D.U.P 新出「Orishiki 折式 ● 隱形薄膜雙眼皮膠水」review

早幾日響 Facebook 提到買咗呢支 D.U.P 新出「Orishiki 折式 ● 隱形薄膜雙眼皮膠水」，又話係日本 Cosme 第 1 位，估唔到完全係賴嘢之作..... 😬

本來已經想掉咗佢，但又有唔少留言話想知佢有幾賴嘢?  😅

襯臨掉落垃圾筒前出出圖先 haha~

產品原理 →

同一般有黏力嘅雙眼皮膠水唔同，呢支係 "完全唔黏身" 嘅膠水。搽上眼皮乾透後會形成一層隱形薄膜，靠薄膜厚度去支撐起沉重眼皮，從而變成更明顯嘅雙眼皮。

就似係貼雙眼皮膠紙原理，只不過呢款膠水就薄身好多~

約 $118 購自旺角朗豪坊對面 Watson's (並非間間 Watson's 有)

官方示範 →

用法簡單易明，新手亦能掌握，加上係無黏性，感覺亦較清爽自在~

圖示用法 →

Step 1 : 先化好眼妝 

必需先化好眼妝才用，而且只能用眼影粉，不可用眼影霜

Step 2 : 用附送嘅膠棒 / 眉鉗之類輕力按壓眼皮，揾出自己想要嘅眼褶寬度

高度視乎個人喜好，而最理想嘅高度係離開睫毛位約 3mm

Step 3 : 將膠水搽上眼皮，位置係由你想要嘅眼褶高度一路搽至眼線位

需避開已畫好的眼線

Step 4 : keep 住向下望，保持眼皮平坦約 30 秒、未乾前唔可以睜開眼

done : 確認乾透後就可以睜開眼，雙眼皮自動形成

驟眼遠睇好似好成功冇乜嘢，不過當一 close up 近睇 →

就好似整容失敗咁嘅樣......

攪到搽咗佢嗰幾日人人都問我對眼發生咩事?..... 😨

膠膜偏薄，承托力不足 →

乾透後嘅膠膜由於頗為薄身，並唔係太夠力承托起眼皮，我分別試過搽唔同位置 / 高度 / 厚度，都只係得一隻眼成功、另一隻眼係完全撐唔起.......

如果搽厚少少又會勁勁反光、勁顯眼! 😣

而成功托得起雙眼皮嗰隻眼，效果亦頗為反光，並非所講咁隱形，唔多自然，所以試咗幾日宣佈掉得...... ☹️

但不排除有啲人用係 ok 的，只不過冇我份.....