矮小孕婦一週穿搭 (夏 8 月初) 🤰🏻孕裝購買 tips

今年好旺 B 呀~ 身邊好多朋友 / 學員 / 化妝師都大緊肚，認真可喜可賀~  👶🏻

不過若果好似我咁，得 5 呎 2 身高仲要陀住個 B，少不免會變到又矮又肥呀..... 咁矮小嘅孕婦又可以著咩衫令自己望上去冇咁臃腫呢?

其實個肚一般未去到 4-5 個月都未現型，而真正變巨肚亦只係短短幾個月時間，著返鬆身少少嘅普通衫 / 連身裙都得，唔一定要著孕婦衫，所以我都盡量只揀普通衫買，等生完 BB 瘦返之後都著得到，唔會浪費嘛~

Share 近期 outfit 俾各位準媽媽參考，由於著嘅都並非孕婦衫，普通人都啱睇架~ 🤗

而家係孕 5 月，不過肚型同 BB 都偏大，望落去似 7 個月→

黑色雪紡背心連身娃娃裙 →

呢條裙並非孕裝，係未懷孕前買落的，只係剛好夠鬆身，又有 S / M / L 碼分，質料輕薄通爽舒服，一啲都唔透光又唔侷身，cutting 仲要係 A line 落 + 裙尾有 ruffle，好顯瘦添! 😍

著緊呢條只係 S 碼，我咁大個肚著都唔窄兼有位剩，到秋天涼少少時加件外套就得~

購自淘寶只需 RMB 85 !

https://detail.tmall.com/背心連身裙

而普通人著就會係咁 →

露膊 ruffle 連身裙 →

呢條亦非孕裙，普通人著的話加條草織 belt 响腰就可以好潮喇~ 👍🏻

勝在有 size 6-18 碼，孕婦一定啱著，棉質布料極度舒適，唔熱唔透光，最緊要係布料有下墜感，好顯瘦! 著緊呢條係 size 8 (等於 size S)，已經好夠鬆~

同一條裙普通人著效果係咁 →

有黑 / 深藍 / 橙 / 橙碎花圖案 / 藍碎花圖案揀，幾個月前已經買咗條橙色碎花 $299，點知前日經過見到做緊 sale 減到 $159 ! 即刻買多條深藍色替換吓~ 😆

購自 Marks & Spencer $159

黑色短袖縛帶連身裙 →

呢條裙亦係未懷孕前買的，雖然而家個肚咁大係 feel 到窄咗，但仍然著得落。已經買咗好耐了而家可能已 sold out ($300 幾)，不過店內亦有其他連身裙款~ 😊

Rare Element Shop 韓裝

https://www.facebook.com/rareelementshop888/

矮小孕婦揀連身裙 tips

🤰🏻長度揀膝上 2 吋、或剛過膝 2 吋，就唔會有睡裙 feel，視覺上身高比例更均稱

🤰🏻裙尾有開叉 / 有 ruffle，或 A line 上窄下闊款 / 下墮感布料都會更顯瘦

🤰🏻揀胸位 / 腰間有 cutting 款式，能將視線焦點集中更顯瘦

🤰🏻避免揀一幅布直落零 cutting 零 detail 的裙款

鬆身長 tee 亦係孕婦必備單品，假日一件長 tee 加 legging 簡單又舒服 →

陀住 BB 體型一定會比平時更圓潤臃腫，鬆身長 tee 既可遮手臂又可遮 hip，而「上身鬆 + 下身窄」呢個永恆穿搭法亦夠顯瘦 👍🏻

紅 tee 並非孕裝，購自同一間韓裝 boutique，不過又係已經買咗幾個月了而家可能已 sold out ($200 幾)，但同類 tee 款店內超多選擇，唔怕揀唔啱~ 至於下身孕婦 legging 就試過係 Uniqlo 最舒適! (約 $80-90) 

Rare Element Shop 韓裝

https://www.facebook.com/rareelementshop888/

矮小孕婦揀 tee tips

🤰🏻長度揀剛過 hip 4 吋內會最 perfect，望上去雙腿比例更修長

🤰🏻心口有圖案的 tee 能將視線焦點移高，令身高比例望落冇咁矮

🤰🏻衫袖揀闊身的，再自己捲起 2 褶，望上去手臂會更幼

🤰🏻legging / 牛仔褲最好揀基本款，零褲袋 / 零圖案 / 褲腳零開叉的最顯高顯瘦

鬆身白 tee 都係購自同一間韓裝店 ($200 幾) →

又係未懷孕前買落，不過孕婦著短 tee 會特別現肚，仲會因為個肚變大而撑大縮短件 tee 長度，對孕婦嚟講係更加顯胖，如襯長牛仔褲會仲臃腫，改襯短牛 causal 著會好啲~

其實短 tee 孕婦亦非 carry 唔到，只要外加一件中長款外套，就能夠改善短 tee 顯胖缺點了! 不過而家天氣咁熱就....... 😅

緊身短 tee 襯連身褲 →

未有 BB 前屋企總會有一堆緊身短 tee，其實孕期都未必著唔返，只要將衫尾收入連身褲內，就唔覺件衫太短太窄了~ 而連身褲襯緊身 tee 仲會比襯鬆身 tee 更顯瘦添 ✌🏻

連身牛仔褲非孕裝，雖然 free size 冇碼分，但勝在夠鬆身，孕婦都啱著~ 

普通人著起效果係咁 →

我都好期望自己生完 BB 後，再著起呢條褲時會有 model 呢種纖瘦 feel ! 但睇怕生完都要努力一輪先瘦得返了 😂

購自淘寶韓裝代購 (RMB 218)

https://item.taobao.com/韓國連身褲

孕裝短牛亦係購自淘寶 → 

同類短牛差不多每間淘寶孕裝店都有，約 RMB 70-80~

呢條褲我唔 po 連結，係因為佢突然加咗價變 RMB 200 ! 明明我 2 個月前買係 RMB 65 ! 

最後~ 

雖然懷孕心情係好興奮 (尤其如果係第 1 胎)，但其實你諗真啲......

由現肚 (孕 4-5 月) → 變巨肚 (孕 6-10 月) → 產後未完全修身期

極其量都係半年時間多啲! 所以建議唔好買太多孕裝，亦唔好買太貴喇，生完好快就唔會再著，慳返啲 $ 用來買 BB 衫 / BB 用品仲實際~ 👶🏻

孕裝我係咁買的 →

🤰🏻上身唔買孕裝，只買普通鬆身衫 / 連身裙 / 連身褲，生完 BB 後仲著得返唔會嘥

🤰🏻孕裝牛仔褲我只會買 1 條，因為無論布質幾軟都好，亦唔會夠 legging 舒服兼高彈性

🤰🏻孕裝 legging 會買 3-4 條，唔夠仲有連身裙 / 連身褲可以著

🤰🏻睡衣家居服揀開胸哺乳款式的，可由孕期著到產後，方便餵人奶

🤰🏻孕期冇鐵線胸圍同樣揀開胸哺乳款式的，道理同上

🤰🏻孕婦內褲 / 胸圍要準備多少少，因為產後會有惡露排出要經常更換內褲，亦極度容易滲奶 (有即棄式胸墊都係咁話)，固內衣要經常清洗更換

另外 →

雖然偉大嘅淘寶係乜都有又夠平，但孕期托腹帶就千萬唔好慳! 買日本貨承托力同質量都最好，內地貨承托力同質料都偏差，無謂為咗慳少少同自己條腰作對呀! 😉