SK-II Skin Signature 3D Redefining Mask「全效活能 3D 面膜」 review

大家知我以前係 SK-II 頭號 fans，幾乎所有產品都試過，full set 咁用，如珠如寶~

近 2-3 年少咗用佢 (只係少用，唔係停用)，並非覺得佢唔好或者冇效，而係因為連續用咗咁耐，乜都試勻晒嘛，就想追求新鮮感試試其他。至於佢支神仙水 + 眼霜，我到而家久不久都有 encore 繼續用。

Paper mask 方面，我一直認為佢最好用嘅就係「Facial Treatment Mask (護膚面膜)」，曾經用過好多盒，而近期較新推出呢款「Skin Signature 3D Redefining Mask (全效活能 3D 面膜)」就屬新嘗試，寫個 review~

(btw，因今星期工作比較忙，連飯都要邊做邊食，所以大家的留言我要等後晚先覆到了，新 video 亦要等星期五先有時間拍，請等一等我)

先提供產品資料 →

SK-II 全效活能 3D 面膜 

Skin Signature 3D Redefining Mask

採用 3D 彈性設計，使肌膚能完全泡浸在先進的養份複合配方，獲得最好的吸收效果。成份包括經典成份 Pitera™，Oli-Vityl™，Signaline 及 Niacinamide，有效提昇緊緻及改善臉部輪廓，重拾年輕感覺。

最特別嘅地方係佢分開了上、下兩片剪裁 + 採用 3D 彈性設計，比普通 paper mask 更貼面，能完全緊貼臉上每個細微部位。

(trial product given by SK-II)

敷完佢之後，的確有仿如做完一次深層補濕 facial 嘅效果!

不過圍起要 $160 / 片，好貴呀，真係要留返急救用 / 特別節日先捨得用.....

$960 / 每盒 6 片 @ http://www.sk-ii.com.hk/tc/index.aspx

上半片 →

取出 paper mask 後，袋內仍剩低超多精華，建議唔好浪費用來搽身，份量多到足夠搽勻全身!

又或者可以考慮放化妝棉 / 面膜紙入去袋內浸浸、吸收剩低的精華，再用膠紙封返口，翌日再敷多次臉，咁樣似乎更化算~

下半片 →

Size 大小 / 剪裁都剛剛好，而且非常貼面，敷用時整個過程都緊貼不脫落 →

鼻位 3D 設計尤其細心，能緊緊覆蓋到一般 paper mask 敷不到的鼻翼 / 鼻頭 / 鼻底位置 →

敷完 30 mins 後 →

官方建議敷 15 mins，不過我見 15 mins 後塊 mask 仍然好濕潤，所以改為敷 30 mins。

So far 敷過 3 次，效果係 super 滋潤，屬超強補濕度，亦有輕微提亮效用，敷完膚色冇咁暗啞，好似去美容院做完一次深層補濕 facial 咁 feel~

敷完潤到基本上可以乜都唔搽就咁 ZZZzzzz!

另外片 mask 的確係包得塊臉好貼好實，但就唔算有提拉感覺，敷完亦唔覺有特別緊緻到，都係滋潤感偏多。

滋潤 / 急救效果其實係好好，不過價錢較貴，只能間中敷敷，同埋只適合極乾的膚質 / 成熟肌敷用。

如果年輕肌敷呢款，我覺得好大機會會因為太潤而出粒粒。