一堆近月用過的化妝品 review

今次是近幾個月內用過、而又未介紹過的妝物~

至於過往於 blog 內介紹過的，今篇就不再重複寫了。

點解會有咁多漏網之魚?

其實唔係唔記得佢地，部份仲要係經常使用，只係因當中佔好多都屬於介紹幾句可以講完個種，獨自寫唔到一篇文，所以就打算 group 埋一次過寫用後感~

裡邊有一半係自購，一半係試用品，照樣如實報告不偏私。


先講講託朋友於美國買回的幾件妝品 →

Urban Decay Makeup Setting Spray (Oil-Control)

Urban Decay 的 "All Nighter Setting Spray" 我過往已經推介過好多次，屬於富光澤感的補濕定妝噴霧，效果就似噴上了 "液狀的光影"。而這支則屬 "Oil-Control Spray" 控油定妝版本，適合夏天 / 易出油的皮膚使用。

以定妝噴霧計，我覺得 Urban Decay 算非常出眾，而且不易令人過敏，值得一試! 這支 HK Urban Decay 專櫃都有售，只不過就冇下圖的細支裝，而專櫃賣的大支裝約 $200 幾。





美國 ANASTASIA 眉粉 →

「ANASTASIA Beverly Hills」為荷李活比華利山一間修眉店，因有極多荷李活明星s 幫襯而著名，自家有推出眉鉗 / 眉部妝品，出名到好多國家都有售，後來仲出埋 eyeshadow 等等。

雙色眉粉售價約 $190，一 d 都唔平，屬專櫃價位，但都叫做平過 Shu Uemura 雙色眉粉約 $100 (Shu 係 $280)。

如果以 Shu Uemura / Bobbi Brown 等同樣出名的眉粉作比較，其實真係相差無幾，持久度 / 上色度全部差唔多，呢盒純粹買來 out job 用。



ANASTASIA 眉筆 →

又係同 Shu Uemura / Bobbi Brown 等等的大同小異，同樣雙頭設計 (一邊刀峰型眉筆 / 一邊眉刷)，不過就更易出色，畫出來的線條更幼細、更實色。

外國人鐘意又深又實又濃的眉色，但 HK 女仕就未必鐘意，所以呢支可以 pass，要真係好識畫眉的人先會 buy (如化妝師s)。

約 $190，叫平過 Shu / Bobbi。



Tweezerman 迷你版眉鉗 →

以前有推介過: http://isadoracheng.blogspot.hk/2016/01/blog-post_18.html

以前自用個把舊 Tweezerman 已經用了 7 年，都仲係好好用! 特登再託朋友買個新的備用~



輪到 HK 有售的妝品，繼續分享眉 part →

Shu Uemura 的眉筆 / 眉粉 / 眉 gel 等等，無論工作或自用都有一直用開，佔 8 成化妝師都係選用 Shu 的眉部妝品，大家就知有幾好用。

間中係會有試用品送，不過眉筆等等工作用消耗得超快，所以好多時都係自己買，屬於你送我 1 隻色，我買返你 3 隻色個種。自己就偏好鐘意佢扭動式個支眉筆，因為唔使刨~

而今期新出的酒紅色系列，專為染了紅髮 / 紫髮的人而設~


眉筆 $270 / 雙色眉粉 $280 / 眉 gel $250 @ http://www.shu-uemura.com.hk

(下圖 3 件為試用品)



因為 match 到我髮色，而市面上又的確冇呢類色 tone 的眉部妝品，所以除了佢，我別無他算! 一直用一直用~



Shu Uemura "Drawing Pencil" 防水眼線筆 →

買完一開發現筆芯乾左畫唔出，換過一次。

主要用來畫下外眼線，但約 4-5 個鐘之後就變熊貓眼了，試過畫完 on top 再 set 埋碎粉都係會溶，所以可 bye bye....

$190 @ http://www.shu-uemura.com.hk (自購)



NARS "Eye Paint" 眼線膏 / 眼影打底霜 →

約有 10 色選擇，防溶度算好 ok，可 last 到一日，除了係眼線膏之外，仲可以當 eyeshadow base 用手指印上眼蓋用~

$240 @ NARS (自購)



M.A.C  "VELUXE PEARLFUSHION" 五色眼影 →

一睇就知佢飽經風霜，用得好頻密! haha~

粉質都算滑，但就未至於好上色，所以每次份量都用得特別多....

若然你 prefer 淡淡地色的效果，咁用佢都 ok，但好似我呢 d 鐘意好出到色的 eyeshadow 的人，就會覺得佢唔夠出色。

約 $300 幾 @ M.A.C (自購)



而染了粉紅髮之後，就告別了樓上盒 M.A.C，改用了下圖顏色偏紅的 YSL，襯返新髮色 →

始終貴咁多，粉質當然係更滑更易上色，一直都 keep 住有用呢盒，不過就嫌日常用太閃，化晚妝 / party 妝用會更好。

約 $500 @ YSL (試用品)



所以 2 星期前又買了呢盒 M.A.C "Eyeshadow x 9" 九色眼影 →

約有 6-8 款色 tone 選擇，揀呢盒 #Burgundy 純粹因為想搵偏啡紅 tone 的眼影，match 返髮色日常用。

約 $360 @ M.A.C (自購)



呢盒佔一半閃 / 一半啞色，比較百搭~

不過大家知 M.A.C 的眼影質地一向都唔夠實色、唔夠上色，所以每次又係要沾取多少少份量。睇在我極想搵啡紅色眼影組合份上而買，咁顏色又真係靚既!

不過呢盒用手指上色真係麻麻，一定要用眼影掃效果先靚。



Maybelline "The Blushed Nudes" 十二色眼影 →

係繼之前暖啡色組合 "The Nudes" 之後的偏紅 tone 眼影。

係! 好明顯係抄考 Urban Decay，但佢粉質又真係唔算話太差、夠上色又夠平喎! 至少好過 M.A.C 先! 不過就有 4 隻色太淺，化妝唔會用個隻....

我見網上 review 有人話佢唔夠上色同會跌粉，好老實講，我用過真係唔覺得佢唔上色，亦唔覺得佢跌粉問題嚴重，但始終係平價品，粉質一定會冇大牌咁好了。

$139 @ sasa / Watson's (試用品)



Urban Decay "Alice Through The Looking Glass" 二十色眼影組合 →



論 packing 真係冇得輸!



打開仲要有隻蝴蝶彈出!

愛麗絲夢遊仙境 feel~ 我 3 歲大的囡囡睇見超開心~



不過睇返 d 顏色.....



似乎就真係要化愛麗絲個妝先用到.....

其實 $500 除返開咁多隻色唔係算貴，但如果剩係會用裡邊的啡 / 灰 / 香檳色的話，咁不如買返佢 d "NAKED" 十二色系列好過。

$500 @ http://www.urbandecay.com.hk/zh_HK/home (試用品)



之前介紹過的 Shu Uemura "Cushion 氣墊粉底"，新出了限量 bear bear 熊盒!!!! →



粉底冇變，只係推出了限量 Shu Bear 粉盒咁解，好 cute 好可愛~~

粉底介紹重溫:
http://isadoracheng.blogspot.hk/2016/03/shu-uemura-review.html

都係個句，個粉底本身幾好，只係附設個絲絨粉樸麻麻，上粉唔夠貼，改用返普通氣墊粉樸就冇問題~

粉盒約 $100 / 粉底 $280 @ http://www.shu-uemura.com.hk (試用品)



Shu Uemura "Laque Supreme Shimmer" 唇彩 →

呢支係我最愛! 收到 2 隻色試用後，自己再走去買多 3 隻色!

係咪最無敵?

唔係。滑過佢、貼唇過佢的有 IOPE; 亮澤同持久過佢的有 April Skin。只不過要計顏色選擇最多的話就係 Shu! 而且夠出色、夠持久、顏色真確度夠準，算好好~ (只嫌佢有少少漿唇)

$230 @ http://www.shu-uemura.com.hk 



又係 Shu，呢支係新出的限量 "豐潤唇膏" →

就有點似有色的潤唇膏，超水嫩! 色效比較透薄，唔係實色個種，搽上嘴效果靚絕，有韓妝 feel~

上星期我教班時用佢示範化韓妝，全班學員即時起哄問呢支咩牌子，瘋狂用手機影低支唇膏，完全冇人留意我教緊咩，攪到我要叫大家冷靜 d，就係咁誇張~

$220 / 共 3 色 @ http://www.shu-uemura.com.hk (試用品)



至於 YSL 呢支唇膏 →

本來早 1-2 個月前仲係我最愛，但而家已經被韓國買個支 Chanel、同尋日推介個支 GUERLAIN (嬌蘭) 蓋過，後者 2 支都潤過 YSL 好多。



平價唇膏就其實 Maybelline 都唔差! →

上一個 Pretty Healthy 系列 + 新出呢個 "Rosy Matte 粉嫩啞緻唇膏" 系列質地都好好~

(試用品)



至於 Loreal 呢支我就覺得一般 →

(試用品)



反而呢款新出的唇膏液就好好用! →

請記住係暗金色包裝最新個款 "啞緻型" 先係最 good，啞身得來唔會乾，又夠貼唇~

而之前黑色 / 亮金色包裝的唇膏液系列，就全部麻麻。

$99 @ Sasa / Watson's (試用品)



呢盒同為 Loreal 的 "Cushion 胭脂" 又係好好用! →

之前拍 video 都已示範用過、大讚過~

共 3 色，最靚都係 #P2 桃紅，其他色麻麻，唔夠出色又顯得個人臉色好黃。記住用時份量要極極極少，否則會好紅，本身好出色。

$109 @ Sasa / Watson's (試用品)



Shu Uemura 最近都有出相同的 "Cushion 胭脂" →

共 2 色 / $280 each (試用品)，其實效果同 Loreal 一樣，所以不如買 Loreal，平一半有多。

記住真係唔好買橙色，好唔適合東方人偏黃膚色。



早幾個月前 beautyblender 未返貨，趕住 out job 用所以買左個 M.A.C 試試 →

唔係我偏幫 beautyblender，而係呢個 sponge 的確好唔掂，上粉卡粉又唔貼面，零回彈力，又太細個。

約 $160 @ M.A.C (自購)



日本 D.U.P 假睫毛膠水 / 雙眼皮膠水 →

呢支可以話係膠水榜冠軍! 貼力勁強、乾得夠快，保証用佢假睫毛唔會飛彈~

不過就乾得比較快，熟手技工會好鐘意，新手就未必了。

約 $68 @ sasa (自購)



化妝新手 / 動作慢少少的話可買這支 →

同為 D.U.P，貼力同樣好，但膠水冇透明個支乾得咁快，屬白色膠水。



自家 D.I.Y 染髮產品 →

於大部份髮品店有售的 Shiseido 染髮霜，約 $70 支，屬 salon 級染髮霜，乜色都有咁滯，就連我要的粉紅色都有!

試過係好上色的，只不過自己染好易掃得唔均勻咁解..... 同埋要自己溝雙氧奶一齊用 (1:1 比例)，雙氧奶約 $20 支。

(自購)



呢支 KFC 肯得雞甲油 →

簡直係最雞、最無聊之作，搽完係唔會乾的!

我仲以為我聽錯，唔識乾咁搽來做乜?!

係用來啜的..... 食得入口，有肯得雞醬味.....

好顛.....

(試用品)