2019年8月13日 星期二

出去紋眼線..... 竟遇上假色料 + 淘寶機!

而家咁興紋眼線, 我唔敢講貴嘅就一定好 (幾好嘅技師都有機會出錯), 平嘅亦未必唔好 (不排除有禾桿冚珍珠), 但講到用咩工具用料 + 衛生程度 + 服務態度就一定要望真!

分享一下我最近紋眼線嘅小故事 →

話說我自己條眼線係 3 年前紋落, 已經變幼咗想再紋過。雖然我都有幫客紋眼線, 但就冇可能幫自己紋到, 都要出去俾錢揾人整。

望過 FB 啲廣告, 有平有貴, 貴嗰啲三四千, 平嗰啲就幾百至千幾蚊不等。心諗貴嗰啲我大概知係點, 反而好奇想知平嗰啲點解可以咁平? 難道唔使計成本人工舖租?

於是把心一橫揀咗間 $1500 嘅試, 唔係孤寒, 係八啫。咁我望過佢 FB 啲相都覺得 ok, 又有好多好評, 反正都係紋一條幼幼嘅線, 應該唔會有咩問題?


紋完...... 分享一下經歴 

首先, 楝大廈係工廠但亦有住宅, 入到去都係住家 feel。入到「睡房」, 身穿家居服嘅姐姐就叫我瞓上床, 當然係冇即棄式床墊啦, 而床單幾耐換一次 / 會唔會洗呢個問題, 去到嗰一刻我都無謂繼續諗。

瞓低咗姐姐就問「要粗定幼?」

「想比我舊呢條眼線粗丁點丁點....」

「即係粗啦!」

「比我舊呢條粗丁點就夠, 少少得喇....」

「ok」跟住就開始紋。

舊有眼線粗度為少於 1mm →




雖然過程並唔痛, 但就有啲粗魯, 抹親都大大力抹到掀起晒眼皮, 有啲色料入咗眼.......

「唔好意思, 我 feel 到有啲嘢入咗眼呀, 有啲刺眼」

「正常嘅, 係你郁得太勁先有嘢入眼」(勁無語...... 我都冇郁過...... 👉🏻👈🏻)

「咁要唔要洗一洗隻眼先呀? 我怕剌眼」

「梗係唔使啦」(我都無謂反駁, 忍一忍快快整完就算.....)


整完效果 

睇來大家對「粗丁點」嘅定義都好唔同...... 😓

粗到咁當刻我都有啲嚇親嘅, 不過算啦我又好冇所謂, 反正唔整都整咗, 唯有自己 adjust 一下心理, 睇下睇下就慣 😅

整完之後姐姐就叫我起身走, 我問「頭先有嘢入咗眼, 使唔使沖洗一下?」 , 佢話唔使, 當然亦冇修復霜提供。

其實紋完眼線幫客人洗眼呢個衛生程序, 係好基本嘅紋繡師守則, 咁佢唔幫我洗, 我就唯有自己返屋企洗啦, 好彩我自己有齊工具......


2 星期後...... 我覺得條眼線已經變藍.....

當日走之前, 我都有偷望過佢用咩牌子色料, 同我用緊嘅係一樣, 而 3 年幾前我條眼線都係用同一牌子, 幾年都冇變藍過, 我啲客都冇變藍, 點解我今次會變藍呢?

見佢都有教人紋眼線, 於是我就俾多幾千蚊跟佢上 1 堂, 睇下壺爐內究竟賣咩藥......

(題外話 : 收我幾千蚊 2 個鐘, 仲要一邊教一邊繼續接客, 話反正你都識紋啦, 叫我自己練習 😠)


謎底解開! →

首先佢原來係用 $200 幾蚊部嘅「淘寶扮韓文大陸機」+ 幾毫子一支嘅大陸針! 😱

(FYR 外國正版紋繡機係約 $3000 或以上)


咁都未算, 原來連色料都係假嘅!! 😡

由瓶身形狀至前後字樣都唔同, 絕對唔係新舊版分別!

呢點我真心唔明, 美國正版都係幾百蚊啫, 咁都要用假貨?????


除咗對過成份唔同之外, 假嗰支仲要串錯字「Yitanium」, 根本就冇呢個英文字, 正確串法係「Titanium」→

唔怪之得我條眼線變藍啦! 🤬

咁啱我係同行就話識得分啫! 普通人根本唔會識得分真假, 唔會識得分佢用咩機 / 咩針具, 所以都係勸各位別貪平, 因為當你閉眼整嗰陣, 人哋用乜你係唔會知.......

今次俾咗好高昂嘅學費買咗個真相, 以前聽就聽啲老師講得多, 估唔到出面原來真係會咁.....


3 則留言:

  1. Hello Isa,
    請問有冇識人做過吊眼皮?
    因為我用膠水痴左十幾年,本身痴到有雙眼皮,但近一年,眼皮垂下變回單眼皮,無論用膠水/膠紙已經HOLD唔到,真的好煩惱!!
    所以考慮打算吊眼皮!!

    回覆刪除
    回覆
    1. 我咁岩book咗今星期五整,整完再出過post分享一下~

      刪除
  2. Isa 你好,
    如果已經上左妝幾個鐘頭後想補防曬, 可以點做?
    謝謝

    回覆刪除