懶人卸妝寶貝?「banila co. Clean It Zero 緻柔卸妝膏」

我諗呢樽 banila co. 皇牌卸妝膏好多人都用過了，實在太出名~

價錢平之餘，又夠方便可一次過卸妝兼潔面，唔使另外再用洗面膏洗多次面喎，勁慳時間!

但實情又係咪真係咁好用??

雖然佢唔係咩新產品，都做次詳細 review 分享吓先~

用緊佢嘅記住一定要睇呀~~ 😉

banila co. Clean It Zero 緻柔卸妝膏

以 "油包水膏" 原理研製，遇體温即溶解變為 "水油狀"，能溫和及徹底溶解各類化妝品 (包括防水妝品)，深層清潔肌膚去除毛孔污垢，同時具美白 + 保濕滋潤效能。質感不油膩零負擔，不堵塞毛孔，適合任何肌膚，敏感肌亦可使用。 

除咗有呢盒粉紅色經典款外，另外仲有為敏感肌 / 油性肌而設嘅配方，更有美白款可選擇。

使用方法: 

以附設的膠棒刮出約 1 毫子大少少份量，乾手 + 乾面打圏按摩至化妝品溶解，再用溫水洗面 (遇水即乳化)，無需另外用其他洗面產品洗多次面。

$88 / 100ml @ sasa

貼心在有附設刮棒，唔使用手指直接刮落個卸妝膏，而蓋上亦有存放刮棒嘅位置 →

呢個設計係好 good 👍🏻

你知啦，如果冇呢個位，支棒都唔知放邊好，求其放又唔衛生，咁細支又易整唔見

初開時係密封包裝，感覺衛生 →

以前已提過卸妝一定要用含油份嘅卸妝產品，無論係卸妝膏 / 卸妝油乜都好，總之一定要用含油份的! 因為化妝品佔大部份都含油，而油份具抗水性，所以用卸妝水係未必溶解到所有妝品，只有 "以油份溶解油份" 先可以真正徹底卸到妝。

但基於部份人係對卸妝油過敏，一用就生粒粒 / 爆瘡，所以冇辦法之下就只能用卸妝水了。如果你唔屬於呢類皮膚的話，有得揀我就會建議你揀卸妝膏 / 卸妝油更好 😊

不過有得揀都要識得揀，要知道自己用緊啲咩呀~

Clean It Zero 用後感 →

的確係可以用 "快靚正平" 形容。單係一次過卸妝潔面，唔使另外再用洗面膏洗多次面呢吓，已經好快捷方便，而且質感冇 cleaning oil 咁油膩 (唔係完全唔油，只係冇咁油)，對討厭油膩感嘅人係唔錯嘅選擇。

卸妝效果我覺得係夠乾淨的，基本上卸除眼妝 / 防曬 / 底妝 / 胭脂 / 唇妝係好 ok，但 mascara 就窄少少喇，建議只在化淡妝時使用。過完水洗面後會有種好保濕滋潤嘅感覺，肌膚紋理飽滿度亦有提升，外加一種健康光滑感，確實係幾好 feel!

不過呢種滋潤感當然未必人人 like，會有種俾一層膜罩住嘅感覺，覺得好似洗唔乾淨咁。另外 "綠色盒清爽款" 我都曾經用過，係比呢款粉紅色盒經典款爽身少少，但都未至於話超級清爽。

真係唔使再用潔面 product 洗多次面??? 🤔

我用佢時試過真係冇再用其他潔面品，都覺得係夠乾淨的，亦冇因為咁而生粒粒 / 爆瘡。不過感覺上洗完面就會有層膜罩住，加上成份其實除咗有 2 種易致敏防腐劑、石臘、礦物油之外，仲有色料添加，所以一係唔好用，要用就務必用潔面品洗多次面!

最好都係唔用啦..... 😬