Estee lauder 秋冬最新 Cushion Stick「持久裸妝氣墊粉底筆」review

今年秋妝開季比較觸目的粉底，應該就係呢支 Estee Lauder「持久裸妝氣墊粉底筆」(Double Wear Nude Cushion Stick) 喇~

"一筆上妝、30 秒完妝、氣墊球海綿設計、持妝 8 小時、水潤裸妝感"，單單係 design 同售價已經令佢輕易跑出~

以專櫃品牌計，$360 支粉底的確算係平，不過事後諗一諗，佢其實只得 14ml，比一般 30ml 少一半! 計落係貴先真喎?!

但又咁講，粉底往往都要親身試過先知適唔適合自己，其實份量少 d、價錢賣平 d，我覺得仲好啦! 一來女人好多時都花心成日換粉底，30ml 好可能未用到一半就放埋一邊  ; 二來份量少咗價錢相對平 d，就算買到返屋企試完唔鐘意都冇咁肉痛嘛~

唔知其他品牌會唔會考慮效法 Estee Lauder 呢個做法呢? haha~

找來美國熱播了幾年的節目 "Keeping Up With The Kardashians" 家族的女兒 Kendall Jenner 任代言人 →

呢個節目我以前有 join NOW TV 時都追過 3 年，而家就已經冇睇好耐喇，Kendall 已由從前的學生妹跳升至美國名模，風頭仲勁過家姐 Kim Kardashian。

仲有 Yumiko 親身示範 "單手一筆上妝" →

幾時都話用明星係 work ，至少吸引到好多人 (包括我) 去專櫃試先 hahaha~

題外話，夏天時都有望過 Estee Lauder 呢盒「持久透亮輕薄粉底」→

不過嫌佢太低遮瑕度，粉底份量太少，同埋個設計其實同唧普通 foundation 出嚟、再用粉樸上妝冇分別，所以最終冇買到。

Cushion Stick 開蓋後 →

有個好 cute cute 的圓頭小粉樸，仲可以拆出來清洗，夠衛生，不似傳統 cushion 粉底般冇得洗，值得一讚。

題外話，一走入專櫃範圍 BA 姐姐就話 "你好，歡迎光臨雅詩蘭黛"。點解唔講 Estee Lauder、要講雅詩蘭黛嘅? 為配合自由行? 公司呢個培訓指示好娘娘豬喔.....

另外我幫襯的是 The One 商場內 Estee lauder 專櫃，BA 姐姐態度非常誠懇友善，又唔 hardsell，好讚~

一轉動筆尾粉底就會泵出 →

Just in case 如果泵得太多粉底出嚟，只要反方向扭動底部，粉底就會縮返入去，呢點係好好! 因為呢支粉底真係好易扭到好多份量出嚟，轉一圈的份量足以搽到幾次! 

使用時記住只轉動 1/4 圈就夠。

另外盒上沒標明防曬度數，聽聞有 SPF10。

但我認為冇所謂，反正亦不應依賴粉底的防曬度，必需另外搽防曬霜。

(粉底搽得薄嘛，防曬度會降到好低)

使用方法好簡單 →

泵出少量 foundation 後，印上雙頰 → 額頭 →下巴，然後再打圈推開。

的確係夠晒方便，全個過程可以單手攪掂~

根據官方資料，呢支 Cushion Stick 係「遮瑕力超卓，即時隱沒細紋令膚色顯得均勻水潤，綻放健康光采，8 小時持妝效果」。

我就覺得佢遮瑕力唔算超卓，只屬中等 coverage，係效果自然的薄身粉底，黑眼圈 / 痘印 / 泛紅 / 色素斑等等全部都遮唔到，而且唔係 buildable 質地，就算你搽多幾層亦不能 build up 遮瑕度。

不過講到均勻膚色方面就絕對冇問題，效果仲幾靚添! 夠 natural 又貼面，夠補濕有透光度，又唔會油淋淋~

持久度方面亦唔弱，大概可 last 5 小時左右先開始溶妝 (但油性肌會溶得快少少)，8 小時後都仲有一半妝剩低 (期間冇補妝)。

色號 #2W0 Warm Vanilla 與我的膚色都夾得剛好~

缺點s →

其實我覺得佢都幾唔錯，好值得試，只係.....

- 略嫌粉樸個頭太細，碌上臉的時間唔算特別快，其實同用濕粉掃 / 手指 / 其他粉樸的上妝速度差唔多，甚至可能仲慢丁點。

- 略嫌粉樸個頭太硬，零彈性，令粉底 coverage 及均勻度都降低。

- 唔算特別撫平到毛孔，所以上完粉都仲見到毛孔

我試過泵粉底出嚟、改用 beautyblender 粉樸印上臉，效果仲好。

Btw, 大家應該留意到我又轉了新髮色~

秋天嘛! 想換個冷 tone 髮色，改試灰銀~

不過要染呢類髮色，就真係唔可以唔化妝出街.....

而且犧牲都好大，要先漂到咁! →

仲激過 barbie 個頭!! haha

跟住先可以上色 →

面層係灰銀色，底層有紫色 + 粉紅色。

底層本來想染藍綠色，但髮型師同 technician 研究咗幾日，都認為紅 tone 襯我多 d~

另外我仲買咗 Estee Lauder 胭脂粉 →

大家有睇 video 都知，我屋企盒 Shu Uemura #M336 已經用到見晒底，同一隻色又已經回購咗 2 次用到悶，所以就改買了今季大熱的 peach tone 色~

色號 #310 Peach Passion

本來打算買返 Shu Uemura 或者 Bobbi Brown，但見買完支 Estee Lauder 粉底、話買滿 $500 有 skincare trial set 送，爭百幾蚊，咁不如順便響度買埋算喇。

一心諗住粉底都係 $360，胭脂應該唔會太貴，最多咪 $200 左右? Bobbi Brown 之類都係咁上下價啫? Estee Lauder 唔會貴得過 Chanel 掛? 

於是自己蠢咗冇問價，埋單個刻先知要 $350，真係拍得住 Chanel 價位......

真心覺得貴，但反正都要用，又唔會唔買嘅，咁佢的確又幾靚，粉質又好、仲有埋支掃仔~

個盒係好靚，不過 size 都幾大，有成盒粉餅咁大 →