Urban Decay 幾件妝品 review

上星期剛剛報告過 Urban Decay 已在 HK 設立專櫃, 雖然上次都已介紹過它大部份妝品, 但始終在專櫃試 vs. 自己在家再試, 效果可能會有輕微出入, 所以今次便想為幾件在 launch party 上收到的皇牌 item 做個簡短 review, 等大家入手前有個更準確的預計~

首先, launch party 上收到的有: NAKED Palette 3 眼影組合 + 唇膏 + 眼線筆 + mascara + 定妝噴霧. 而今次的 review 次序, 我依照了自己喜好排序.

第 1 位: NAKED Palette 3 眼影組合 ($500)

始終是 Urban Decay 皇牌產品, 粉質幼滑貼膚易上色, 沒什麼好挑剔, 人見人愛~

其實完全冇缺點, 唯一就係......

以 makeup artist 來說, 工作上會遇到不同膚色客人 / 不同妝容要求, 當然全部 color 都用得著, 但一般人化自己的妝, 就很難會用到咁多色, end up 可能用來用去都係某幾隻色, hahaha~

不過點計都係一盒超正組合!

NAKED Palette 分有 "NAKED" / "NAKED 2" / "NAKED 3" 三款, 我在網上 copy 了色版圖給大家作個參考:

3 盒同樣是 earth tone 大地色系, 分別是:

NAKED 暖色系, 包括 2 款啞色 + 10 款金屬色

NAKED 2 冷色系, 包括 3 款啞色 + 9 款金屬色

NAKED 3 啡紅金系, 包括 3 款啞色 + 9 款金屬色

唔知點揀好?

好簡單, 跟自己的膚色 + 髮色揀就 ok~

NAKED 適合膚色偏黃 / 黃而暗啞的人, 而髮色屬偏金啡

NAKED 2 適合膚色偏白 / 偏灰 / 冇乜血色的人, 而髮色屬偏深 / cool tone 髮色 

NAKED 3 適合膚色偏紅 / 易泛紅的人, 髮色偏啡帶紅 

如果你問.... "若然我膚色偏紅, 但染了金髮呢?"

那不如試試下次染髮時, 換個更適合自己 skin tone 的髮色吧, 能 bring out 到整個人的好氣色~ 其實化妝品選色, 以至髮色, 都係用夾到自己膚色的色 tone 會更 match~

第 2 位: Sheer Revolution 唇膏 ($190)

簡單兩字: 好潤!

又潤又貼唇, 不起唇紋, 上唇後沒色差, 是我用過最潤、最貼、最正的唇膏!! 好用過 clé de peau / Armani 多多聲呀!

不過色效不算太持久, 跟普通唇膏一樣, 約 1-2 小時後顏色會漸漸變淡甩色, 要有心理準備久不久要補唇色.... (但真係好潤!)

薄塗一層 vs. 塗兩層色效:

第 3 位: All Nighter Makeup Setting Spray 定妝噴霧 ($250)

首先, Urban Decay 的 Setting Spray 共分 3 款 (控油 / 補濕 / 持久定妝), 而這支 All Nighter 便是持久定妝那支, 但卻非控油性質, 噴後具輕微提亮感.

定妝效果如何?

Ummm...... 如果你喜歡 keep 住整日 or 整晚有透亮感效果, 這支便會是你杯茶, 噴後有提亮感; 但如果你想要 keep 住零油光、啞緻妝感的話, 就應該揀 Oil-Control 那支了. 

由於始終並非控油性質, 我認為化晚妝時用更適合, 另外秋冬用亦會很合適~

噴後圖:

For example, 我原本是化了個啞緻底妝, 沒加任何光影產品. 

完妝後噴上 All Nighter, 會立刻多了種透光感, 仿如掃了光影粉般, 自動提亮. 我自己是愛這類 natural glow 妝效的, 認為皮膚望上去會更立體飽滿~

不過可能因這支沒控油效果, 我覺得它的定妝持久度不算太高, 以平常夏天化完妝平均約 3 小時溶妝計, 噴了 All Nighter 大約會比平常多 last 1 小時左右. 始終 HK 氣候太侷太潮濕, 難逃溶妝一劫....

第 4 位: 24/7 Waterproof Eye Pencil 眼線筆 ($180)

屬 Urban Decay 的皇牌眼線筆, 設有單色及雙色 2 款, 以質地柔潤、防水、不脫色、顏色選擇多而著名. 

除可作普通畫眼線使用, 也可用作打底, 填滿眼褶位後, 以手指推鬆顏色, 能化出 smokey eyes 眼妝. (畫上後約 30 秒全自動 set 乾變防溶)

防溶效果如何?

如果在秋冬 / 或在外國使用, 我相信它是十分持久不脫色的, 所以不少外國 review 都捧它為 no.1.

但在 HK 用嘛, 都說了 HK 氣候太特別, 夏天用咩都會溶, 以我為例, 畫上後約 2-3 小時, 眼尾還是會溶化一丁點.

第 5 位: PERVERSION 睫毛膏 ($190)

同樣是 Urban Decay 皇牌, 不但防水防油、不脫色, 顏色亦夠黑夠明顯, 刷上後整天都不溶化~

不過自己覺得以 mascara 來說不算特別, 售價亦非太便宜, 可以有其他選擇.

P.S. 上次說過在 Launch Party 上看中了幾件 Urban Decay 底妝品, 可惜當日不設零售, 而專櫃開將後我又未有時間去買 (近期 out job 較多, 往往一出外便是一整天, 到放假時又要湊小朋友).... 

找天買完試後再向大家報告吧~