韓國䕶膚品而家周街都係, 不過我試過好多都認為改善不大, 冇乜效果睇欠缺驚喜, 整整下都唔係咁想再試韓仔嘢......
咁當然間中都會發現有好嘢嘅!
就例如我剛轉用 4 星期嘅「MEDIV」→
試得 skincare 多, 心知如果件 product 係能夠同皮膚擦出火花的話, 一般試 2 星期就見效了, 部份高濃度 / 高活性嘅 skincare 甚至係搽幾次都見到改善𠻹!
而今次推介呢幾支就屬於「高活性快見效」類別, 我係初用第 1 次就已經見到皮膚有改善! 估唔到韓牌都咁有驚喜喎! 價錢方面仲要唔貴, 幾百蚊勁大支, 一支份量足以用到半年! 👍🏻
左至右 : 細胞再生安瓶精華液 + 仙人掌修復面膜霜 sleeping mask + 玫瑰天竺葵精油
話說前年公司約滿揾唔啱地方搬, 唯有求其租個細 office 頂住先...... 就喺嗰一年識到對面美容院老板娘 Flora, 同事過去做完 facial 話好得, 我又走過去試, 半年前仲推介過佢代理呢隻「MEDIV」paper mask : https://isadoracheng.blogspot.com/2019/03/mediv-paper-mask.html (呢隻必試勁正! 唔試會後悔 👍🏻)
上年公司約滿要搬, 咁啱佢都約滿, 就經常圍埋一齊揾地方。奈何尖沙咀啲 office 一係細到得間房, 一係就勁大過千呎, 揾咗幾個月都唔啱...... 最終見大家都傾得埋, Flora 性格又超 nice, 就不如一齊合租一個大 office 了 😊
近水樓台, skincare 用完就梗係幫襯佢啦~
(利申我同 Flora 係各有房間獨立工作, 唔係公司 partner, 我幫襯佢同樣要俾錢冇 sponsor 的)
而 Flora 代理嘅「MEDIV」亦非新牌子, 已有 20 年歴史了, 但只批發俾韓國美容院, 要代理佢嘅產品必需到韓國修讀美容師牌先得, 非常嚴謹。
Total 有分幾個系列好多產品 for 唔同膚質功能, 不過 so far 我只係試過佢幾款產品。
見佢盒 paper mask 咁神, 其他 skincare 應該唔會差, 咁啱屋企精華素用晒, 就買咗佢呢支試 →
細胞再生安瓶精華液
EGF STEMCELL Ampoule
蘊含玫瑰提取物 + EGF + 棕櫚醯三肽 + 鳳仙花提取物 + 野薔薇提取物等等, 能瞬間滲透至皮膚, 促進細胞再生, 長效保濕, 增強皮膚彈性及強化肌膚屏障, 促進皮膚新陳代謝, 有效幫助老化肌膚與敏感肌。made in Korea
$643 / 100ml
以一般精華液只得 30ml 計, 呢支係 100ml 勁大支! →
我早晚用咗 1 個月, 每次用 1 至 1.5 泵, 都只係消耗咗 15% 左右, 估計每支約可用到 6 個月!
圍起條數計其實係好抵用 👏🏻
採用真空泵設計, 用剩幾多一目了然 →
安瓶 (Ampoules) = 精華 (serum) 嗎?
安瓶都係精華嘅一種, 不過就屬於「高濃度細分子精華液」。由於分子較細, 具高滲透力, 質感一定會比一般精華素稀身, 只比清水杰身少少, 如果嫌唔夠潤亦可另搽其他精華或面霜。
因為夠濃縮, 見效通常會比普通 serum 快及明顯, 可令皮膚瞬間改善狀態, 而「MEDIV」安瓶就有分 4 種唔同功能 (美白補濕 / 抗敏舒緩 / 消炎抗痘 / 細胞修復), 而我揀呢支係 for「修復」😊
官方建議每次用 2 泵, 不過我認為用 1 泵都好夠, 1 泵份量我搽完面再搽埋頸都 ok~
另外佢仲可以倒落 cotton pad 敷面用 (建議倒入「蠶絲面膜紙」敷仲正), 敷面效果係滑嫩到一個點, 勁過敷貴價 paper mask! 😍
有乜咁驚喜?
係一搽勻就快速滲透, 見到毛孔 / 乾紋撫平晒縮細晒! 好似自動美肌咗咁! 😍
質地稀薄得來補濕度好充足, 唔會好似一陣風冇搽過嘢咁, 明顯滲透到補到水, 仲要摸到塊面軟稔稔滑嫩嫩, 飲爆水嗰種光滑, 而且係零油膩感, feel 唔到有油, 搽完亦係零油光, 但望上去就好光滑, 總之一個字「正」!
又係必試呀~ 👏🏻👏🏻
但由於佢係屬細分子 + 冇乜油份, 皮膚乾的話之後都要再搽其他精華素 or 精華油 or 面霜。
試咗支精華見效果幾好, 2 星期前我又買埋佢支 sleeping mask →
仙人掌修復面膜霜
Soothing Cactus Mask
以仙人掌為主要成份, 並添加澳洲堅果油 + 積雪草提取物 + 鳳仙花提取物 + 野薔薇果提取物等天然成份, 有效緩解肌膚發紅發癢等問題, 為肌膚鎮靜降溫, 提升肌膚免疫力, 同時能促進肌膚快速修復再生。made in Korea
除可厚敷 15mins 後洗面, 也可薄敷作 sleeping mask 每晚使用。
特別適合乾性肌 / 敏感肌修復 (如激素皮膚炎 / 接觸性皮膚炎等等)。
$753 / 200g
雖然 $700 幾蚊唔算話好平, 不過真係勁大支喔!
而且伸展度係極高, 每次唔使用太多份量, 一支有排用 👍🏻
質地同一般 sleeping mask 類似, 都係 gel gel 哋冰冰涼涼咁 →
同其他 sleeping mask 唔同嘅地方係, 呢支敷咗係識得吸收 / 識得乾, 唔會成晚油淋淋唔識吸收, 唔係單以油份去罩住塊面營造好水潤嘅幻覺~
雖然搽完塊面都係會反光, 但隔 5 mins 左右, 你再用手推撥幾下佢又真係會吸收晒, 同時又摸得出有層保濕膜咁~
敷完第二乾起身洗完面係見到好光滑! 泛紅問題都見到有好轉, 而唔係單純保濕咁簡單~ 😍
面膜有分 6 款, 最貴係我嗰支, 其他係 $532-$610 →
至於有咩選擇就可去佢 website 睇 :
輪到最後呢支精華油 →
玫瑰天竺葵精油
Pelargonium Graveolens
為複方玫瑰天竺葵精油, 可平衡皮脂分泌, 具殺菌 + 促進皮膚傷口癒合 + 改善肌膚受損引起的閉口粉刺功效。
$293 / 10ml
揀呢支最主要係想改善我嘅泛紅問題, 係 Flora 幫我揀的~
我皮膚薄 + 紅血絲勁多, 大力篤下都紅, 洗個面又紅, 連搽䕶膚品捽下塊面都會紅, 心知係天生冇得救, 不過都想略盡綿力嘅, 而呢支就可以幫手改善降紅, 等皮膚冇咁 sensitive~
Flora 另一位美容師都用緊, 但佢就主要用嚟搽肚, M 時改善腹痛。
有好多款唔同功能精油選擇 →
又唔係貴喎! 大部份都係 $93-120, 係得某幾支特別貴啫
怕用油又想 try try?
我見佢 FB 上個月話買滿 $300 就有精華油 sample 送, 不過呢個優惠今個月仲有冇就唔知呀, 可自行問問佢哋 😉
好似我呢類用開精華油嘅人, 就可於 serum 後直接倒 2-3 滴印上面
至於怕用油 / 少用油的話, 就可每次將 1-2 滴油 mix 入用開嘅 serum 或面霜搽
質感同一般精華油分別不大, 唔算係 dry oil 咁清爽, 但亦未至於厚稠黏笠 →
我皮膚乾用佢係吸收得好快 →
而家我係搽完上面嗰支安瓶精華液後, 就會搽呢支油, 跟住再用上面支仙人掌 sleeping mask, 夜晚簡單搽 3 件嘢攪掂~
除咗佢 website 內有嘅䕶膚產品之外, 我見 Flora 仲有幫佢啲 facial 客用「MEDIV」特別調配䕶膚品, 針對俾有個別要求嘅皮膚用, 又見到佢通常做完 facial 有送 sample 俾客, 啲客試完 sample 又有返轉頭揾佢買咁樣。
其實連我公司同事都轉晒用佢隻「MEDIV」, 仲成日試完推介返俾我𠻹! 今次支精華同 sleeping mask 就係同事力推叫我買嘅 🤣
折扣優惠 →
好少見佢有做 discount, 但平時只要就咁話係我介紹, 買任何嘢都有正價 95 折嘅
溫馨提示 →
因為係小家式美容院, 存貨量未必多, 建議 whatsapp 問咗有冇貨先, 唔好衝上去買怕 sold out。
同理我見佢哋日日都做到天昏地暗, 如撞啱幫客做緊 facial 時可能未必有時間 serve 你, 都係去 Facebook 專頁 / whatsapp 郵購更實際, 滿 $400 係順豐免運費 😆
Whatsapp 郵購及查詢 : 6591 0228
HI,ISA,請問呢間係咪你上次做韓國facial果間?未聽你介紹做完既感想?同埋呢個牌子有冇化學成份呢?thx~
回覆刪除冇錯係呀～ 我都幫襯佢做個幾次了，不過做後感就仲未的起心肝寫，你知我次次寫親都成千字㗎啦，會寫的了～ 🤣 而成份方面佢係以植物成份 + 科硏胜肽類成分為主，較少致害致敏物質，但因為佢某啲產品活性較強，如果皮膚係比較敏感的話，都可以先問問 Flora 睇睇你皮膚先再決定買唔買咁樣，佢係超 nice 超冇所謂的～
刪除