韓國潮人熱捧! VT Cosmetics 3 款「膠原蛋白精華粉底系列」試用報告 review

今次介紹呢幾盒有 "小金盒" 之稱嘅「VT 膠原蛋白精華粉底」，鐘意去韓國旅行 / 有留意韓國妝品嘅你，應該未見過都有聽過吧?~

事關佢除咗被韓國 / 台灣 / 日本潮人熱捧、响 SNS (社交網絡) 上爆紅之外，仲勁到長踞韓國美妝店 Olive Young 銷量 No.1，响日本開售時更出現長長人龍搶購呀!

能夠瘋魔萬千用家又有咁多網上好評，仲 hit 到而家連香港 SaSa 都有售，相信一定不無原因，等我又分享一下試用報告俾大家知先~ 🤗

VT 代言人為韓國人氣男子組合 BTS →

大家知韓國大部份男生都有化妝習慣，其實就連香港都有唔少男生會搽吓粉底均勻膚色，所以扮靚已不再是女生專利，你見好多韓國化妝護膚品牌都用男星做代言就知啦~

不過用咩明星做代言都僅屬其次，最實際都係件 product 好唔好用，即刻解構吓呢 3 盒 foundation 先~ ☺️

今次 review 嘅 3 款「VT 膠原蛋白精華粉底系列」分有 →

藍色盒 : 藍色海洋骨膠原精華拉花粉底  (控油同時補濕)
粉紅盒 : 紅莓骨膠原精華拉花粉底 (撫平細紋 + 補濕)
黑色盒 : 黑色骨膠原精華拉花粉底 (爆水超補濕 + 抗氧化)

3 款粉底嘅共同賣點 →

⭐️含修護肌膚成份 + SPF50 PA+++ 防曬 + 底霜 + 粉底功能 4 合 1 ，夠晒方便
⭐️具超濃厚膠原蛋白精華成份，化妝同時護膚，可補充 25 歲後流失的膠原蛋白
⭐️固體粉底霜設計，比一般 cushion 粉底更耐用
⭐️妝感水潤貼服，用後肌膚平滑有光澤，特別適合乾性肌 / 缺水肌 / 沙漠肌
⭐️妝效持久不氧化，遮瑕度高
⭐️防水防汗配方，兼具高防曬度，適合水上運動 / 戶外使用
⭐️各有深、淺 2 色選擇 (#21 及 #23)


每款 $220 @ SaSa 獨家代理

每次日韓一有暢銷新妝品推出，市面上例牌會湧現大量水貨 / 假貨，奉勸大家都係去返代理嘅店舖買更安全，加上又有 tester 試質地同顏色，唔使靠估

(trial products given by SaSa)

採用型格金屬粉盒設計 →

感覺時尚奢華，外型同 YSL 嘅 Cushion 粉盒差不多，但售價就平一半 😉

而內裡嘅粉底係拉花圖案設計，仲要每個都唔同花紋，又靚又特別! 😍

透明嘅係膠原蛋白精華 / 膚色嘅係粉底 →

可見精華含量都佔好重比例! 👏🏻


使用方法 :

用粉樸將膠原蛋白精華 + 粉底霜打圈混合，沾取適量於面上輕印或推開。除咗用佢附設嘅粉樸，亦可用自己嘅濕粉掃 / beauty blender 上粉~

先介紹適合而家夏天用、具控油 x 補濕效果嘅 Blue Collagen Pact SPF50 PA+++
「藍色海洋骨膠原精華拉花粉底」→ 

具海洋膠原蛋白、藍色複合精華成份，有如一層水潤保護膜，由內到外令肌膚時刻 keep 住水潤飽滿，同時特別加強了控油及修飾毛孔效果，可避免夏天因日曬缺水而導致的泛油情況。

質感清爽不油膩，細滑不泛白，兼具防水防汗、美白、及高防曬度 SPF50 PA+++ 效能。

一打圈捽已經 feel 到個質感係超級水嫩 →

用手指摸直頭係覺得潤滑到爆~ 😍

試上手可見到遮瑕度一啲都唔弱，而且仲好貼皮膚 →

試上面睇睇 →

第一下搽上面經已 feel 到好濕潤! 最啱我呢類連夏天皮膚都極乾嘅皮膚~

由於屬多合一功能粉底，具 SPF50 PA+++ 又含有滿滿膠原蛋白精華，質感已經好夠保濕，妝前絕對可以唔搽防曬霜，亦唔需要搽 makeup base 打底，搽完用開嘅精華素就可以上粉，的確係方便! 👍🏻

搽 1 層粉底效果 (未掃碎粉) →

單搽一層係透薄 feel，妝感會較自然，均勻膚色零難度，而粉底質地係屬於 buildable 一類，可層層叠加，如覺得唔夠 coverage 可再局部加厚，厚薄可隨意~

粉底分有 #21 及 #23 色，下圖為 #21 色效果，會比較白，適合膚色白晳的人用。

搽 2 層粉底效果 (未掃碎粉) →

搽 2 層嘅遮瑕度係好高! 所有泛紅 / 斑斑 / 黑眼圈等瑕疵都 cover 到，而且顯得皮膚好光滑，完全冇卡粉或起乾紋，反而仲修飾晒啲毛孔同紋理~!! 😍

而妝效係屬於亮澤水潤一類，直頭有爆水 feel ! 的確係好適合 dry skin 用~

下圖係 #23 色效果，如同我膚色差不多咁揀 #23 就好穩陣。

掃完碎粉定妝後效果 →

因為粉底質地夠水嫩，就算掃咗碎粉定妝都冇話覺得乾，皮膚仍然透到粉底嗰層光，亦冇令到毛孔 / 乾紋現形，覺得妝效比平時貼面咗、細緻咗! 👍🏻

雖然自己都鐘意韓妝嗰種水潤妝感，但以香港咁潮濕計，都係掃返層碎粉定妝好，個妝先會更 long keep~

至於持久度，以我 dry skin 計大約可 last 6 小時，中途粉底會漸漸變薄，但就冇浮粉 / 氧化變色問題出現，補補妝就 ok。奇就奇在明明個粉底咁水潤，以為應該會好快出油溶妝啦? 點知竟然全日都冇出過面油喎~~


重點一提 dry skin 用呢盒粉底嚟補妝係一流!

比用乾粉餅補妝更保濕，冇咁乾之餘仲要有遮瑕度，可 cover 返溶妝現形嘅黑眼圈 / 暗瘡印 / 斑斑，又可以抹得走溶化咗瑕疵 (乾粉餅就做唔到呢點喇)~ 👏🏻

防水測試 →

既然話係防水防汗，適合戶外活動用，我又沖水試試，好明顯見到個粉底係識得跣水的 ☔️

 粉底係冇溶開過，見到水珠只會停留於表面 →

輪到試有撫平細紋 + 補濕效果嘅 Berry Collagen Pact SPF50 PA+++
「紅莓骨膠原精華拉花粉底」→

蘊含膠原蛋白、人蔘果、及多種紅莓複合精華成份，有效增強肌底營養，亮白滋潤肌膚，長期使用更可改善暗啞問題。粉底質地細滑柔順，就似羽毛一般輕盈貼服，同時具超強遮瑕度，能輕鬆遮蓋痘印瑕疵，妝效持久而不氧化。

搽上面效果 →

感覺同剛剛介紹過嘅 "藍盒" 大致上差不遠，但呢款 "粉紅盒" 粉底妝效就更透薄、更輕盈、更保濕、亮白膚色效果亦更明顯，有修飾暗黄膚色效用，較適合愛自然淡妝的缺水皮膚用~

遮瑕度雖比 "藍盒" 薄身少少，但日常用都足夠有餘了，均勻膚色效果同樣唔錯~ 

聽聞韓國最搶手、再三賣斷市嘅就係呢款 "粉紅盒"，但我就認為呢盒亮白感較明顯，會更啱膚色白晳的人用，建議膚色偏黄的話都係揀 "藍盒" 更好，況且以夏天用計都係 "藍盒" 合適啲，而 "粉紅盒" 就更適合秋天用~

最後係超補濕爆水 + 抗氧化效果嘅 Black Collagen Pact SPF50+ PA+++
「黑色骨膠原精華拉花粉底」→

蘊含豐富營養成份包括膠原蛋白、超微細份子透明質酸 Oligo HA、名貴的黑色複合精華 (黑魚子、黑珍珠) 等等，化妝同時保濕鎖水，有助回復肌膚飽滿彈力，袪皺抗衰老，令肌膚增添光澤，改善暗啞，能打造無瑕美肌與貼薄細緻的自然妝容。

單睇產品資料，都估到呢款應該係最適合成熟肌 / 極乾沙漠肌用~ 

韓國底妝品我一般係用 #23，不過呢盒我又貪新鮮試試 #21

搽上面效果 →

雖然 #21 色都冇想像之中咁白，不過當然都係 #23 會最夾啦~

而呢款 "黑盒" 粉底係 3 款之中最滋潤、最有光澤、撫平乾紋 / 毛孔效果最強的，妝感自然得嚟遮瑕度又唔低，好似有美肌 feel 咁，果然係為中女 dry skin 而設呀，擊中晒要害 haha~ 😍  

不過因為始終有啲潤身，夏天用要勁乾嘅皮膚先用到了，都係留返秋冬用更合適~

3 款粉底質感分別一覽 →

3 款都為乾性肌 / 缺水肌而設，個人認為 :

"黑盒" 係最滋潤，特別適合超乾皮膚 / 成熟肌，秋冬用仲正
"粉紅盒" 係美白提亮膚色效果最明顯，有點偏白，適合皮膚白的人用
"藍盒" 係最高遮瑕度，兼且保濕得來有控油效用，較適合 dry skin 夏天用

總括評價 →

首先以外型計，VT 的確係可媲美 YSL 氣墊粉底，尤其黑盒嗰盒直頭有 90% 相似，但以粉底質感計，個人認為佢仲好用過 YSL，YSL 太薄太乾了，唔適合偏乾皮膚，仲要冇乜遮瑕度。

以開架品牌計，$220 價位有咁嘅質素 + 包裝著實難得，一啲都冇粗製濫造，回購度指數高，明白點解佢會被熱捧! 不過由於 3 款粉底都係為 dry skin 而設的，質感同妝效都係水潤爆水韓妝 feel，所以就唔係好啱油性肌膚用了。

報告完畢~~~~ ☺️