Urban Decay「Quick Fix 妝前保濕噴霧」review

對我嚟講，我認為 Urban Decay 不可缺少嘅就係佢嘅 setting spray (定妝噴霧)~ 

用過咁多牌子，覺得最有效果睇嘅仍然都係 Urban Decay ❤️

以前已經推介過幾次佢嘅「Oil-Control Setting Spray」同「All Nighter Setting Spray」，後者係我嘅最愛，屬水嫩光感定妝效果，無論係工作定自用都用咗 N 支了，如果秋冬冇咗佢，我直頭會認為個妝缺少咗啲嘢! 

至於新出嘅「Quick Fix 妝前保濕噴霧」效果又點呢?

同大家介紹吓先 😊

產品資料 →

Quick Fix Hydra-charged Complexion Prep Priming Spray

Quick Fix 妝前保濕噴霧

由 Urban Decay 與 SKINDINAVIA 獨家合作開發，具保濕及紓緩功效，為肌膚補充源源水分，

妝前使用有效收緊毛孔、補充水份、亮化、柔滑肌膚及均勻膚色。

噴霧質感清爽，使用後不會影響妝容，並可即時水潤及軟化角質。早上化妝前用可喚醒肌膚；晚上的護膚程序前亦可使用；或任何需要水份的時候都能噴上。

適合所有膚質使用 ，包括男仕。

(圖中呢支係送的試用 30ml trial size，正常買的容量為 118ml / 二百幾蚊，大支多幾倍，有排用) 

官網提供的全成份 →

水、北美金縷梅水、菸鹼醯酸、1,3-丙二醇、椰子水、甘油聚醚-5 乳酸酯、PEG-35 蓖麻油、苯氧乙醇、咖啡因、聚二甲基矽氧烷 PEG-7 磷酸酯鹽、辛酸三酸甘油酯、羥基乙酸、紅沒藥醇、Parfum／香水、肉堿、乙基己基甘油、葡糖酸鋅、天冬氨酸鎂、明串球菌／蘿蔔根、發酵產物濾液、苯甲酸苯甲酯、香豆素、葡糖酸銅、苯甲醇。

* 噴前必需搖勻 *

質感如水一樣稀身，唔會影響化妝 →

離遠噴上時效果都幾噴態，唔會有一滴滴水珠停留响面上，吸收速度亦算快。

至於我的用後感 →

雖然佢係話响妝前使用 (即 skincare 後，base / foundation 前)，但我仍然係鍾意化完晒個妝之後先噴佢，當係 setting spray 咁用。

點解呢?

因為化妝時間太緊迫，噴完要等佢乾都嫌花時間 (雖然只係幾十秒) 😂

效果方面，我覺得佢係屬於保濕水嫩妝效，連夏天都用到，唔會太過潤，同時又可以加速底妝與皮膚融合，對於撫平因皮膚乾而浮現的乾紋同毛孔嚟講，都有好明顯嘅改善，係一支非常唔錯嘅妝前 / 妝後 spray~

雖然冇「All Nighter」嗰支 setting spray 咁潤澤 (有啲人會嫌 All Nighter 太潤，但我就覺得秋冬用非常之好)，但仍然屬於有微量潤澤效果嘅 spray，就好似輕透版嘅 All Nighter 咁，所以認為都係只適合皮膚乾嘅人用，油性肌可揀 Oil-Control 嗰支。

至於產品介紹話 "可以夜晚睡前當係保濕 toner 護膚用" 呢點，我就唔會喇，始終成份內有 Parfum / 香水，有少少保留，都係當佢係化妝品好啲。