呢套 Benefit...... 話說有日响街等咗朋友 20 分鐘都未見人，而成條街除咗餐廳就只得一間 Benefit，本身只想走入去涼個冷氣，點知出返嚟手袋內就多咗幾件化妝品 😆
Benefit 嘅化妝品以前都有用過，底妝品 / eyeshadow primer 真係一般般，而其他化妝品响我眼中亦唔係特別鍾意、但又並非討厭嗰種，今次買佢純絮係因為鍾意佢有 mini size (個人對所有 mini size 嘅妝品係零免疫力)~
左至右 →
dandelion twinkle 蒲公英閃亮胭脂蜜粉 (光影粉) $150
新出 GALifornia 陽光女孩蜜粉胭脂 $150
gogo tint 櫻桃胭脂水 / 唇液兩用 $120
就咁睇光影粉同胭脂粉好似唔算平，但因為裡邊附送埋 mini 羊毛化妝掃，唔算太細支 quality 都 ok (至少唔甩毛同刺面)，所以計落又唔係咁貴~ 😊
Benefit 官網 : https://www.benefitcosmetics.com/hk/zh-hant
胭脂粉係有加入西柚 + 雲呢拿香氣的，而光影粉而有添加蒲公英香氣，不過兩盒香氣都係好淡唔太強 (太香我反而唔鍾意)，都幾好聞唔刺鼻~
「GALifornia 胭脂」係屬閃橙色 (不過實際掃上面唔係好覺閃)，設計靈感源自加州滑浪女孩形像，有如加州陽光般嘅溫暖氣息，最啱夏天用~ 而橙色胭脂比起粉紅色更能掩蓋面頰斑斑色素，令瑕疵冇咁顯眼，啱晒我 🤗
至於盒「dandelion twinkle 光影粉」除咗可以就咁當 highlight 用，佢仲話係採用特製嘅粉餅製作技術造，質地透薄輕盈，可以當粉餅定妝咁話....... (但當粉餅用好似閃咗啲喎?)
而支超迷你 4ml「gogo tint 櫻桃胭脂水」就可當胭脂水 / 唇液兩用，我以前亦用過佢嘅「bene tint 玫瑰胭脂水」，都係一樣嘅嘢只係唔同色。雖然話係 "擦拭防吻不脫色"，但其實都係會脫色的，只係冇普通唇膏咁易甩色咁解~
另外盒「foolproof 雙色豐盈眉粉」$230 →
除咗係一盒雙色，有 3 款顏色選擇外，仲係 12 小時持久不脫妝配方，能緊緊黏附於皮膚及眉毛上，將稀疏眉毛變成立體濃眉。眉頭淺色 / 眉尾深色擺位設計確係方便化妝新手，照住掃上眉冇失手~
個盒仲好靚吓添! 😍
附設嘅眉掃亦比較特別，一般眉粉組合係採用纖維斜角眉掃，而呢盒 Benefit 就係用海綿掃 (另一邊係螺旋刷)，對於唔識畫眉嘅新手嚟講又係會更易操控~ 👍🏻
* 眉粉只為有眉毛的人作補色用途，如果冇乜眉毛就要用眉筆了
光影 + 胭脂 + 眉粉 + lip tint 效果圖 →
光影粉屬微微光澤感，效果自然得來、又唔會弱到掃咗好似冇掃過咁~ 未買剛剛推介過嘅 BECCA 光影粉之前，我最常用嘅就係呢盒 Benefit~ (不過而家新歡已變為 BECCA)
胭脂係勁出色! 一掃得多就會好橙好恐佈，如下圖般只掃少量已足夠，具淡淡健康氣息又唔會勁橙，望上去 natural 又精神 😊
Lip tint 就唔覺得特別滋潤或特別持久，雖然搽上當刻係 feel 到濕潤度，但隔 5-10 分鐘好快就變乾，屬霧面妝感，再隔多陣甚至會覺得乾，隨後再搽多次 lip balm / lip oil / lip gloss 會更好~
而眉粉就冇乜特別，都係一般眉粉咁囉，但就真係比其他牌子持久、冇咁易甩色~
總括計都係盒光影 + 胭脂值得試多啲~
沒有留言:
發佈留言
注意：只有此網誌的成員可以留言。