Armani 春夏新出「POWER FABRIC 持久零瑕粉底霜」review

近日所有 Armani 廣告都係 promote 緊呢盒新出粉底霜, 主 sell 高遮瑕度 + 持久遮瑕 + 輕盈貼服, 係皇牌 Power Fabric 粉底液嘅「膏狀版」。

以前都拍片推介過 Power Fabric 粉底液係好好用, 今次同系列推出粉底霜喎, 當然好有興趣想試啦! 加上為咗攞泊車優惠總要揾件嘢消費下, 諗都唔使諗即刻衝去 Armani counter~~

試過 tester 覺得幾 ok, 於是就為振興 hk 零售業出咗一分綿力 🤣🤣🤣

就係呢個廣告喇 →

巴士車身 + Sogo 門口經常見到~

產品資料 →

POWER FABRIC High Coverage Foundation Balm 

持久零瑕粉底霜

獲獎無數的 Power Fabric 粉底系列再創新猷, 推出劃時代全新產品「持久零瑕粉底霜」, 延續最強底妝力量, 打破厚妝定律。

創新膏狀粉底配方以獨特「雙重轉化質感」研製, 一抹瞬間轉化為乳霜質感, 一觸肌膚即轉化為柔滑粉末, 令肌膚觸感極緻細滑啞緻, 如粉底般持久遮瑕, 如粉餅般輕盈清爽, 即使層疊塗抹亦輕盈貼服。 

持久遮瑕 : 高度遮瑕, 完美柔焦任何瑕疵, 瞬間隱形毛孔 

長效啞緻 : 能即時及長時間保持清爽輕盈, 控油抗汗, 全天候不脫妝  

獨特設計專用粉撲 : 水滴型設計能輕鬆用於臉部任何角度及細微位置, 上妝均勻薄透 

本身出咗 8 隻亞洲專屬肌膚色, 不過因為太新, 上星期買嗰陣 counter 仲未齊色, 只得 2 隻色揀, 連 tester 亦未齊, 問 sales 姐姐都話唔知幾時返貨, 不過我估應該都好快嘅 😊

本來我只係想買 refill, 因為屋企都有個用完嘅 Armani 氣墊粉底盒, 應該 fit 位裝到落去, 不過佢暫時未有 refill 出售, 一定要連鏡盒一齊買, 咁冇辦法啦.....

$590 @ Armani 專櫃

https://www.giorgioarmanibeauty.com.hk/zh_HK/home

望上去粉底表面係極度平滑, 抹花表面嗰層之後就可以見到佢係濕濕哋嘅膏狀 →

其實 Armani 十幾年前都曾經出過類似嘅粉底膏, 我都有買過, 質感比今次呢款更薄更濕潤, 後來唔知點解 discontinue 咗, 可能係粉底膏於當年比較少人買?

我買嘅係 #3.5 號色 →

Armani 粉底我平常係用開 #5 或 #5.5 號 (視乎系列), 但呢盒新粉底係比佢平時嘅 foundation 顏色偏深同偏黃, 所以 #3.5 我都啱用~

試上面睇 →

可以見到 coverage 的確好! 偏紅情況一嘢 K.O, 仲要好貼面、好貼面嗰種𠻹! 😍

抹上面第一下我已經完全感受到佢嘅柔焦強度! 係成個膚質都柔焦咗平滑晒, 毛孔細紋係 cover 得神不知鬼不覺, 好似用咗美圖秀秀 smooth mode 咁, 又唔覺得侷身! 

完妝效果 (冇加遮瑕膏及碎粉) →

妝感屬半啞緻霧面 feel, 抹上面時係柔滑霜狀, 抹勻後約 10 秒左右就會慢慢轉化成乾粉狀態, 摸上去清清爽爽 = 唔需要用碎粉 / 粉餅定妝, 好方便快捷! (不過我仍會掃少少碎粉預防溶妝)

質地亦唔同一般粉底霜 / 粉底膏, 冇粉底霜咁潤同濕, 亦冇粉底膏咁厚同乾, 介乎係兩者中間, 高 coverage 之餘唔厚妝, 又柔焦到膚質, 正! 😘

至於保濕度方面係有但唔高, 至少以我 dry skin x 廿零度天氣左右用佢都唔覺得乾, 但就肯定唔適合冬天 / 極乾膚質用。

官方建議係以「塗抹式」上粉, 即並非如 cushion 粉底般印上面。

不過搽完一層後都可局部印多少少於眼底 / 色斑 / 偏紅位置, 遮瑕度都唔錯, 真係可以唔使另加遮瑕膏! 👍🏻

唔算話難推勻, 但都要啲時間, 冇 cushion 粉底咁快咁方便, 同埋如果之前搽嘅 skincare 太潤厚, 粉底就好易推到一撻撻唔均勻。

樣樣都好正, 唯獨持久度就真係差喇! 😓

化完妝後 2-3 個鐘已經開始出油溶妝, 仲要係爆油嗰種, 毛孔又現形浮粉! 講緊我已經有掃碎粉定妝, 兼只係留於室內冷氣房內喎! 

補完妝隔 1 個鐘見佢又出油, 於是我再補, 點知隔 1 個鐘佢又再出過油..... 控油 + 抗潮濕程度係出奇地差, 試咗幾日都係同樣情況, 真係妝效幾靚都唔掂啦! 😖

平時我明明乾到連油都冇一滴, 但用咗佢反而瘋狂出油, 估計係因為佢個柔焦效果實在太強, block 住啲毛孔透唔到氣, 迫到皮膚不停泵油吧......