Makeup Secret: 孕婦可以化妝 / 染髮 / 整 gel 甲 / 做 facial / 整睫毛嗎? 🤰🏻

自從公佈有咗 BB 之後，我諗我 Facebook 收得最多嘅問題就係「孕婦可唔可以化妝 / 染髮 / 整 gel 甲 / 做 facial / 做 treatment / 整睫毛?」

始終孕婦都有正常社交生活、都要見人、都想靚嘛! 🤰🏻

回想 10 年前生第 1 胎、 5 年前生第 2 胎嗰陣，我除咗化妝之外真係乜都唔敢做，攪到個人跌晒 watt，成個黃面婆咁..... 不過而家嘅準媽媽就幸福好多喇! 科技發達，孕婦好多嘢都有選擇~

今日就一次過解答各位準媽媽吧~

孕婦當然可以化妝，都不知幾多孕媽有經常化妝添~ 💄

其實好多婦產科醫生 + 美容導師都講過，化妝品份子較大，能入到肌底再入埋血管影響胎兒嘅機率係微乎其微，所以我都照化可也，只要唔好揀 quality 太差、或驗出有水銀 / 鉛 / 重金屬等嘅化妝品就 ok~

想再安心啲亦可以用有機天然 / 無添加的化妝品，例如:

咁 facial / treatment 做得嗎? 💆🏻

普通保濕清潔 facial 係可以做，只係唔可以用有果酸 / 水楊酸 / 蘆薈 / A 酸 / Q10 / 對苯二酚等成份用料，亦唔可以按穴位，同埋唔可以做任何有電流嘅機，連屋企嘅導入導出機 / 瘦面電流機都唔用得。

至於打 laser / botox / 透明質酸 / HIFU / RF / 蛋白線埋線 / 微針 / 矽針 / 駐顏粉底之類，就全部唔得喇 ❌

植睫毛呢? 👁

依醫生所講，經由毛髮入到皮膚、再入到血管而影響胎兒嘅機率幾乎係零咁滯，植睫毛嘅膠水只要不觸及眼皮係可以的~

但孕睫術 / 飄眉 / 紋眼線 / 水晶唇 / 脫墨脫疣等等就唔做得了 ❌

孕婦原來都可以染髮? 💇

以前就話唔得啫，但而家科技發達，好多婦產科醫生都話只要過咗 3-4 個月胎兒穩定後，其實染髮都 ok，但最好睇清楚成份，建議用成份安全、冇化學物嘅天然有機植物性染料，再加上染時避開頭皮就 ok~

Radico 有機染髮霜 →

由 100% 有機草本植物製造，獲全球最俱權威國際有機認證公司 ECO-CERT 及 USDA 認證，為真正有機天然染髮劑，絕無添加化學成分，於種植植物時亦無使用化肥及農藥。不含防腐劑、阿摩尼亞、過氧化物、二噁烷、致敏甲醛、苯二胺及苯二酚，100% 安全可靠。

但染時都幾麻煩吓，要自己加水溝佢嗰包草本植物粉，而且因為冇 chemical，上色時間會比一般染髮霜耐，要染足 1 小時，仲要搽到好 "呢 hea"......

不過上色效果都唔錯，而且不傷頭髮又安全~

約 $178 @ 萬寧

Radico 網站: https://radico.store/

如果唔想自己响屋企染咁麻煩，仲可以去 salon 染全球知名嘅「意大利 OWAY 天然有機染髮」💈→

好多 salon 都有提供 "有機染髮服務"，我屋企附近仲只收 $138 添! (平到有啲驚唔敢染) 但就要問清楚有機成份有冇認証 / 係咪真係冇添加化學物 / 溝色過程會唔會溝其他非天然嘢入去等等。

而意大利「OWAY 天然有機染髮」用料係已測試証明為孕婦 / 產後哺乳期都可安全染，並不會影響胎兒，比較安心，我都有染過~

不過 OWAY 始終稱得上係 "髮品界林寶堅尼"，用料成本當然貴好多，而且染髮過程步驟亦多，染前染後仲包埋做天然有機 treatment，唔係間間 salon 都有得染。

我的及肩長髮染 OWAY 約 $900 (長髮可能要加錢) @ Green Touch Salon

尖沙咀金馬倫道 18-20 號 Mangan Building 1/F B 室 (Tel: 2877 3068)

孕婦可以整 gel 甲? 💅🏻

當人人都以為孕婦唔可以整 gel 甲嘅時候，反而我問過 3 位婦產科醫生都話可以!

但當然亦會有保守啲嘅醫生話唔可以啦，通常會叫你咩都唔好攪就最好添，不過孕婦搽指甲油就真係唔可以了!

但坊間其實亦有指甲油係孕婦可用的，如呢款美國「Zoya」→

部份甲油專門店都有售，約 $90-100 支

希望今次嘅分享幫到各位貪靚準媽媽啦~ 😄

Makeup Secret