話說人愈大化妝就愈懶, 而 cushion 粉底唔單止防曬度高, 仲可以好快手地印幾印就上完粉, 方便好多! 所以我而家幾乎每日都係用 cushion, 啲支裝 / 樽裝粉底唔覺唔覺已經擺埋一邊了~
上次試 Shiseido 氣墊都有講過話冬天用有啲勉強, 剛好用開嗰盒 Armani 氣墊又見底, 大條道理襯星期日放假抱埋呀 B 去化妝專櫃放血! 🤣
官方產品介紹 →
Traceless Touch Foundation Satin-Matte Cushion Compact (SPF45 PA++++)
革命性清新輕盈質地配方, 蘊含強效保濕營養成份, 賦予肌膚滋潤絲緞霧面效果, 能中度完美覆蓋肌膚, 同時能隱沒臉上油份、毛孔、粉刺及皺紋, 長時間不變暗沉或結塊, 更可預防水份、潮濕天氣、汗水影響妝容, 讓肌膚透現自然光采。
$370 (單個粉芯) / $250 (粉盒) @ Tom Ford 連卡佛專櫃
粉盒以深啡配金邊設計, 盒面印有 Tom Ford logo →
而開關位置係採用比較特別嘅「磁石開合」設計, 所以並冇開關掣 →
粉樸質感要讚一讚! →
係比一般氣墊粉樸柔軟好多倍, 印上面時特別舒適, 兼更能緊貼面型弧度 😍
共 8 色選擇, 我買嘅色號係 #4.0 FAWN →
始終係外國 brand, 粉底顏色都偏白, 我已經特登揀比 sales 哥哥推介嘅色號再深一號, 返到屋企再試都仍然覺得係白咗丁丁丁點, 但只要唔曬黑的話都勉強 match 到膚色, 至少未至於白到似面具先~ 😅
上完粉效果 (只印上了粉底) →
呢盒 cushion 粉底 Tom Ford 教嘅用法係以粉樸「塗抹」上面, 即好似搽普通粉底液咁, 而非一般 cushion 咁「印」上面.....
但我試過就覺得咁搽法會偏薄, 所以我係全面「塗抹」一次均勻咗膚色後, 再局部於有瑕疵位置「印」多一層粉底做重點遮瑕。
上粉後遮瑕度都算好高呀! 均勻到膚色之餘, 仲連黑眼圈 + 泛紅色素 + 斑斑全都 cover 到! 而且粉質亦好貼面, 冇卡粉 / 浮粉問題, 而毛孔同細紋都撫平到少少~ ❤️
至於保濕度都算夠但並非太高, 唔屬於滋潤級數但又未至於覺得乾嗰種, 正正就係佢描述所指嘅 semi-matte 絲緞霧面效果, 建議皮膚乾嘅人冬天用最好搽定保濕 base 打底會更 perfect~
掃埋碎粉後 →
由於粉底質地本身唔算好潤, 於是掃埋碎粉定妝之後就覺得有些少乾了, 用佢都係掃少啲碎粉更好~
出到街再睇 →
底妝效果的確係好 perfect, 冇搽遮瑕膏、單用粉底嚟做遮瑕 coverage 都好高, 同時又唔覺得厚粉! 好滿意呀~ 👍🏻
持久度以而家冬天計幾乎全日都冇溶妝, keep 得好好, 但至於係咪可以抗汗水同抗潮濕呢點, 冬天就暫時未試到喇, 不過 so far 都好滿意, 認為貴得來都算值回票價~
沒有留言:
張貼留言