玩玩唇膏試色~

好多人都知，我一向都唔鐘意自己個嘴......

雖然鐘意厚唇，但就認為自己唇型唔靚，唇框位又唔夠實線、鬆鬆矇矇咁好似污嘴狗，搽親唇膏都要預先用 concealer 遮好唇框，好麻煩呀......

為了隱藏唇部缺點，我通常都愛用 nude 色 / 淡色唇膏，又或者化個唔需要凸顯唇線的咬唇妝，總之盡量將焦點移離個嘴。

不過大家都知近 2 年真係好興玩唇色啦，仲要又紅又 sharp 個種! 

好老實，自己係 makeup artist 都咁講，化人唔同化自己，化落人地度靚、不等於自用同樣靚，加上本身唇型又麻麻，用了幾個月時間先說服到自己用呢類唇色，結果試下試下慢慢就接受了，仲覺得幾靚、幾新鮮添!

今日返工之前就試了幾款新唇色玩玩，順便俾大家望望實物試色圖~

今次純粹玩試唇色，眼妝係同一款冇變 (Shu Uemura 眼影 #126 淡粉色) →

唇色對妝感係重要一 part，就算眼妝係同一款，單單換個唇色已可令整個妝感不同。

所以有時要由日妝轉晚妝，眼妝都不一定要愈化愈濃，簡單換個唇色都 ok 的~

先由淡色開始試~

Urban Decay Vice Lipstick (#Naked) →

係幾隻色之中比較易 carry 的色調，半啞緻半潤滑質感。唇膏望上去似啡紅色，不過搽上後其實係紫粉色，帶點浪漫氣息，感覺比較年輕、柔和~

特別適合膚色白皙 / 偏紅的人用，不過膚色蒼白 / 暗黃的人就要避開了。

$150 / 共 100 色 @ http://www.urbandecay.com.hk

Bobbi Brown Luxe Lips 唇膏 (#Tahiti Pink)→

照譯係 "大溪地粉紅色" = 橙紅色。

唇膏望上去的確係橙紅色，不過搽上後係偏紅居多，算係鮮色唇膏入門版，冇桃紅 / 鮮紅個 d 咁 sharp，亦適合所有膚色使用。

下圖係厚搽 2 層色效，如果唔想咁 sharp 可以搽薄些少~

$280 / 共 30 色 @ http://www.bobbibrown.com.hk

Urban Decay Vice Lipstick (#Big Bang) →

帶金屬閃光粒子的紫桃紅色，搽上後真人會見到個嘴有一粒一粒幻彩閃粉，屬比較型格的效果，閃爍度高，唇部中間會特別反光好立體~

雖然呢隻色係咩膚色都襯到，但就要襯 cats eyes 眼妝 / 畫勾起的眼線妝先靚，所以賢妻良母 feel / 乖乖女樣的人就未必夾到了。

Urban Decay Vice Lipstick (#FireBird) →

唇膏望上去似暗紅色，但搽上後係深桃紅色 (有點似紫紅)，顯得膚色好白，又帶點女人味。

由於呢支係潤澤系列，質地真係好潤、潤到識得反光咁! 論質感係冇得輸，如果唔鐘意咁深色的話，同一系列亦有好多淡色選擇。

Urban Decay Vice Lipstick (#714) →

屬啞緻質感的鮮紅，搽上後顯得膚色最白淨，啞身得來又唔乾，但就的確好 sharp 好紅，要有特別場合去、仲要襯埋衫先用到，而且又係要襯 cats eyes 眼妝先靚。

自己對鮮紅色比較抗拒，覺得比較成熟。不過幫人化妝就用過好多次呢類色，效果全部都好靚，又型又有高貴女人味! 但就真係要講場合了。