NARS 新出「Aqua Glow Cushion Foundation 水感透亮氣墊粉底」review

NARS 上一個首次推出嘅 cushion 粉底我都有試, 不過就嫌佢乾身咗啲唔啱我用 (屬控油效果), 今年終於新出咗保濕版 cushion 喇! 仲有限量新年粉盒可以配添~

去專櫃試過質地又好似真係幾保濕, 遮瑕高仲要好高! 即刻買返屋企慢慢試~ 😍

產品資料 →

Aqua Glow Cushion Foundation 水感透亮氣墊粉底 (SPF23 PA++) 

為亞洲限定版, 韓國研發及製造, 集補濕、抗污染、長效持久多效於一身, 配方加入多種抗污染及護膚成份, 有效抵擋水份流失, 保護肌膚免受環境污染。質地水潤清爽, 提供中度遮瑕效果, 可視乎需求疊加使用加強遮瑕度, 同時提升肌膚質感, 達至明亮柔嫩的完美底妝。

單個粉芯 $300 / 粉盒 $110 @ NARS 

http://www.narscosmetics.com.hk

勁鐘意紅黑色配搭, 夠型呀! 💓

農厝新年用紅色亦好有意頭~~ 

至於粉底棉芯設計上就冇乜特別, 同一般 cushion 粉底同樣 →

粉樸質地亦算柔軟, quality 唔錯, 好過普通 cushion 粉底, 但就冇 Tom Ford cushion 個粉樸咁軟身 →

共 6 色選擇, 我買嘅係 #ALASKA →

去親個個牌子專櫃買粉底, sales 哥哥姐姐都偏好幫客人揀淺色, 怕客人買咗返去覺得深色咗攞返去換 (我理解嘅), 於是通常買完返去搽上面就會白雪雪同條頸兩截色......

所以我習慣會揀深一號試埋比較過先買, 揀比膚色深少少嘅 foundation 遮斑 + 遮黑眼圈效果特別好, 膚色望上去亦冇咁蒼白~ 😉

印上粉底後 →

就算唔搽 concealer 遮瑕度都好高! 仲高過早幾日介紹過嘅 Tom Ford cushion 粉底! 真係乜瑕疵都 cover 晒, 完全係 full coverage! 毛孔 + 細紋亦撫平到少少 👍🏻

遮瑕度係強到沾少少粉已經好足夠, 所以真係要就住份量印上面, 否則會好厚粉~

至於保濕度我覺得同 Tom Ford 嗰盒係差唔多, 又係唔叫滋潤, 但又未至於乾嗰種, 屬夾於兩者中間, 至少感覺貼面冇卡粉 / 浮粉問題, 亦唔會覺得乾到繃緊。

以現時冬天乾燥天氣 x 我 dry skin 用尚可接受, 但一定要加保濕 base 或防曬打底 (反正佢得 SPF23 防曬度唔算高)。

掃埋碎粉定妝之後 →

呢盒冬天用可以掃少啲碎粉, 否則會覺得妝效太啞緻。

直頭覺得佢嘅保濕度 + 妝效 + 搽上面嘅感覺都同 Tom Ford 嗰盒勁相似, 但 NARS 呢盒遮瑕度就再高啲...... 

出到街再睇 →

隔咗 4-5 個鐘都冇溶過妝, 只係黑眼圈 + 面頰斑斑位有少少甩咗 (冇搽過遮瑕膏), 都算係好持久, 直到 8 小時收工後其實都冇點溶過妝~

不過又咁講, 通常質地唔太潤嘅粉底都會特別 long lasting 的, 比起潤身粉底更能抓實皮膚唔會跣粉嘛, 所以針都係冇兩頭利, 若果 dry skin 嫌呢盒 NARS 唔夠潤, 都可以自己用保濕 base 打底 / 化好妝再噴上保濕 spray~

整體計對佢都好滿意, 唯一係唔知係咪今期用得美白 skincare 多, 加上又打過 laser, 攪到塊面白過條頸, 似乎買深一號粉底色都係未夠, 下次要買深兩號! 😆