2017年9月10日 星期日

離婚並不可怕

相信好多睇開我 blog 文多年的讀者,都應該知道我帶住小朋友離過婚。亦可能係因為呢個原因,間中我都會收到一啲化妝以外嘅傾訴留言,大部份都係環繞應唔應該離婚 / 正打算離婚 / 剛剛分居,唔知分開之後日子要點過,要幾時先可以忘記過去等等.....


其實離婚嘅原因可以有好多,唔代表離過婚就係壞人 or 一定係性格人品有問題。分開與否完全係自己嘅選擇,局外人根本唔會知你難處或苦衷。

如果覺得真係好辛苦捱唔到落去,而呢個諗法並非一時衝動決定,又已經努力經營過的話,咁其實分開亦未必係壞事。若然只為咗唔想背上離婚名義而留低,咁我會覺得呢個先係真正包袱,痛苦一世死忍又何必呢.....

雖然離婚點都唔係一件值得慶祝嘅事,甚至有人會認為係唔光采,but on the other hand 亦非世界末日,你亦根本唔需要介意其他人目光或閒言冷語,痛嗰個係你,唔係班三姑六婆,點解要為咗驚其他人點睇自己而去擔誤自己一生?

真正支持你、愛你嘅人並唔會帶有色眼鏡睇你,而嗰啲會 label 你嘅人就根本 friend 極有限,更加唔使理吧? 只要自己認為做呢個決定係將來唔會後悔、考慮清楚分開會比一齊更好、同時又儘量將對雙方及對家人的傷害減到最低就可以了。離婚唔代表唔使溝通,反而溝通清楚點樣安排先係最重要。


至於分開之後日子要點過?

當然係要好好過! 

做得呢個決定,某程度上等於你已經三思過,認為分開之後日子會過得比而家困住好,咁就當然要將呢個諗法實踐,去證明呢個 decision 係正確啦~

而分開後最難適應嘅,應該就係嗰種 "孤獨無助感",會覺得成個世界只係得返自己一個撐。

其實只要花多啲時間陪陪屋企人、揾朋友陪吓、學學興趣班、忙吓呢樣個樣、又或者專心工作,保持正面樂觀想法,時間好快就過,可以沖淡一切。當然一時三刻唔會得,但時間一過就能釋懷,過咗連自己都未必會察覺。只要捱得過呢個 stage,之後就會一片光明了~


離過婚女人唔馨香?

另一樣分開後最難適應嘅,可能就係會覺得自己將來冇人要,離過婚女人唔馨香,又或者會收埋自己......

其實呢啲好多時都係自己諗,係自己俾自己嘅框框,香唔香都係睇自己,唔係在於有冇離過婚,人品好性格好的話一定唔會冇人要。

我身邊有好多離過婚的女性朋友,當中亦有同我一樣係已有小朋友的,全部都係離婚後 1-2 年就再次嫁得出,兼且開心幸福過以前好多,所以無需因為咁而睇低自己~

不過以經驗之談計,呢一班女性朋友全部都係會打份吓、有保養開皮膚的,始終男人未發掘你內在美之前、都會先望外表,至會進一步探討你人品性格,完全合情合理,都係你揀人、人揀你的道理。如果放棄儀容、經常愁眉苦面、怨氣大到隔條街都 feel 到的話,咁就真係冇人幫到你了,所以真係要先學識愛自己。

亦要記住假如將來遇上介意你離過婚嘅男人,千萬唔好覺得係打擊,每個人都有自己喜好選擇,唔啱唔代表你係低人一等,祝君安好無謂浪費大家時間 say 個 bye 就算,繼續 move on 好了。


對我來說,離過婚並冇咩可怕,最怕只係連自己都放棄自己。人生冇保証條路一定易行,但幾難行都係咁行,選擇笑住行總好過喊住行,跌低完再起返身又係一條好漢,"希望在明天嘛" 😊


Model makeup & hair by Mun @ www.makeupsecret.com.hk


5 則留言:

  1. 我都有兩個同學離了婚啦 個仔歸老公 現在生活都開心地過沒什麼大不了

    回覆刪除
  2. 謝謝你的分享,知道你一路走來很不容易,很高興你能堅強的面對!
    而且,我覺得女人的價值不在於有沒有人要(其實男人也一樣)或者最後是否能結婚。就算最後仍然是單身,也不代表那個人的價值比較低吧,如果一個人的價值是取決於能不能討到異性歡心,那真的太可悲了,這種想法也令很多人對離過婚的人有負面看法。我覺得欣賞自己、活得有原則的人就已經很有價值,很馨香了,haha!

    回覆刪除