藍光美白牙齒, 即時提亮一倍? 合唔合法先?

「藍光美白漂牙」 我好多年前已經做過, 當年於 yahoo blog 亦有分享過效果~

曾經分別幫襯過牙醫 + 藍光漂牙中心, 覺得兩者效果其實差不遠, 但收費就差 2-3 倍, 咁當然持久度就牙醫會再好少少啦~ 見而家有咁多藍光漂牙中心 FB / IG 廣告, 試做價只係 $980, 2 人同行又另有折扣, 於是就問閨密有冇興趣一齊去, 點知佢話一早做咗, 仲介紹我去佢試過呢間𠻹。

做完覺得效果 ok, 返到屋企諗住寫個用後感, 順道上網 search 下資料, 先至發現......

原來 2 年前新聞有報導過「藍光漂牙」係要持牌牙醫先做得, 其他人做係違法㗎! 😨

無牌行醫：美容院提供藍光漂牙 負責人被捕

雖然心知呢類中心一定冇牙醫咁 pro, 但就冇諗過原來係違法? 市面上仲要有咁多間賣行晒廣告, 揾晒 blogger / 明星試做咁樣𠻹! 真係 omg..... 

或者你會諗, 可能持牌人係牙醫呢? 咁咪未必違法囉?

就算持牌人係牙醫, 但落手做嘅唔係佢, 都已經係違法了。

不過唔做都做咗, 錢又俾咗喇, 都 report 一下俾大家知啦 😝

首先去到係連登記都唔使, 到咗就叫你去洗手間漱口 →

店內裝修好企理新淨, 但就冇乜私隱, 一入門口就見到幾張美容床椅, 係用嚟做飄眉 / 紋眼線 / 植睫毛嘅, 完全冇遮冇掩, 一入去就會見到一班人瞓低整緊.....

而幫你做嘅係一班 20 歲左右年輕姐姐 (可能已經估大咗), 係金毛有紋身嗰種, 態度就非常 nice, 好有禮貌好 sweet 嘅~ 

(sorry 我唔應該咁講, 我自己都係啡毛有紋身, 個人都好 nice 嘅) 🤣

漂牙嘅梳化位係好新淨舒服, 不過坐滿人時無遮無掩都幾尷尬 →

我見工具都係即開即棄, 不重複使用 →

安唔安全就自己諗了, 因為無論佢話用咩外國用料, 講到幾安全都好, 你都唔會知, 亦唔應該盡信, 氧化劑 / 漂白劑成份係一定有。

而做之前佢哋並唔會問你有咩病歴 / 有冇牙周病或蛀牙 / 口腔有冇傷口 / 係咪懷孕中等等, 又冇講解 / 冇登記, 其實都幾唔 pro 㗎! 一分錢一分貨啦......

戴好牙膠托 + 眼罩, 坐低 30 mins 照完再漱個口就走得, 中途可以玩電話 →

姐姐安置完你坐低, 用 1 mins 戴好牙托再開機就會走開, 照完後再用 30 秒幫你除走牙托, 中途完全冇問過你有冇唔舒服 / 冇理過你, 由進店至離開只需 35 mins, 感覺佢呢 $900 幾蚊都幾易賺喎! 😆

至少過程係零酸痛感, 牙膠托亦夠軟身, 感覺唔難受, 亦冇咩特別味道或氣味~

效果係好嘅! 30 mins 即時 bye bye 變黃茶漬→

不過間間牙醫診所或呢類中心, 做完藍光漂牙都一定有呢種效果, 並冇話邊間好啲。

而效果可 keep 幾耐就視乎你點保養, 例如之後要避開飲有色嘢等等。以我唔乖會每日飲有色嘢計, 如幫襯呢類中心, 呢種咁白嘅程度我最盡只可 keep 到 4-6 個月, 牙醫做我亦最盡只能 keep 到 9-12 個月。

意思唔係指半年至 1 年後佢就突然會變返咁黃, 要變到咁黃都要時間洗禮嘅! 對上一次我做完漂牙後, 都至少每日飲茶飲足 5-6 年先變到咁黃啦~ 所以當你察覺到啲牙變返勁黃想再漂嗰陣, 可能已經係幾年後嘅事了~ 😌

牙齒白返係開心好多嘅 😍

但就覺得呢類中心真心唔 pro, 除咗上面提過嘅嘢之外, 仲會叫你如果想效果好啲, 可以隔 1 星期再做多次, 然後隔 1-3 個月又再做多次!  

稍為有 common sense 都知漂牙做得咁密好傷牙喎? 佢嘅解釋係佢哋用嘅物料冇牙醫個啲咁 aggresive, 冇咁高效所以可密啲做, 不傷牙的...... 😑 

你又信唔信呢? 牙醫都會話你知漂牙唔多唔少一定傷到琺瑯質啦, 再做都應該隔耐少少吧?

至於邊間我就唔開名喇, 我唔推介, 但亦唔係反對大家幫襯呢類中心, 始終有好多人係覺得冇問題嘅, 要平就預咗, 有冇牌可能都未必 care, 情況就如好多人會貪平去深圳整雙眼皮一樣.....

但就勸大家如果 budget 許可, 一定係揾牙醫做更安全又安心~~