2018年3月9日 星期五

日本 No.1 大熱 FLOWFUSHI「ION de Cushion Foundation」氣墊粉底 review

上星期分享嘅 遊日本必買藥妝店 好物推介 review 2018 文中提到有個被喻為日本第一、曾經賣到斷市嘅氣墊粉底 FLOWFUSHI「ION de Cushion」,因為自己失憶揾唔到放咗去邊,所以當時並冇分享到用後感......

早幾日終於响行李箱暗格內揾返喇 😅

試咗幾日,後補返個 review 俾大家睇先~

FLOWFUSHI「ION de Cushion」氣墊粉底 SPF32 P+++ 

呢款被喻為日本 No.1 嘅 cushion 粉底已並非新品,都推出咗年幾兩年喇,不過仍然係大熱暢銷品,好多日本藥妝店都會見到佢。都係嗰句,好用嘅嘢從來冇分新唔新,啱用就得啦~

賣點係打正旗號 made in Japan,除咗採用天然礦物獨家配方,質感水潤貼面之外,仲可阻擋 PM2.5 霾塵同花粉 = 搽個粉底已彷如戴咗隱形口罩。比起其他歐美 / 日本牌子 cushion 粉底普遍都係韓國製,呢隻 FLOWFUSHI 確係有噱頭,大家知日本嘢一向品質都有返咁上下~


有分 cover 遮瑕款 (紅盒) / natural 水潤自然款 (金盒),每款分別有深淺 2 色選擇 

2 款都同樣係好保濕、好滋潤、有亮澤感,分別只在於遮瑕度。

natural 水潤自然款 (金盒) 效果係比較透薄的,遮瑕度唔算高,只適合冇乜瑕疵要遮嘅人用,所以我就買咗更高遮瑕力嘅 cover 遮瑕款 (紅盒)

建議無論塊面多唔多瑕疵都揀粉紅盒更好,薄上其實都做到金盒嘅透薄效果,所以揀粉紅盒會更 flexible,用幾多份量 / 上幾多層呢啲可因應喜好及場合加多減少 😊

不過 2 款都只適合乾性肌,油性肌就用唔到喇.....


售價方面係好親民! 粉芯連粉樸只係 ¥2200 = HKD 162 左右 

如買埋粉盒套都係 HKD 260 咋! 😍


不過我就冇買粉盒,只買咗粉芯,因為個粉盒設計到成隻巨蛋咁,size 超級巨,好嘥位! 

反正只放响屋企用,單買粉芯已足夠,慳位之餘仲更平添~


要讚一讚佢個水滴型粉樸設計! →

個尖角位上粉真係貼面好多! 特別係眼底 / 鼻翼嗰啲微細位,好輕易就上到粉,唔會好似普通圓形氣墊粉樸咁要死印爛印、印到個鼻翼想甩皮先上到粉 👍🏻

粉樸物料亦極好,有厚度之餘,密度亦夠高,唔會吸晒啲粉底入海棉,上粉效果特別均勻貼服,比普通圓形氣墊粉樸好用幾倍,好用過 YSL / Armani 氣墊粉樸多多聲~

可惜呢個粉樸冇得單買,否則我一定掃貨! 😂


我買咗 cover 款 #02 色 

其實最深色嘅 #02 已經唔算好深,所以要好白嘅膚色先用到 #01  


而粉芯海綿係屬於密度較低、洞口較大一類 →

咁樣設計嘅海綿一般唔會太沾到粉,所以底妝效果會比較薄透。

大概 FLOWFUSHI 就係想塑造呢種 sheer 妝感,所以刻意咁樣設計吧?~


"cover 遮瑕款" #02 色效果 →

經已印咗 3 層粉底,不過因為質感透薄嘛,所以一啲都唔覺得厚妝 (可想言之印 1 層係有幾薄),都話揀 cover 款會好啲~

遮瑕度我覺得係 ok 的,均勻到膚色亦 cover 到 70% 黑眼圈 / 色斑,不過我就唔建議單用佢取代遮瑕膏,始終粉底質感咁透薄,估都估到用嚟遮黑眼圈 / 色斑 / 暗瘡會勁快溶,唔會太 long keep,所以瑕疵位另外掃少少遮瑕膏會更理想。

光澤感方面係澎湃到一個點! 😅

雖則感覺係唔黏膩,仲好貼面添,不過光到咁真係有啲嚇親自己 (真人睇仲光)! 勁似 skincare 廣告嗰種水光 feel,唔掃碎粉定妝絕對行唔到出街! (另一半見到直頭問我發生咩事 🤣) 


掃完碎粉定妝後,似返個人 →

不過佢質地咁潤澤咁光身,濕氣自然都會重,所以上碎粉時會特別沾到更多粉,會厚妝少少 (但就好有 flawless 無瑕感覺),建議等粉底乾返少少先好上碎粉,妝效會更自然。

持久度方面,以早幾日平均 25 度氣温 x indoor 計,約可 last 4-5 小時,唔算好弱,亦唔會全個妝溶咗,只係 T-zone 會出少少油,補返少少粉已 ok。

總括計我係推介呢盒 cushion 的,雖然係好光身有啲 over,但就的確好貼面好濕潤,極乾肌 / 成熟肌 / 沙漠肌秋冬用一流! (不過夏天都到了) 去開日本可以買定等秋冬用~


(下圖碎粉係用咗 SUQQU Natural Covering Loose Powder,即尋日介紹過嗰款 : http://isadoracheng.blogspot.hk/suqqu-review )




1 則留言:

  1. Nice sharing! 妝感好靚,下次去日本睇下有無機會試下先!

    回覆刪除