日本人氣平價「Club Airy Touch Powder」空氣感蜜粉餅 review

粉餅我而家真係好少買......

一來 hk 天氣咁潮濕, 用粉餅定妝侷住皮膚易出油又易生粒粒, 妝感又較碎粉厚, 所以我都係慣用粉底液 + 碎粉。若以補妝計, 用粉餅固然係方便, 但買一盒都已經有排用, 既然我已有盒好好用嘅 SUQQU 粉餅, 就冇需要不停試其他了。

不過見呢盒日本「Club Airy Touch Powder 空氣感蜜粉餅」講到人氣超強 + 突破 100 萬個銷售額 + 有好多台灣 / 日本 blogger 熱捧咁樣, 加上售價唔貴, 又心思思想 try try 😆

最重要係呢款有 3 隻膚色揀, 仲有 tester 試, 唔使驚用後會太過白~

club Airy Touch Powder 空氣感蜜粉餅 →

質地滑順輕盈不厚重, 不僅能遮掩粗大毛孔, 還具保濕 + 遮瑕 + 控油效果, 更可提亮暗沉膚色, 改善乾燥感, 令肌膚看起來平滑細緻。具 SPF20 PA++ 防曬度

限量 Set 裝售價 $149 (一盒粉餅 + 紅色化妝鏡)

我係於太古城 Aeon 內買到的, 估計 log-on 之類都能找到

手繪圖案盒面設計確實係幾可愛 →

不過我呢啲姨姨年紀用又似乎 cute 咗啲! 反正打算收埋屋企用就冇所謂啦~ 😂

同埋個鐵盒估計用耐咗應該會氧化, 如能改用膠盒包裝會更好

另外盒粉裡邊本身並冇鏡, 如果帶出街補妝用就要帶埋塊紅色鏡, 有少少唔夠方便 →

附設嘅粉樸 quality 極好! 質地軟綿綿, 仲好過好多貴 brand →

而隔開粉餅同粉樸塊膠片就千萬唔好掉 →

否則個粉樸掂完塊面沾晒粉底 / 油脂咁, 冇膠片隔住直接放落去都幾唔衛生, 又容易滋生細菌...... 

不過其實用粉餅點計都係冇碎粉咁衛生的了, 始終碎粉係可以倒出嚟用嘛, 所以用得粉餅就要記住定期清洗粉樸喇~ 😉

顏色方面有 3 款膚色, 白盒係普通膚色 / 粉紅盒係白皙膚色兼帶閃粉粒子 / 黃盒屬深膚色。試過黃盒隻色都幾深, 連膚色深嘅人都用到, 比一般日本開架粉餅顏色選擇多, 唔係全部都偏白 👍🏻

我買嘅係白盒普通膚色 →

定妝效果 →

呢盒係屬於「乾粉餅」, 只作定妝 / 補妝用途, 並非可取代粉底液用嘅「乾濕兩用粉餅」, 所以我係搽好之前推介過嘅 Tom Ford Cushion Foundation 後先再用呢盒粉定妝。

顏色確實係好夾膚色, 好自然冇偏白, 感覺唔乾, 亦真係可以填平到毛孔, 有唔錯嘅覆蓋度同時又唔算厚粉 👍🏻

不過就始終擺脫唔到乾粉餅容易卡粉 / 浮粉嘅缺點, 係浮到想立即卸妝再化過, 遠睇以為成塊面甩緊皮咁! 😣

至於點解會卡粉浮粉??

䕶膚品 / 防曬霜 / 粉底唔多唔少都含有油份, 所以搽完面上一定會有油脂, 而當以控油為主嘅「乾粉餅」一接觸到面上油脂, 就會好自然地會將油脂包裹住, 於是就形成浮起嘅小顆粒了。

所以我都係 prefer 用「乾濕兩用粉餅」多啲, 至少能與油脂融合到, 無論上妝 / 補妝都更貼面~

若果經已買咗「乾粉餅」有呢啲問題, 又唔想掉咗佢可以點??

可以先去 SaSa 買個有網嘅塑膠碎粉盒, 再整碎自己盒粉餅倒落去, 改為用碎粉掃定妝, 咁就唔會嘥喇~ 😉