血管刺激到下邊, 估計會慢慢減淡的


第 3 日起身情況 

已經好咗好多, 眼線傷口已經轉淡紅, 不停敷冰後眼底亦冇咁腫了, 痛嘅感覺亦開始消失。  


第 4 日情況直頭係 good →

紅腫情況極輕微, 掂落去都唔再痛了, 我仲已經開始偷雞化妝用少少遮瑕膏遮住眼底 (但不掂傷口), 同事話唔講已經睇唔出有腫或損了~   

睇返個效果, 雖然 laser 洗係又貴又痛, 不過又真係好快同有效嘅, 打 1 次已經淡咗勁多, 雖然皮膚未真正完全好返晒 (應該要過多幾日), 但眼線退色效果就好滿意 🥳

係一次既痛苦又難忘嘅經歷, 俾有興趣洗眼線嘅人作個參考吧~ laser 洗眉大致上也差不多, 不過範圍大啲 downtime 期應會耐少少, 眉毛變白期間要畫眉 cover。 


至於 NuMe 好唔好 →

我都係第 1 次用 laser 洗眼線, 亦唔會有需要再做, 就冇得同第二間比較了, 但效果我係好滿意~ 至於 service 我都覺得係 ok 的, 姐姐同姑娘們都 nice, 亦冇 sell 我任何嘢 (我係去 TST 分店)。

唯一只係諮詢時就冇講會流血 / 睫毛會變白, 令我少咗啲心理準備啫, 還好我接受得到。同埋整完之後好似好急趕咁, 未等止血就送你走 (可能客多), 呢點就差咗少少。

https://www.facebook.com/nume.hk/



沒有留言:

張貼留言