Laura Mercier「Silk Crème Moisturizing Photo Edition Foundation」絲緞光粉底液 review

今次 share 嘅 Laura Mercier「絲緞光粉底液」並唔係新出品，印象中都出咗年幾兩年喇。

至於點解唔買佢新嗰支「Flawless Fusion Ultra-Longwear Foundation 」，而揀買舊嘅「Silk Crème Moisturizing Photo Edition Foundation」呢? 

秋冬嘛~ 當然係想揾隻更加滋潤嘅粉底啦~ 😌

其實揀 foundation 最緊要都係適合自己皮膚 x 適合季節用啫，係唔係新出品都係次要。加上我又鍾意有遮瑕度嘅粉底，而呢款剛好主 sell 滋潤 + 貼服 + 高遮瑕度嘛~

產品資料 →

Silk Crème Moisturizing Photo Edition Foundation

絲緞光粉底液

糅合高度遮瑕及長效持久配方，有效讓臉上幼紋及瑕疵消失，完美遮瑕之餘沒有面具感，更能維持長達 12 小時持久度。即使面對香港潮濕天氣仍時刻保持最佳狀態，打造水潤亮澤妝感。

約 $450 / 30ml @ https://www.lauramercier-hk.com/en/index.php

買咗一排，確實價錢已經唔記得咗，大概係呢個價位。

我用的色號 : Medium Ivory 

唔好以為望上去好深色，其實搽上面膚色係剛剛好~

質地屬稀身 cream 狀，介乎 cream 同乳液中間 →

質感柔滑好好推~ 👍🏻

搽勻後會有輕微光澤感 →

遮瑕度亦唔錯，雖未至於有所講咁高遮瑕度，不過都好足夠~

而 "有效讓臉上幼紋消失" 呢點就....... 真係要視乎啲 "幼紋" 有幾幼，因為就咁睇就唔多覺可以令手背上嘅紋理消失 😂

不過臉部紋理一般冇手背咁深，都係試上面俾大家過目更好~

用後圖 (未掃碎粉及遮瑕) →

其實早於 2015 年佢推出嘅時候，我已經去 counter 試過，當時嘅感覺係覺得佢唔夠貼面，有啲潤到浮粉，所以當時並無買到。

但事隔 2 年人大咗、皮膚又乾咗，估唔到翻兜再試佢效果又唔同咗喎!

而家係一搽完上面，嗰種光澤感已經好快俾我索晒，完全唔覺得有膠面 feel / 浮粉問題，反而仲幾貼面添! (不過毛孔位都係有啲乾)

before & after →

貼面係貼面，不過可能我真係太乾，佢個 "水潤亮澤妝感" 响我皮膚上完全唔起效用，搽嘅時候明明 feel 到佢好柔潤保濕，但係一搽勻就 9 秒 9 索晒，反而係變咗 "半啞緻霧面妝感"，有少少乾乾哋。😅

混合性皮膚用應該效果會好好多，我太 dry 了~

另外搽上面個遮瑕度其實唔算好高，可以見到只係比起素顏有些少分別，屬中度 coverage，但日常用都夠嘅~

完妝後 3 小時响 salon 再影 →

出到街望返都覺得 ok 的，只不過 dry skin 用會出唔到光澤感效果而已，可以當佢係一支霧面妝感粉底。

至於持久度方面，秋天廿幾度天氣 x 我乾肌計，大約可 last 5 小時，並冇所指嘅 12 小時咁誇張 (佢應該係以外國天氣計)。溶妝後亦算自然，至少冇浮起一達達，只係遮瑕度漸漸消失咗咁樣。  

推唔推介呢支呢?

我覺得唔急買的話可以再睇睇，各品牌陸續都會有新 foundation 推出嘛~ 😊