Body Shop 今期新出呢 5 款天然 mask 犀利喇!
未收到前已經有好多人問我試咗未，收到後又有好多朋友問我效果點，我老公一見到又爭住試，仲興奮過我! 好似好受歡迎咁喎?
咁佢又真係幾有噱頭嘅，除了萃取自天然成份外，更不含 Parabens 防腐劑、石蠟、矽及礦物油，以 100% 素食成份研製，仲有 5 款選擇咁多，由深層淨膚、補濕、潤澤、亮肌、充電都照顧到，售價又夠親民~
但係咪真有咁好用?
試完幾日，我終於都試勻晒 5 款 mask，今日分享 comment 俾大家八卦一下吓~~
首先，各款面膜售價為 $199 / 75ml @ The body Shop
容量只有 75ml，以其他牌子 mask 一般 100ml 為例，呢樽 Body Shop 容量係少 dd 的，不過就算除開條數，點計都係抵用!
(all trial products given by The Body Shop)
官方仲建議可按皮膚各位置需要，分區敷唔同的 mask →
例如易生黑頭粉刺 / 易出油的位置可敷清潔 mask，較乾的位置就可敷補濕 mask 等等。
呢個方法對混合性皮膚係非常 ok，但對於我呢類 dry skin，就會 prefer 分開局部敷次清潔 mask 先，然後再全臉敷補濕 mask 咁，唔一次過敷~
有 5 款 mask 咁多，要試邊款先?
當然要試 "深層清潔 mask" 先啦~
皮膚乾淨、毛孔暢通咗，先可以吸收到其他 mask 嘛，所以先試「竹炭排毒淨肌面膜」→
深層潔淨毛孔 ● 排毒 ● 令肌膚柔滑富光澤
產品資料 : 針對需要淨化排毒之肌膚，面膜蘊含來自喜馬拉雅山的竹炭，有效導出及吸走肌膚污垢及多餘油脂，而源於日本的綠茶葉，則含高效抗氧化成份及茶單寧，有效去角質。至於來自肯亞社群貿易的有機茶樹油，就有助淨化肌膚。
同一般清潔面膜一樣，都係泥膜 (clay mask)，唔同嘅係佢裡面有好多茶葉 →
敷 5-10 分鐘後，加水打圈輕輕按摩，再沖水洗淨就 ok。
官方建議每星期使用 2-3 次，我就認為太密了，每 1-2 星期 1 次就好，用得太密皮膚容易變得乾燥。
一塊塊茶葉貼住塊臉真係幾攪笑 hahaha →
潔淨效果足以媲美英國「EVE LOM」五六百蚊個支 Rescue Mask! 大家都差唔多樣，裡面又係有 d 茶葉，好難唔將佢兩個比較，但呢樽 Body Shop 平一倍有多~
而缺點係 Body Shop 呢隻好薄荷 (含茶樹油)，敷上後頭 3 分鐘會 feel 到好㷫，係非常㷫! 不過洗完臉後又唔覺有特別泛紅 / 過敏。
我老公話呢個咁薄荷、咁㷫嘅感覺好正 (變態)，可能係男女喜好有別啦，我就認為太刺激喇....
敷完清潔 mask 咁乾，當然要立刻敷返個補濕 mask~
輪到「玫瑰水盈嫩肌面膜」→
水盈飽滿 ● 膚色更均勻 ● 鎮靜紓緩肌膚
產品資料 : 以人手摘取的英倫玫瑰花瓣 + 玫瑰精華 + 有機蘆薈 + 蘊含豐富歐米加 3 及 歐米加 6 的智利玫瑰果油製成，專為缺水肌而設，有助即時補濕、均勻膚色、鎮靜紓緩肌膚，令肌膚回復水盈飽滿。
屬稀身凝膠質地面膜，可以見到裡面有玫瑰花瓣碎，仲聞到新鮮玫瑰味 →
敷 10-15 分鐘後，以沖水洗淨就 ok。
由於只係補濕用途，每星期敷 2-3 次，甚至日日敷亦 ok 的。
呢款同美國 Fresh「Rose Face Mask 玫瑰面膜」又係似到十足十，直頭同一個樣，好難唔比較! 而價錢方面 Body Shop 又係平過 Fresh 一倍有多!
除了 Fresh 的玫瑰味比較新鮮之外，所有效果我覺得分別唔相差太遠，直情認為冇乜分別，以後大家就可以慳返一大筆喇~
至於補濕度 / 均勻膚色效果計，無論 Fresh / Body Shop 我都只係覺得 ok，補濕效果係有，但唔算話好滋潤，可能係我太乾喇，連夏天都會甩皮，呢類普通補濕 mask 已經滿足唔到我的沙漠肌.....
第一日試完 2 款 mask 的結論就係咁。
隔日再試咗呢款「人參大米煥白亮肌面膜」→
亮白膚色 ● 平滑肌膚
產品資料 : 蘊含來自中國的人參精華、大米萃取，及蘊含豐富的油酸及亞油酸芝麻油，有效均勻肌色及促進肌膚更新，亮白均勻膚色並柔滑肌膚。
杰稠霜狀質感，有 d 似糊仔，可以見到裡面有白米顆粒 →
敷 10-15 分鐘後，加水打圈輕輕按摩，再沖水洗淨就 ok。
官方建議每星期使用 2-3 次，我又係認為太密，每星期 1 次都夠，因為佢冇乜補濕效果，主要都係亮肌功效。
睇相都應該 feel 到佢好厚身 →
呢款係我比較推薦的!
敷完真係會見到膚色白淨咗、均勻咗，摸上去皮光肉滑，有皮膚著燈 feel ~
但補濕度就好輕微，微到 feel 唔到，建議隨後再敷返個補濕 mask。呢樽當係亮肌用途就好，唔好奢望會好潤好補濕。
跟手我又再敷返個「蜂蜜深層滋養面膜」試試 →
深層滋潤 ● 柔滑肌膚
產品資料 : 結合最優質的天然成份，包括源自非洲具癒復及紓緩力量的蜂蜜、以冷壓法提煉的漆樹果仁油、源自意大利的有機橄欖油、豐富歐米加 9 等等，針對需要深層滋潤的肌膚而設，即時令肌膚得到充分滋潤修護，補充養份並鎖緊肌膚水份，修復肌膚彈性。
屬厚杰凝膠質地面膜，呢樽係我覺得滋潤度最 good 的! 推薦推薦! →
敷 10-15 分鐘後，以沖水洗淨就 ok。
由於只係補濕滋潤用途，可每星期敷 2-3 次，乾性肌甚至日日敷都 ok。
敷完後又潤又飽滿，泵漲晒 d 紋理，又有光采，敷完個感覺仲好舒服，正呀~ 正呀~
乾性肌要試喇~ 唔好錯過~
咁玫瑰個款好 d、定呢款蜂蜜好 d?
視乎你皮膚有幾乾啦，呢款蜂蜜係滋潤 level，而玫瑰就普通補水補濕。我咁乾就當然偏愛呢樽蜂蜜 mask~
隔咗 1 日，最後試埋「巴西莓充電喚肌面膜」→
即時充電 ● 擊退倦容● 回復活力光澤
產品資料 : 蘊含亞馬遜強效抗氧巴西莓、維他命 C、有機巴西棕櫚樹油、含高濃度咖啡因的巴西瓜拉那提取物，適合需要即時充電的肌膚，有效減低疲態，喚醒疲倦肌膚擊退倦容、提升光澤，使肌膚柔軟幼滑。
屬稀身凝膠質地，可以見到裡面有巴西莓絲 →
敷 10-15 分鐘後，加水打圈輕輕按摩，再沖水洗淨就 ok。
官方建議每星期使用 2-3 次，我又係認為太密，每星期 1 次 / 或只於有需要時先用都夠，因為佢感覺都幾刺激皮膚。
真係好似搽了果醬上臉咁! →
我個囡見到後瘋狂尖叫話有怪獸......
效果我可以話係好，敷完的確見到白淨咗、膚色均勻咗，摸上去亦夠滑，仲 firm 咗少少~
不過敷時感覺真係好刺臉，"那那哋"，都幾刺激皮膚，雖然冇話泛紅 / 敏感，但皮膚易過敏的人我就唔建議喇。同埋認為佢效果同上面推介個樽 "白米 mask" 有 d 似。
試完晒之後，綜合認為 "白米亮肌 mask" 同 "蜂蜜 mask" 效果最好，亦冇唔舒服嘅感覺~~
而我屋企個位經常偷我 d mask 用嘅 "敷 mask 男"，就認為款款都咁正.....
(errrr.... 問男士都係等於白問 haha)
沒有留言:
發佈留言
注意：只有此網誌的成員可以留言。