韓國「Jung Saem Mool 鄭瑄茉」 🇰🇷 超好用底妝品推介

韓國星級化妝師 鄭瑄茉 嘅 YouTube video 大家應該有睇過，而佢創立嘅「Jung Saem Mool 」更加係得奬無數嘅暢銷彩妝品牌，被喻為韓國必買美妝品牌 🏅 香港亦有好多網店代購

早幾個月前香港 Times Square 連卡佛都新開咗專櫃 🥳 只係貨品種類少過韓國好多，部份產品仍需靠韓國代購或托朋友去韓國旅行買, 個人認為佢嘅底妝品真係幾唔錯又抵用，好值得推介！介紹一下幾款我用過嘅底妝品 👉🏻

* 以下妝品我已經用咗一段時間，並非購自香港，部份產品香港專櫃可能冇出售，不過放心香港大把代購 😉 ** 文章內售價參考自韓國官網兌換港元計

潤色防曬打底隔離霜 Tone Balancing Base SPF50+ PA+++

約 $190 / 40ml 

共有 6 款不同功能，分別為光澤 / 保濕 / 清爽 / 遮蓋泛紅 / 提亮 / 均勻膚色等等，對我呢啲有選擇困難症嘅人嚟講真係幾難揀 😂

諗咗好耐，最想當然係揀一支咩功效都有就最好啦 😆 結果就買咗呢支 Tone Balancing Base，除咗有 SPF50+ PA+++ 防曬度，仲有均勻膚色、修飾毛孔、平滑肌膚紋理、保濕 、提亮功效，就好似 bb cream 咁 all in one 😍

雖然話係打底 base，官方描述亦係 sell 自然裸妝感，但其實佢嘅遮瑕度係超高！一啲都唔算裸妝，on top 唔再搽粉底都得 ，所有膚色不勻 / 泛紅 / 暗黃 / 黑眼圈問題全都 cover 到，連毛孔 / 紋理等等都填平到 50%，妝感平滑無瑕，仲有埋防曬，真正係一支攪掂晒好方便！👍🏻🤩

缺點s：

1. 只出得一隻色冇色揀，搽到上面有少少偏白，以我平時韓國粉底用開 23 號色計叫勉強可接受，膚色稍為深少少都用唔到 

2. 雖說有保濕成份，但保濕度勁低，我搽咗 2 支保濕精華後再用佢都覺得乾，質地亦比較難推開，比較偏向控油 type。但話分兩頭，夏天好熱時用佢係唔錯嘅～ 秋冬就唔好諗 😅

3. 始終只係一支打底 base，持久度一定唔及粉底，但普通日常用都可以嘅

柔焦裸色遮瑕氣墊粉底 Skin Nuder Cover Layer Cushion SPF 50 PA+++

約 $260 連 refill 

印象中共出過 3-4 款唔同功效 cushion 粉底，而呢款係屬於半啞緻 semi-matte 控油妝效，高遮瑕兼有美白抗皺效果，持妝度及抗氧化變沉達 12 小時 🕰️ 

因為係初夏時買的所以特意揀控油款，夏天熱焗潮濕天氣用真心一流！又控油又清爽又防溶，薄薄一層遮瑕度已經好高乜都遮到，妝效超持久全日都唔會氧化變沉色，霧面妝效夏天用超正！ 🤩

不過秋冬用就應該唔OK了，因為感覺都幾乾，到時再試佢另外一款經典補濕 cushion ☺️

我揀嘅色號 medium 搽上面剛好

優點係有 5 隻色揀，比其他韓國牌子多咗深色選擇，膚色深嘅人都有得揀 👏🏻

專業持妝定妝蜜粉 Pro-Lasting Finish Powder 

$210 / 10g 

皮膚易出油 / 鍾意清爽霧面妝感 / 夏天易溶妝 / 大汗嘅人一定要試呢盒定妝碎粉！佢嘅粉末係超輕身幼細，定妝極持久，控油度非常高，仲可以撫平毛孔、紋理同凹凸位，連我明明係 dry skin 都覺得佢超好用！😍

類似嘅白色輕薄控油定妝粉我以前都用過超多，不過呢盒簡直係頂級中嘅頂級！🤩 係真正薄如輕煙，輕薄到不留痕跡，薄薄一層摸上手已經超乾爽、滑溜、零黏膩感，防汗防水度亦高，係超有實力！

乾肌用可能會嫌佢乾，但我夏天用覺得佢好爽爽～ 🤤 薄用都ok 嘅

用碎粉掃效果會更輕薄，但係我懶 😂 只用佢附送嘅粉樸

個天鵝絨粉樸質地亦超柔軟，唯一唔夠方便嘅係盒粉冇位放粉樸，要另外存放膠袋內，不過我冇理佢夾硬擠囉 ，於是個盒係關唔實有條罅嘅 🤣

專業六色遮瑕盤 $235

有 2 色可選，我買嘅係 #SKIN，有 6 隻唔同深淺嘅膚色，質地柔軟輕薄，遮瑕度屬中等，但就唔建議一般用家買了，呢盒屬於高難度妝品唔適合新手，比較適合專業用家 / 化妝師用 👩‍🎨