2017年5月4日 星期四

又回復單身

咁多年來除咗分享化妝美容事、share 吓小朋友相之外,私事我一向少提。對上一次公開去講私事,應該就係我 5 年前離婚嘅時候喇.....

雖然我並唔係咩公眾人物,但朋友多、識的人多,離婚咁大件事總要講一聲,免得日後各自組織新家庭時會令人覺得詫異、甚至被誤為係是但一方有婚外情之類、亦可以減少被問 "點解咁耐唔見你 post 你先生 d 相?" 等尷尬情況。

所以在情在理,我亦應該要公開講聲,對已分開的另一半有所交待,唔好阻人發展新生活、新感情。

回想當年離婚,曾經有好多 blog 友留言替我感到惋惜,亦感激大家俾咗好多支持我。嗰一年,我的確係捱得好辛苦,如果大家有睇開我個 blog 的話,亦應該知道我離婚嘅原因。期後到我再結識現任,亦有好多 blog 友留言替我開心,祝福我今次能夠揾到真正幸福。

只可惜我感情路從來都冇平坦過,原來想搵個夾得到嘅人平平穩穩過日子,都唔係一件易事。我估大家睇我近幾個月拍嘅 video,都留意到我屋企 background 唔同咗.....



今次分開大家考慮咗好耐,亦係我主動提出,並冇覺得太難過,反而認為對雙方都係一種解脫。既然已經長時間溝通唔到又分開瞓,硬要兩個夾唔到嘅人一齊生活,倒不如狠下心將大家都放生。

至於原因我就不多提了,大家知我從不愛背後說人閒話,只能說朋友同家人都好支持我分開,而雙方都不涉及第 3 者問題。

搬走咗之後,雙方對小朋友撫養方面都安排得好好,哥哥跟我,妹妹跟爸爸,每到 weekend 會過來住這樣。

而因為呢 4 年大家都冇 plan 過結婚,連婚紙都冇簽,所以今次分開亦冇第一次離婚時咁複雜、咁戲劇性,雙方傾好安排好就分開了。



講到呢度,可能會有人覺得我必定係性格唔好 / 好有問題,所以先會分完又分?

其實好老實講句...... 有邊個唔希望揾到一個愛錫自己、夾得到嘅人白頭到老? 結得婚又有邊個想離婚? 但人生就係咁,好多嘢唔係話你想就得,都要另一半肯配合磨合先得。有 d 人係好有福份,但亦有 d 人係要碰幾次釘先會成功。

雖然失敗過 2 次,但我對於未來感情事仍會有信心,唔會因為跌低過就認定自己必定會孤獨終老,唔會鑽牛角尖,但當然會比以前更小心選擇,就算遇上對的人亦冇諗過要再生小朋友了。

我知道有的 blog 友好好、會關心我、擔心我已有 2 個小朋友,年紀又開始大,怕我好難識到第二個....... 反而我自己就唔係好擔心,呢 d 嘢有就有、冇就冇,順其自然,都係急不來求不來,在對的 moment 自會出現吧?

感恩身邊一直有一班支持我嘅好朋友、家人、blog 友,陪我經歴過呢 2 段感情。响大家眼中可能係眨一眨眼的事,但計一計呢 2 段感情加埋不經不覺咁就過咗 10 年喇.....



另外唔知點解每次分開,都總會被估計係我有外遇。我想講我除咗返工就係返屋企,另一半會日日管接送兼手機定位,仲未計屋企同公司嘅 cctv,如果咁都可以有外遇真係神乎奇技。其實分開可以有好多原因?

5 年前離婚,對方家人一口咬定係我有外遇,離婚後相隔一年我再有新戀情,就同我講 "都話我哋估中咗係有外遇",我已經覺得好好笑,唔通要我單身 10 年先叫做合理?......



37 則留言:

  1. 加油。。。活得開心就可以。。。你講嘅我全部同意!

    回覆刪除
  2. 你講得啱好,邊個結婚想離婚架吖!嘅然相處目標大家唔一致,我都會選擇離婚.加油!最緊要安排好小朋友,盡量減低對佢哋嘅傷害

    回覆刪除
  3. 加油!!我都离过一次婚,之后经历第二段被箍住嘅感情长达8年,直到我遇到现任嘅老公,我带著囡囡嫁俾佢,宜家一家三口过得好幸福。你也可以嘅!!!

    回覆刪除
  4. 睇到忍唔住眼濕濕添。。。加油丫Isa
    雖然冇同你真正接觸過你
    但follow咗咁耐你個blog
    感覺都好似好close嘅朋友咁
    原你幸福,找到對的人:)

    回覆刪除
  5. Add oil!! 你一定會找到你嘅幸福的!!

    回覆刪除
  6. Hi Isa, 你好。 你很堅強呀! 星期二見你的時候, 一點都看不出你正經歷人生的不快事 ! 你是一個開朗、漂亮的大好人, 相信你會有更美好的人生 ! 努力加油向前吧!前面有更美好的風景等著你呢!
    Amy NG

    回覆刪除
  7. 我有睇開你寫既BLOG...加油呀!!!

    回覆刪除
  8. 加油啊!難得妳面對人生的低潮/巨變,仍能保持樂觀及正面的態度及思想。希望妳同囝囝及囡囡都生活愉快。

    回覆刪除
  9. 唔緊要嘅!事情來得自然舒服就夠,大家都好支持你!加油喔!好好享受與孩子們的生活吧!

    回覆刪除
  10. Be Strong Isa, i'm here with you. We're all here with you and support you.

    回覆刪除
  11. Hi lsa
    我們好雙似嚟緊我開始面對你經歷的問題,希望可以開心度過快啲搵份工做照顧好小朋友!
    其實有邊個女人唔想要愛,想身邊嘅男人會關心自己對自己好! 唔通想 唔瞅唔睬漠不關心行到老咩!
    lsa 明白的,開心呀!加油呀!

    回覆刪除
  12. 加油, all the best!

    回覆刪除
  13. Hello, Isa
    加油啊~看了咁多年你的blog, 知道你每天都很努力。Be strong!!!

    回覆刪除
  14. 人生就是這樣,缘盡就要分開,大家都是過來人!加油,為工作爲孩子努力!對的人终會出現祝福你@@

    回覆刪除
  15. 幾年前,應該2013或2014,偶然睇到你的youtube教化妝,之後-直follow.... 要加油啊~祝福你和小朋友!

    回覆刪除
  16. Isa, 加油!真心祝福你能早日找到對的人,祝你幸福快樂!

    回覆刪除
  17. Hello Isa, 由yahoo已經跟你個 blog,5年前你離婚時, 我看到流淚. 香港地, 生活迫人, 好多女士有了小朋友就死忍, 好佩服你的勇氣, 祝福你, 永遠支持你的blog, 你公司就當然會繼續幫親啦, 加油,加油

    回覆刪除
  18. 加油!
    由好多年前已經追開你個blog,雖然中間有幾年無追🙊🙉🙈我覺得你好勇敢會公開俾人知你既status!
    我識好多人轉status都唔敢同人講....
    我相信你一定會搵到你既幸福!加油💪💪💪💪

    回覆刪除
  19. Isa,
    早幾年係blog到見到你提及你離婚, 睇到我眼濕濕. 之後見到你有新戀情, 亦好替你開心.
    而今日, 你有勇氣去為自己而努力! 祝福你, 期待未來的幸福!

    回覆刪除
  20. Isa ❤️ 你心地咁好,一定會找到屬於你的幸福的。祝福你 ��

    回覆刪除
  21. 鍊歷是成長的元素,人生最重要能找到人生價值和目標,打開心扉做好自己就夠。

    回覆刪除
  22. 你未有妹妹前已睇你blog, 好似睇住個認識既人咁
    加油Isa~

    回覆刪除
  23. 人生係要多經歷先有進步既,問心無愧繼續向前明天會更好!!撐妳,支持妳。

    回覆刪除
  24. Hi Isa! Have been reading your blog for a long time from Canada. I admire your courage to make this big decision and best wishes for u!!!

    回覆刪除
  25. 不經不覺睇你嘅blog已經十幾年了,加油!撐你💪💪💪💪💪💪💪💪💪💪💪💪💪💪

    回覆刪除
  26. 加油,我支持你。
    有次係新港中心見到你前夫拖住個大肚婆,果刻我以為認錯人,原來係真的。
    不過咁,我認為單身反而仲好,自由,無牽掛。

    回覆刪除
  27. ISA,你好叻!可以喻自己既興趣於事業,無意中起YOUTUBE睇到你既妝片,俾你爽朗唔虛偽性格吸引左而FOLLOW你....

    我目前都同你五年前一樣,經歷緊離婚,亦被前夫一家一口咬定我有外遇,真係好無奈。

    仲因為有眼無珠而嫁錯郎,搞到自己有抑鬱仲傻到諗埋一邊,而家仲要定期食藥睇醫生....睇到你呢篇BLOG我好感動,好像上天叫我撐住唔好放棄咁!我都好想可以好像你咁,俾最好既小朋友,加油,我支持你!

    回覆刪除
    回覆
    1. 有眼無珠嫁錯郎呢 d 嘢, 其實好多女仔都經歴過, 包括我同我身邊的好朋友們.... 如果勉救過唔 work, 與其死忍只係為咗唔想承受離婚呢 2 隻字, 例不如早日互相放生, 互相比個機會雙方去過新生活, 旁人講咩都唔需要理會, 懂你的愛你的家人朋友自然會支持, 前夫家人講咩更加唔使理, 始終冇人會承應係自己個仔有問題的嘛, 反正都已經 bye bye 咗唔使睇人面色, 而家自己開心振作就好,我支持你 ~!!

      刪除
    2. 經歴離婚心情唔好、會抑鬱呢 d 都好正常, 我都同樣經歴過, 只係我會寄情工作 / 湊仔 / 寫 blog, 同不停揾 d 好朋友傾計, 慢慢就會習以為常解開心結了, 呢個世界除咗感情仲有好多嘢等你去發掘, 要加油呀~ 你並唔係唯一, 祝福你~

      刪除
    3. 謝謝你!最近見你IG公佈婚訊,真的好替你高興,在茫茫人海中能找到對方,一齊並肩攜手行以後既路,真的不容易。我也衷心祝福你:百頭到老,永結同心!我們會一直支持你的(笑)

      刪除