又回復單身

咁多年來除咗分享化妝美容事、share 吓小朋友相之外，私事我一向少提。對上一次公開去講私事，應該就係我 5 年前離婚嘅時候喇.....

雖然我並唔係咩公眾人物，但朋友多、識的人多，離婚咁大件事總要講一聲，免得日後各自組織新家庭時會令人覺得詫異、甚至被誤為係是但一方有婚外情之類、亦可以減少被問 "點解咁耐唔見你 post 你先生 d 相?" 等尷尬情況。

所以在情在理，我亦應該要公開講聲，對已分開的另一半有所交待，唔好阻人發展新生活、新感情。

回想當年離婚，曾經有好多 blog 友留言替我感到惋惜，亦感激大家俾咗好多支持我。嗰一年，我的確係捱得好辛苦，如果大家有睇開我個 blog 的話，亦應該知道我離婚嘅原因。期後到我再結識現任，亦有好多 blog 友留言替我開心，祝福我今次能夠揾到真正幸福。

只可惜我感情路從來都冇平坦過，原來想搵個夾得到嘅人平平穩穩過日子，都唔係一件易事。我估大家睇我近幾個月拍嘅 video，都留意到我屋企 background 唔同咗.....



今次分開大家考慮咗好耐，亦係我主動提出，並冇覺得太難過，反而認為對雙方都係一種解脫。既然已經長時間溝通唔到又分開瞓，硬要兩個夾唔到嘅人一齊生活，倒不如狠下心將大家都放生。

至於原因我就不多提了，大家知我從不愛背後說人閒話，只能說朋友同家人都好支持我分開，而雙方都不涉及第 3 者問題。

搬走咗之後，雙方對小朋友撫養方面都安排得好好，哥哥跟我，妹妹跟爸爸，每到 weekend 會過來住這樣。

而因為呢 4 年大家都冇 plan 過結婚，連婚紙都冇簽，所以今次分開亦冇第一次離婚時咁複雜、咁戲劇性，雙方傾好安排好就分開了。



講到呢度，可能會有人覺得我必定係性格唔好 / 好有問題，所以先會分完又分?

其實好老實講句...... 有邊個唔希望揾到一個愛錫自己、夾得到嘅人白頭到老? 結得婚又有邊個想離婚? 但人生就係咁，好多嘢唔係話你想就得，都要另一半肯配合磨合先得。有 d 人係好有福份，但亦有 d 人係要碰幾次釘先會成功。

雖然失敗過 2 次，但我對於未來感情事仍會有信心，唔會因為跌低過就認定自己必定會孤獨終老，唔會鑽牛角尖，但當然會比以前更小心選擇，就算遇上對的人亦冇諗過要再生小朋友了。

我知道有的 blog 友好好、會關心我、擔心我已有 2 個小朋友，年紀又開始大，怕我好難識到第二個....... 反而我自己就唔係好擔心，呢 d 嘢有就有、冇就冇，順其自然，都係急不來求不來，在對的 moment 自會出現吧?

感恩身邊一直有一班支持我嘅好朋友、家人、blog 友，陪我經歴過呢 2 段感情。响大家眼中可能係眨一眨眼的事，但計一計呢 2 段感情加埋不經不覺咁就過咗 10 年喇.....



另外唔知點解每次分開，都總會被估計係我有外遇。我想講我除咗返工就係返屋企，另一半會日日管接送兼手機定位，仲未計屋企同公司嘅 cctv，如果咁都可以有外遇真係神乎奇技。其實分開可以有好多原因?

5 年前離婚，對方家人一口咬定係我有外遇，離婚後相隔一年我再有新戀情，就同我講 "都話我哋估中咗係有外遇"，我已經覺得好好笑，唔通要我單身 10 年先叫做合理?......