雪花秀 Sulwhasoo 第 2 代昇華版「Perfecting Cushion EX 緻美無瑕氣墊粉底」用後感

雪花秀上年推出嘅「第二代 Perfecting Cushion EX 緻美無瑕氣墊粉底」，一睇到廣告嗰陣我已經好想買嚟試喇! 仲記得當時去 hk 專櫃問過冇貨，我仲專程襯去旅行時响機場 DFS + 台灣 sogo 揾添! 

好可惜當刻周圍都冇貨，後來就不了了之，直頭唔記得咗佢 lu.... 😆

正所謂有緣嘅總會相遇，事隔 9 個月，上星期响街等人走入 Colourmix 涼冷氣，就竟然俾我見到呢盒 foundation 向我招手喇! 🤣

試用咗一星期，報告一下用後感先~ 

產品資料 →

昇華配方蘊含裂褶菌精華萃取，並加入 Sulwhasoo 獨創「Slim Fit High Coverage Formula」，粉底極致貼薄，高效水盈補濕，能融入每吋肌膚修飾斑印細紋，上妝後由內而外煥發細緻光采，透現自然輕盈妝容，妝效無瑕持久。

$350 (包粉底粉盒 + refill) @ Colourmix 

共 6 色選擇，但 Colourmix 因為係水貨平啲，我見只得 #23 色 (剛好我都係用 #23)

雪花秀 website: http://www.sulwhasoo.com/hk/zh

新版設計係象牙色粉盒，盒上有雪花秀經典梅花圖案 → 

具 SPF50 PA+++ 防曬度 →

粉底外觀同普通 cushion 粉底一樣，但海綿上就刻有 logo →

而附設嘅粉樸就好軟綿綿! 仲係比較少見嘅啡色→

印一層粉底效果 (冇搽遮瑕膏，未掃碎粉) →

均勻膚色效果自然，粉質非常貼面，有遮瑕度得來唔厚妝，就算未搽 concealer，黑眼圈都可 cover 到約 7-8 成，色斑就約 cover 到 5-6 成。

以我 dry skin 夏天用計，保濕感方面亦充足，未掃碎粉定妝都唔覺得反光油淋淋，鼻翼偏乾位置亦冇唔貼粉問題。以呢個保濕程度估計過多 2 個月秋天仍能繼續用，只要換支保濕啲嘅精華打底就 ok~

印 2 層粉底效果  →

粉底質地屬 buildable 一類，局部印多一層於面頰後遮瑕度會顯著提高，色斑約 cover 到 8-9 成，感覺再無瑕啲~ 

至於持久度，只要唔出汗的話係 ok 嘅! 😂

因為佢冇乜防水功效，一出汗粉底就浮起晒，而用紙巾印走汗珠時，亦明顯見到紙巾上有好多粉底顏色，同時有嚴重浮粉情況...... (但躲在冷氣房內就冇呢啲問題出現過)

除咗呢一點之外，其實覺得呢盒雪花秀上妝效果係好好，只係似乎唔多適合 summer 用，除非係屬於唔多出汗 / 或長期於冷氣房內用吧! 否則都係秋冬用好啲~ 😆