平價爽膚水收毛孔控油最強!「法國珍貴水 eau précieuse lotion」用後感

「法國珍貴水 eau précieuse lotion」大家肯定有見過啦~ 又係 hit 到周街都有得賣~

呢支有 120 年歷史嘅法國皇牌爽膚水, 係由法國藥劑師 Charles Depensier 於 1890 年研製, 百幾年來都冇轉過配方, 係法國家傳戶曉嘅老字號, 亦係法國皮膚科醫生推薦嘅爽膚水, 專為針對控油 + 去角質 + 收細毛孔 + 抗痘而設, 被喻為「珍貴水」。 

到底有幾「珍貴」呢?

其實售價係激平, 大大支 375ml 都唔使 $60 蚊 😅

而成份亦唔係特別珍貴, 只係內含水楊酸成份, 所以對控油 + 收細毛孔 + 抗痘會特別有效

我買嘅係 100ml 細支裝, SaSa 約 $35 →

產品資料 →

專為油性肌 / 暗瘡肌而設之油溶性水楊酸爽膚水, 有效消炎鎮靜 + 去除舊角質 + 收細毛孔 + 減少油脂分泌 + 讓肌膚回復淨透清爽 + 暢通毛孔 + 減低痘痘形成, 並預防痘痘再度形成。

一聽就知唔啱我呢類 dry skin 用啦, 主要係買俾我油性肌老公用的, 只不過自己又八卦想攞嚟試試 😆

用後感 →

So far 試咗 2 星期, 早晚都有用, 初用 1 星期後已見到毛孔有明顯收細咗! 仲覺得塊面乾淨咗、通透咗𠻹! 👍🏻

不過同時亦開始察覺到皮膚變乾咗, 用咗 2 星期後仲直頭覺得乾到要停, 確係唔啱 dry skin! 不過都一早預咗呢支「珍貴水」唔啱自己用, 純絮好奇 try try, 油性肌夏天用就應該會好啱~

但就算係油性肌, 用時都建議 "見好就收", 雖然水楊酸對控油 + 收細毛孔係好有效, 但始終長期用會令皮膚變乾, 所以當用到油光有改善就應該停一停, 轉用返其他夾膚水, 再有需要時先再用佢, 而用嘅期間亦應定期敷水份 mask 補濕~

至於局部性嘅痘痘 / 唔係好嚴重嘅局部出油問題 (如 T-zone), 怕乾嘅話其實都唔使日日用呢支「珍貴水」, 間中倒落 cotton pad 敷嗰啲位都得, 用嚟配合導出機做清潔亦 ok~ 😉

由於瓶口頗大, 好易倒瀉, 建議倒落化妝棉再抹上面用會更好 →

成份雖含有香料 + 薄荷醇 + 水楊酸, 但我聞唔到佢有任何香味, 搽上面亦唔覺得有咩薄荷感, 只係有極輕微嘅冰涼感, 亦冇出現過敏 / 刺面情況。但由於佢並非防敏配方, 所以皮膚易敏感 / 有濕疹 / 有傷口或炎症 / 剛做完醫美療程 / 懷孕中都唔建議用了。

雖然大支裝 375ml 都係好平, 但如我上段所講, 呢支「珍貴水」並唔適合長期用, 如果只係久唔久用一排 or 間中敷下, 根本冇需要買咁大支, 每次買細支裝用完有需要先再買, 咁仲 "新鮮"。

尤其如果係未用過佢, 就更加應該買細支裝 100ml 的試, 睇下啱唔啱自己皮膚用先~ ☺️