又踏入結婚旺季~

每年秋冬 10 月至 2 月結婚旺季，所有化妝師都例牌會忙到發顛! 

婚宴化妝再加埋其他類型化妝 job，有時一星期開足 7 日工、搭住車食飯、甚至做到唔記得食飯亦屢見不鮮。

忙，當然係好事，但如果忙到一個點，自己都唔知自己做緊乜就好大件事.....

曾經有幾年時間，我試過接新娘化妝接到手軟，多到覺得迷惘..... 

接咁多究竟係為錢? 定係為興趣? 定係為想証明我係做得到呢? 

極端反思去到一個位，我認為自己再化唔到新娘妝......

Job 接得太多，人自然會累，漸漸開始失去對化妝的熱誠，變得公式化，完全違背自己入行初衷。於是.....

2009 年，我宣告唔再接新娘化妝，只接廣告雜誌 job + 教化妝師班。

既然衝唔出自己框框，對自己有懷疑，咁就不如唔好做，再繼續接咁多新娘 job 落去，對自己同客人都唔公平。

為打開自己個樽頸位，搵返對化妝的衝勁，隨後 3 年，我分別去過美國同北京再進修幾次，brainstorm 同 upgrade 自己的化妝思維 + 技術。

之後又再用 3 年時間，從工作中 combine 所有自己的新舊化妝思維 + 技術，不斷磨練試驗，希望創出一套新的化妝技術同觀點。

講到底，其實係想迫自己轉變，要見到一個更好的自己。

直至上年開始，我終於擺脫到自己個樽頸位重生，又再正式接新娘化妝工作~

雖然呢一別係好漫長，期間亦婉拒過好多想搵我化妝的新娘子，而且又少了好多 income，但我認為好值得! 

執著成 6 年唔接新娘妝，去探討自己的化妝技術可以點 enhance 係好顛，但至少我覺得而家化出來的妝係對得起自己，亦對得起所有信任自己的新娘子~