KOSÉ Lotion Mask 平價面膜紙

大家知我係 "mask 精" 差不多日日敷 mask 啦~

之但係敷 mask 呢回事真係要講恆心，遇上較忙 / 較攰的日子未必有 mood 敷亦正常。就好似今期 2 個小朋友開學，我成個星期都冇乜雅興敷 mask，點知就出事喇..... 

塊臉乾到起晒粒粒，摸上手嚡熠熠凹凹凸凸，連平時完全唔會留意我塊臉嘅老公都問我攪乜?

即刻好緊張地敷返 2 日 mask 自救，又真係好返好多冇事喇喎! 塊臉係用行動抗議提醒我轉季要密 d 敷 mask，哈哈~

咁下下敷 paper mask 又真係好貴嘅，所以我都係夾雜 d 平價 mask / 貴 mask / cream mask 咁敷，而 "面膜紙" 亦係慳家選擇之一，優點係可以自己倒用開的精華水入去敷，又唔使怕有 d paper mask 唔知有咩成份會導致敏感~

面膜紙我都試過唔少，多數都係尖沙咀加連威老道 "龍城藥房" 買，係有試過好用嘅 (日本貨冇牌子)，不過你知 "龍城" d 貨成日轉，未必長期有啦，所以今次又試試 KOSÉ 呢款~

$35 / 每包 15 粒面膜紙 @ SaSa 

好用嘅面膜紙真係好難搵，一係紙質太 cheap 唔貼面，一係就剪裁太大好多位敷唔到......

最衰個下係所有呢類面膜紙都係壓縮形式封實，完全估唔到係咩質數 / 洞口有幾大之類，一定要買完自己試先知!

曾經用過 Menard "日本和紙面膜紙"，紙質係好正好貼面，但都會有少少位敷唔到..... 有時都會改用 cotton pad 敷，不過就好易甩，唔可以話 perfect。

唔知今次 KOSÉ 呢款效果又如何呢?~

打開後終於見到面膜紙真身，不過未濕水都未估到紙質 quality / 剪裁係點.....

倒入我自己的 Menard 健膚精華水，開始漲大 →

至於點解揀用 Menard 精華水，其實冇乜特別原因，每逢皮膚敏感我都係用呢支，貪佢舒緩過敏 / 泛紅 / 轉季預防敏感用效果好。

明明見精華水已經倒到粒面膜紙索唔入，漲大晒......

但打開後都仲係乾乾哋.......

唯有再加精華水份量

眼位洞口剪裁夠細，係好貼眼，不過個鼻同唇邊就.....

都明白係好難完美嘅，見佢咁平就算了吧。(不過個鼻真係好慘冇得敷 haha)

至於紙質..... 都真係好一般.....

算做薄同貼面，不過質地太 cheap 完全鎖唔到水份，敷 5 分鐘佢就開始變乾，唔夠 10 分鐘塊 mask 已開始想甩，要自己不停用手按住。

有幾多係吸收到入皮膚? 目測就唔多喇。

唉..... 又要繼續尋尋覓覓......