韓國「Too Cool For School」$99 平靚正修容陰影粉 Art Class by Rodin

突然好想買盒陰影粉自用, 最好有埋陰影掃附設嗰種......

自覺用開嘅韓國 VIDIVICI / 美國 Smashbox 陰影粉都係非常好用, 又有化妝掃附設, 不過香港冇專櫃要買就比較麻煩, 同埋用咗咁多年都想試下其他。

雖然中途都有買過其他牌子試 (如 Makeup Forever / Addiction), 但用用下又覺得一般, 嫌顏色唔合心意, 望過其他平價同專櫃 brand 又覺得冇乜特別, 最終就不了了之冇買到。

估唔到隔咗成大半年, 終於俾我買到呢盒啱心水嘅「Too Cool For School」喎! 😊

雖然「Too Cool For School」香港店 2 年前已關門大吉, 但唔少水貨店 / 網店都仍可買到少量產品, 例如我今次就係響公司附近間藥妝店無意中揾到。

Art Class by Rodin 修容陰影粉 →

$99 @ 尖沙咀加連威老道 The One 對面嗰間大藥妝店 (即舊 Body Shop 位置)

呢盒「Art Class by Rodin」並唔係咩新品, 都推出咗 2-3 年左右了, 不過就一直係「Too Cool For School」嘅暢銷品, 唔少 blogger / Youtuber 都有推介過。

勝在有 3 隻淺至深啡色, 一次過混合 3 隻色用又得, 依膚色或是日妝容需要單用其中 1-2 隻色又得, 化妝叻嘅甚至可按唔同輪廓部位用唔同色, bonus 係仲可以當埋眉粉用, 夠晒 flexible 👍🏻

由於右邊隻啡色都幾深, 所以我會一次過混合 3 隻色掃上面 balance 返, 等佢冇咁深色, 而鼻影就會混合用左邊嗰 2 隻啡色~

附設嘅陰影掃 quality 亦唔算差, 細細支易於收藏 →

咁毛質當然唔可以同幾百蚊支掃比較啦 😉

但以附送嘅掃嚟講經已叫好有誠意, 形狀 cuting ok 的, 只係毛質有少少粗糙, 加上掃頭較細毛毛較集中, 容易沾到好多粉, 但只要於紙巾上打圈掃均勻咗啲粉先掃上面, 咁就唔會掃得唔均勻 or 掃得太深了~

$99 確係抵玩~ 包裝唔差仲要有埋化妝掃附送, 最適合少掃陰影又想間中玩下嘅人 😊

粉質都係 ok 的~