LUNASOL 新出「Sheer Light Loose Foundation」輕柔粉狀粉底 review

又一件為取商場免費泊車優惠而買的傑作..... 

反正碎粉我用得密又快，多一盒絕對冇相干 haha~

當晚 10pm 好多專櫃已收工，唯一見 Kanebo 旗下間 LUNASOL 未 close，而佢剛剛又推出咗新碎粉，順理成章揀佢買，順道試試新 product~

產品資料 →

SHEER LIGHT LOOSE FOUNDATION 

輕柔粉狀粉底 

擁有如羽毛般的輕盈質感，卻同時具有粉餅般的高度遮瑕力。

輕柔的碎粉狀粉底配以柔軟貼服的粉撲，輕輕印開，粉未隨即融和於肌膚之中，形成一層透明薄膜，能即時修飾毛孔及撫平肌膚紋理，帶來令人意想不到的柔焦效果與細緻柔滑的觸感妝效。

$340 / 7g @ http://www.lunasol-net.com/tw/index.html

究竟係 "定妝碎粉" 定係 "粉底"??

其實係 "有粉底效果嘅碎粉"~

用粉樸上粉就有粉底嘅遮瑕度，如用碎粉掃上粉就同普通定妝碎粉一樣咁解。

以專櫃品牌計本來 $340 唔算太貴，屬合理價格。

不過睇真 d，其實佢只得 7g，係好細盒!

一般碎粉容量約 15-20g，即呢盒 LUNASOL 係少於正常碎粉容量一半呀!

而貴的原因，以專櫃姐姐所講係因為加入咗粉底配方，會比一般碎粉遮瑕度更高、更持久，同時又 keep 到個輕盈感。

好，我又 try try......

用後感 →

首先呢盒 LUNASOL 共有 2 色選擇，淺色的叫 #01 Light，而我買呢盒係自然色 #02 Natural。

於專櫃試色時覺得 #01 較白，所以買咗 #02，不過當用附設的粉樸上粉後，就明顯見到膚色變暗沉咗、深色咗，早知買 #01 啦......

另外雖然佢粉質真係好幼滑、好輕身、又唔乾，用粉樸上粉遮瑕度又的確係好，但就會比較厚妝，好明顯有粉感，唔多自然。

如果用自己的碎粉掃上粉就冇問題，始終用碎粉掃效果會自然 d、透薄 d 嘛，所以就唔係好覺膚色會轉暗，但遮瑕度相對亦會降低，變相同用普通碎粉冇分別，凸顯唔到佢主 sell 的高遮瑕度效果，不過持久度就有比普通碎粉 keep 得耐少少，亦一 d 都唔覺得乾。

至於 "即時修飾毛孔及撫平肌膚紋理，具柔焦效果" 呢點我認為 ok，不過不失，係有比普通碎粉更好~

綜合評價係覺得佢唔錯的 (但要用碎粉掃上粉)，至少冇其他碎粉咁乾，有少少柔焦效果，定妝效果亦更持久，遮瑕度又比其他碎粉好少少~

唯一缺點就係以容量計比較貴......