臨近轉季，好多品牌都陸續推出新粉底~
不過見出得最多好似都係 cushion 粉底? Shiseido / Armani / YSL 等等好多都係出 cushion。好彩我都係氣墊粉底 fans，正中下懷喔~
3 款我都好想試，但面就得一塊，正好前日 out job 完行去搭車經過 YSL，就先買住 YSL 試試吧~ 反正早排游完幾次水曬黑咗嘛，屋企啲粉底顏色全部唔啱用，大條道理買新粉底 yeah! 😆
TOUCHE ÉCLAT LE CUSHION
明彩透亮氣墊粉底
為 YSL 首款推出可隨心調控光澤及遮瑕度的氣墊粉底，以尖端的微網織技術打造氣墊網層，令每次釋出的粉底份量恰到好處。配方含多種明彩粒子，時刻保濕，亦能呵護肌膚。
SPF50 PA+++ 防曬度
$480 粉底連盒 (共 4 色選擇) @ https://www.yslbeauty.com.hk/tc/
外型上的確冇得輸，鍍金粉盒有型又貴氣! 防曬度又夠高 👏🏻
不過就真係唔算平，以 YSL 粉底平常 around $500 價位，但起碼都有 30ml 計，呢盒價位相同但就只得 15g，而且冇 refill，感覺上係貴咗。
打開睇個氣墊網層直頭靚到呢!~ 😍
設計如同 lace 網紋一樣，印有 YSL logo
當粉底滲出後，logo 紋理就更加清晰可見 →
除咗靚之外，個 "微網織氣墊網層" 亦好實用 →
就算唔小心大力咗壓落去，都唔會有太多粉底滲出，份量易於控制~
而且就算將盒 cushion 倒轉放 / 打側放，都唔會有粉底漏出 👍🏻
不過我就略嫌個網每次釋出的粉底份量係 "太過恰到好處"，要沾好多次粉先化完全塊面，真係化到蚊瞓...... 😂
以我呢啲鐘意 "三爬兩撥" 就上完個粉底嘅人來說，真係會嫌佢每次出得嗰少少份量係有啲慢，要大力少少壓落去先會沾到多少少粉底.....
但呢啲都只係個人喜好，唔算係盒 cushion 嘅缺點~
另外亦略嫌佢 size 有點巨，實物比圖片感覺更巨 →
放响屋企用當然無所謂，但如果攞出街補妝用 / 去 trip 用就唔係太方便......
不過 size 都唔係重點，最緊要都係個粉底好唔好用啫，睇埋落去先決定~
Btw 今次附設嘅粉樸的確係好有 gimmick，採用咗獨特嘅 "雙重物料設計" →
有半邊係 "纖維絨面" 質地，另外半邊係普通氣墊粉樸質地。
以官方所指，如用普通氣墊粉樸那邊上妝，效果會較自然 ; 如用 "纖維絨面" 那邊上妝，妝效就會更細緻無瑕。於是就算係用同一盒 cushion，都可隨心造出不同妝感了~
另外也可以先用普通氣墊那邊印個淡妝，再用 "纖維絨面" 那邊局部印上面頰 / T-zone，去加強光感 + 遮瑕度的~
我的色號 #B30 →
YSL 粉底我以前一向用開 #B20，但游完幾次水曬黑少少後，膚色已轉為用 #B30
先試用 "普通氣墊" 那邊上粉 →
用 "普通氣墊" 那邊上一層粉底效果 →
如用 "普通氣墊" 上粉，係無論你印幾多層佢都係同一厚度，效果比較淡薄，輕微均勻膚色係可以，但就唔係遮到太多瑕疵，略嫌 coverage 太低.....
另外由於粉底本身唔算太濕潤，毛孔同乾紋都現晒形，化完仲衰過未化，慘不忍睹...... 😰
雖然個心滴晒血覺得浪費咗 $480，不過都決定俾多次機會佢，試多一日先......
第 2 日我嘗試改用 "纖維絨面" 質地那邊上粉 →
用 "纖維絨面 "那邊上一層粉底效果 →
嘩~ 好好多~~ 似返個人 🤣
比較起上圖，用 "纖維絨面 " 呢邊上妝膚質會更平滑，修飾毛孔效果更好，遮瑕度亦比較高，可以 cover 到大部份瑕疵，效果較合心意，同上一幅圖簡直係天同地比!
但都係解決唔到乾嘅缺點，雖然自己 feel 到嘅感覺係唔乾，但望上去啲乾紋就現晒形，仲差過唔化妝嗰陣，尤其係笑紋位 + 唇角位簡直係重災區! 鼻翼亦只係勉強過關.....
雖然我本身皮膚都係乾，但如果連夏天咁熱用都咁嘅樣，秋冬我唔敢想像.....
所以認為佢對撫平乾紋係零幫助，反而仲惡化咗......
另外持久度方面亦係一敗筆，2 小時過後就已經溶咗一半 →
尤其係鼻翼 / 鼻底 / 唇邊 / 面頰毛孔位，未夠 2 個鐘就開始出油，控油度比較差......
有趣嘅係，可能因為佢妝效唔厚 + 乾，出完少少面油之後反而仲好啲，變得冇咁乾，望落更貼面自然，而且仲分別有 2 個人問過我 "你而家係有冇化妝?" / "用緊咩粉底咁 natural?"，都唔知好嬲定好笑~ 😂
結論係 : $480 咁貴，效果又唔算太好，唔買好過買
下一盒想買嘅係 Armani cushion，等星期一返工時去睇睇先~
Hi Isa,可否試埋NARS, MAKE UP FOREVER 嘅cushion 呀
回覆刪除Hi Isa,
回覆刪除我買了chanel cushion 用, 當時sales 叫我配盒碎粉就ok.因為佢話cushion 本身on top不用塗任何野。
但每逢lunch 後我眼袋位置甩妝溶妝嚴重...
是因為cushion不適合我? 我是混合皮膚。
如果我用完cushion on top 塗粉餅, 是否又多此一舉?
你有什麼意見可以比我?
謝謝解答。