話說上月初去日本旅行前怕天氣會好乾, 為怕去完個旅行返嚟又乾到敏感爛面, 都係買定啲強效補濕精華帶去用穩陣~
而要集中補水當然係揀 "安瓶精華" 最有效, 始終比普通精華更高濃度 + 更高效 + 滲透力更高, 而且細細支散裝帶去旅行用都方便啲, 去幾多日就帶幾多支, 用完即棄 👍🏻
貪心地買咗 3 款帶去試, 最終認為只有 Dr. Jart+ 最好用, 其餘 2 款都一般般。
呢款 Dr. Jart+ 係膠囊唔係支裝, 但同屬安瓶效用一類 →
Dr. Jart+ 強化保濕膠囊精華
Vital hydra Solution Capsule Ampoule
具 5 種透明質酸 (6000 ppm) + 海帶及海藻提取物 + 綠茶水 + 其他植物萃取等等, 有效迅速緩解乾燥肌膚, 密集深入補水, 快速改善皮膚光澤度及水潤度, 一粒已相當於 10 片面膜的功效。
不含酒精 / 香料 / 防腐劑等刺激皮膚成份, 經皮膚科測試, 敏感肌亦可用。
SaSa 買印像中 6 粒係約 $100 (每粒 2ml), HKTV Mall 也有售, 卓悅就賣 $219 x 30 粒
每粒 2ml 其實並唔少, 如以日常搽精華嘅份量計, 1 粒都可用上 3-4 次, 不過就唔建議分開幾次用了, 始終一撕開咗塊錫紙就難保質, 都係跟返產品說明每次用 1 粒啦 😊
用法 → 潔面後先搽爽膚水, 將膠囊精華分 3 個 step 層層疊搽上面
Step 1 : 先取 1/2 份量全面按摩搽至完全吸收, 作為深透保濕
Step 2 : 再取少量搽自己比較乾燥嘅位置, 集中加強補濕效果
Step 3 : 將剩低嘅精華全面輕按至吸收, 可形成鎖水保護膜
建議每個月連續使用 1 星期, 每次 1 粒膠囊, 作為間中密集式補水修護 or 皮膚極乾時急救用
用後感 →
首先搽上去嘅感覺同 Dr.Wu 支 "玻尿酸保濕精華" 好相似, 都係透明質酸膠質 feel, 只係滲透力再高啲。搽嘅時候 feel 到有好多水一次過泵入皮膚, 以咁多份量計都算吸收得快, 搽勻後隔一陣已不黏稠不厚重, 之後再搽其他精華及晚霜都冇起擦膠碎。
效果方面, 雖未至於有佢講到有如敷咗 10 次 mask 咁水潤光澤, 不過都解救到缺水問題, 感覺又滑溜又舒緩, 而且冇香料冇致敏成份不刺激, 連眼周 / 唇邊都可以搽埋, 係 good 嘅 👍🏻
以間中用幾日密集式補水嚟講都算唔錯, 價錢亦唔貴, 推介推介 😍
至於下圖呢 2 盒, 就係我第一段提到認為試完效果一般嗰 2 款安瓶 →
係 ISDIN 嘅保濕 + 美白精華, 約 $110 盒左右
雖然唔可以話係零效, 但用完除咗微弱補濕之外就冇其他了, 唔覺得有安瓶嘅集中修護效果, 所以都可以不買了。
沒有留言:
張貼留言