去日本必買嘅平價粉底? Shiseido 副線「INTEGRATE GRACY」2 款皇牌粉底 review

Shiseido 平價開架副線「INTEGRATE」化妝品，歴史悠久到陪伴大家成長咁滯，我 10 幾年前已經有用過佢嘅化妝品，應該唔少人去過日本 / 台灣旅行嘅人都買過~ 😊

而今次介紹嘅「INTEGRATE GRACY」雖然個名同包裝都同「INTEGRATE」相似，賣嘅嘢亦相差無幾，不過佢哋兩個專櫃 + 官網都係分開唔同的，估計「INTEGRATE」應該係主攻學生 / 年輕肌，而「INTEGRATE GRACY」則主攻 OL 市場吧?

其實兩者都係 quality 相當好嘅平價化妝品牌，唔知點解一直都冇進駐 HK，如果將來 HK 都有專櫃就好喇..... (部份 HK 網店應該會有水貨)

分享一下「INTEGRATE GRACY」2 款皇牌粉底嘅用後感 →

(上) White Liquid Foundation 美白保濕粉底 

(下) Moist Cream Foundation 保濕粉底霜

INTEGRATE 專櫃 / packing 係紅色 →

而「INTEGRATE GRACY」專櫃 / packing 則為深藍色，好容易分辨到 →

奇就奇在响日本逛過好多間藥妝店，發現「INTEGRATE」差不多間間都有，但「INTEGRATE GRACY」就唔係度度有.......

官網為日文，需用 google translate : 

https://www.shiseido.co.jp/ieg/

先介紹「White Liquid Foundation 美白保濕粉底液」→

能自然均勻膚色並遮蓋色斑，有效提亮暗啞膚色，帶來具透明感之長效亮白美肌妝感，具SPF26 P++ 防晒度，不含香料。

每支只約港幣 $86 / 25g，超級平! 😃

我見網上人人都係推介買玻璃樽裝嘅「Moist Cream Foundation 保濕粉底霜」，反而呢支 tube 裝「White Liquid Foundation 美白保濕粉底」就好少 review。

試過 tester 覺得都 ok，於是就買來 try try 了 😊

我揀嘅色號係 #OC 30 →

大家知日本底妝產品一向偏白，都係揀深色啲穩陣 😆

取名為 liquid foundation "粉底液"，但其實質地一啲都唔 "液"，反而係屬於杰身嘅 cream 狀 →

印上手都經已 feel 到遮瑕度係極高! →

用後圖 →

(只搽了粉底，冇搽遮瑕 / 碎粉)

雖然我揀呢隻 #OC 30 已經係 4 色之中最深色，不過實際搽上臉後一啲都唔算深，反而仲幾白淨吓添!

而遮瑕度直頭係強! 強到連我化慣妝都覺得有啲厚妝，不過只要份量減少返啲就冇問題了~ 基本上唔使搽遮瑕膏都已經 cover 到 9-10 成瑕疵，仲要賣到咁平真係好過份 🤣

妝效係屬於啞緻感 matte finish →

就算未掃碎粉定妝亦一啲都唔會反光，好啞緻清爽，亦算貼面，唯一缺點係 dry skin 連夏天用都會覺得有少少乾，但對於易出油嘅皮膚計就會好正~ 👍🏻

掃埋碎粉定妝 8 小時後 →

(中途冇補過妝)

個妝係勁到 8 小時後都冇溶過! 妝感完全 keep 到，一滴油都冇出過，亦冇變黄變色變暗問題， 勁呀! 👏🏻

不過始終支粉底本身質感係 matte finish 有啲乾，加上我又係 dry skin，所以鼻翼位 + 面珠毛孔位去到 4 小時左右就開始乾到浮粉了...... 連夏天咁熱都可以乾到浮粉，睇來唔多啱 dry skin 用......

不過油性肌夏天絕對可一試~

再試人人都讚嘅玻璃樽裝「Moist Cream Foundation 保濕粉底霜」→

細膩乳霜質地，配合透明質酸保濕成份，滋潤保濕美肌，能撫平修飾紋理並均勻膚色，妝感輕盈清透，具 SPF22 PA++ 防曬度，有 "平價版 cle de peau 粉底" 之稱~

每樽又係港幣 $86 左右，平到震! 😍

呢款因為較出名，HK 有啲水貨網店都買得到，約售 $138

乳霜 cream 狀質地 →

摸上手比上面剛剛介紹完嗰支粉底液更柔滑軟身，冇咁乾之餘仲輕薄啲~ 

我買嘅色號又係 #OC30 →

用後圖 →

(只搽了粉底，冇搽遮瑕 / 碎粉)

先講顏色，雖然同 tube 裝支粉底液同為 #OC30，但呢盒樽裝明顯係深色少少，搽上臉後有少少深咗。如果同我膚色差不多的話，建議呢款揀 #OC20 更好。

有比較之下，呢樽粉底霜嘅遮瑕度亦明顯比 tube 裝粉底液弱，但我反而覺得呢種妝感更 natural、更順眼、更輕身透薄，日常用已足夠有餘 ❤️

質感方面，呢款係比 tube 裝保濕好多，更貼面更適合 dry skin 用，不過搽完後就會有些少反光同濕潤，唔掃碎粉定妝出唔到街。

掃埋碎粉定妝 4 小時後 →

(中途冇補過妝)

始終係滋潤型粉底，以持久度計係冇 tube 裝啞緻粉底咁 long lasting，亦冇控油效果，就算開咗冷氣，大約 3 小時後鼻位已開始出油，整個底妝亦漸漸變薄，遮瑕力漸退，持久度唔算好理想 (冬天用持久度可能會好返些少)。

唯一勝在剛剛化起妝時幾靚吓、夠保濕滋潤、價錢又平咁樣，但如稱佢為 "平價版 cle de peau" 就有點兒多咗，只能話算係性價比高，可以一試咁樣。

比我揀嘅話，夏天我會寧願揀 tube 裝乾身少少嗰支啞緻粉底液，最多用時自己溝啲啲保濕精華一齊搽，至少持久度會 keep 得耐啲冇咁快溶妝 ☺️

如以我的 case 如果兩款都買咗的話，亦可以 mix 埋一齊用，取長補短~