韓國 Dr.G「Sun Code 防曬套裝」3 款防曬用後感

今個夏天陽光係超猛烈! ☀️

就算只係行出街一陣，太陽曬落嚟都 feel 到辣肉呀! 你話唔日日搽高效防曬又點得呢? 記住剩係搽面都未夠，最好連手臂 + 膊頭 + 後頸 + 心口都搽埋先夠穩陣~

之前都介紹過 Jan Marini、Shiseido、GOONGBE 幾款防曬俾大家，今日就介紹埋韓牌 Dr.G 嘅 3 款防曬有咩分別啦~ 😎

亮白修護防曬乳 SPF50 PA+++ (左邊橙色) →

具美白配方，並有效調整改善膚色，提升肌膚透亮度，質感透薄清爽，高度控油，能阻隔 UVA、UVB、微塵及污染物對皮膚侵害。(非全物理性防曬)

呢支雖然話係高度控油，但我用過就唔多覺有控油效果，反而仲覺得佢幾潤吓，兼搽後有種反光感 😅

至於調色效果係只屬輕微，係有少少白淨透亮咗 (反反哋光咁)，但就唔會均勻到膚色。以防曬霜計係不過不失，只要唔奢望佢控到油就 ok，唔覺得佢特別適合 summer 用，秋冬可能會更合適。

礦物高效防曬乳 SPF50+ PA++++ (中間) →

為 100% 物理性防曬安全溫和配方，符合美國環保組織 EWG 綠色驗證，以二氧化鈦、氧化鋅反射紫外線及藍光為主，不含 Parabens 防腐劑 / 礦物油 / 色素 / 香料，敏感肌亦適合使用。

呢支係 3 支之中質地最清爽的! 最適合油性肌 / 混合偏油肌夏天用~ 👍🏻

不過以我 dry skin 為例，就覺得連夏天咁熱用佢都覺得乾，就算已搽 2 款精華 + 面霜打底都仍然 feel 到繃緊，所以就將佢改為用來搽手臂 / 膊頭作 body 防曬了。

深層保濕防曬乳 SPF50+ PA++++  (右邊) →

補水配方，質感水潤，能於皮膚表面形成保護屏障，保護皮膚免受紫外線傷害，特別適合缺水乾燥肌膚，同時具抗衰老效用。(非全物理性防曬)

雖然呢支係有少少滋潤，但並唔係太油膩，亦唔厚杰冇黏稠感，其實 dry skin 夏季都用得到(油性肌就可以秋冬用)，如果夏天用佢就可以 skip 日霜了，搽完 toner 及 serum 直接用呢支防曬已夠保濕度~

再比較吓售價 (sasa) →

Set 裝係 $248，共 3 款每支 20ml 

而單買 50ml full size 每支係 $192 - 240 不等 (見下圖)

價錢上分別其實不大，計落 set 裝亦冇特別抵咗，只不過就可以一次過試晒 3 款咁啫~

我就認為都係重點出擊揀一支啱自己膚質的更實際! ☺️

(trial product given by sasa)