口罩下的控油修飾毛孔 base「韓國 April Skin💡Perfect Magic Face Starter」

而家每日都要長時間戴口罩, 可以唔化妝就盡量唔好化啦~ 又或者只化眼妝, 等皮膚休息一下, 化咗妝侷住都對皮膚唔好 😉

不過都明白有啲人係貪靚到戴住口罩都想化妝嘅...... 想個妝再持久啲乾爽啲, 控油 base 一定幫到手! 如我以前推介過嘅 NARS「Pore & Shine Control Primer 零毛孔控油妝前底霜」($370), 就係我用過最持久嘅控油 base, 不過乾肌用就會有少許乾。

如想控油之餘有返少少保濕效果, 同時又可 cover 毛孔紋理, 咁就可以考慮今次介紹呢支 April Skin → 

  

因為係保濕 + 控油每樣有啲, 所以論控油度必定不及 oil-free 嘅 NARS, 但對 dry skin 而言就比較合適。一般控油 base 因為偏乾都只適合夏天用, 而呢支就冇咁乾, 一年四季都能用, 我自己都覺得呢支啱用啲, 而且平啲 ☺️

就算唔化妝、剩係想預防出油都可單用, 不過搽咗並唔等於會完全唔溶妝 / 唔出油, 只不過就溶少一半, 持久度再長啲, 一定好過唔用咁解~ (用咗都要卸妝, 避免 block 毛孔)

韓國 April Skin「Perfect Magic Face Starter」妝前乳 →

含綠茶精油 + 玉米殿粉 + 北美金縷梅 + 冬柏花 + 蘆薈葉汁 + 綠茶葉 + 茶樹葉提取物, 有效修飾膚色 + 掩蓋凹凸毛孔 + 平滑細紋及粗糙紋理 + 吸收油脂, 增強妝容持久度, 並不會如一般控油 base 般乾燥。

屬低刺激性產品, 通過肌膚安全性測試, made in Korea

$149 / 30g @ 部份 Watson's 

April Skin 香港官網 (設網店下單) : https://www.aprilskin.hk

泵裝設計 →

望上去係膚色, 有點似粉底, 不過搽勻後並沒明顯顏色 →

質感輕柔軟稔, 容易推勻不卡粉, 冇一般控油 base 咁乾 →

 搽勻後雖冇明顯顏色, 不過都有極輕微調色效果 (真係勁少量) →

基本上近乎透明, 適合大部份膚色使用, 但如膚色勁白都係揀透明嘅 NARS 更好, NARS 仲有 SPF50 PA++++ 防曬度, 反而呢支就冇防曬。