日本「BCL 24 小時防水眼線筆 × 立體眼影」review

自從上次買完支快靚正「日本 JOURMOE 3 合 1 眼影眼線筆」之後，就上咗癮了!

於是又想買多兩支差唔多款嘅眼影眼線筆傍身，可以轉吓顏色唔使咁悶嘛~ 😌

响 SaSa 研究咗一陣，最終買咗呢支日本「BCL 24 小時防水眼線筆 × 眼影筆」，平過 JOURMOE 一半! 試俾大家睇下先~

睇 BCL 之前，又可以重溫一下上次推介過嘅 JOURMOE 先，比較一下嘛 → http://isadoracheng.blogspot.hk/2017/09/jourmoe-3-1-review.html

反正都係差唔多嘅產品~

「BCL 24 小時防水眼線筆 × 立體眼影」官方資料 →

便利雙頭筆嘴設計，眼線液係纖細的 0.1mm 尖細毛筆筆嘴，一筆顯色，輕易畫出細緻眼線，並有效防水、防汗、防油脂，保持眼妝完整不易脫妝。

眼影筆為海棉刷頭，內置柔滑粉質的眼影粉，能輕易與肌膚融合，不易脫妝，呈現立體光澤的閃耀眼妝。

$89 @ SaSa (2 色選擇)

我買的色號 : #極緻黑 × 閃耀啡

眼線液係實黑色，筆尖極幼，好出色好易畫，顏色唔會化開，防溶程度好高，成十幾個鐘都唔會溶妝! 👍🏻

而眼影粉係帶閃的啡色 →

正正常常一個眼影粉咁，冇乜特別，不過粉質尚算貼膚，只是嫌佢太過閃，試上手背時好明顯見到有好多閃粉。

好彩掃上眼後都唔係好閃 →

但自己好近睇嘅時候都會見到有閃粉，只係唔算過份地閃，日妝仍可 carry~

缺點係覺得佢唔夠出色，下圖呢個顏色度係來回狂掃咗十幾次先至有，如果只係掃幾下，效果會淺色到好似只係掃咗少少陰影粉咁樣，出唔到原色。

中立講句，出唔到原色呢點對喜愛淡妝的人計係 ok 的，只係我偏好眼影要見到顏色 (眼細吖嘛)，所以就覺得佢一般，如果每日要狂掃十幾次先出到咁嘅色，真係眼紋都多幾條......

不過眼線液效果就好好，又流暢、又易畫、又幼、又持久~

唔好以為我掃到個眼影好深色，其實張開眼效果係好自然 →

所以可以想像得到如果我只係掃幾下，就會等於冇化過眼影一樣。

總括來說以 $89 計係可以過關，假如你鍾意淡妝、唔介意眼影顏色比較淡的話，都係買得過嘅，平時買支開架品牌眼線液都要呢個價吧，咪當個眼影粉係 bonus 囉，要用先用~

但如果俾我揀，我都係會揀返 JOURMOE →

雖然貴一倍 ($168)，不過出色好多~

下次再試吓佢其他顏色先~