Bobbi Brown「REMEDIES 急救煥膚原液系列」用後感

上次朗豪坊 Beauty Gala 優惠時買嘅 Bobbi Brown 原液, 不經不覺都試用咗 1 個月喇, 係時候 share 用後感~ 

呢套「REMEDIES 急救煥膚原液系列」total 有 6 款功效選擇, 包括有針對嚴重缺水 / 敏感 / 皺紋 / 美白 / 抗氧 / 暗瘡肌膚嘅原液, 可因應需求急救肌膚不同問題。

而我最 concern 嘅就係缺水 + 皺紋, 所以就買咗「透明質酸補水原液」+「沒藥樹抗皺原液」→

原液 vs. 精華液有咩分別?

原液 = 從單一原材料直接提取嘅精華液, 亦可當成係濃縮版精華, 由於濃度 + 滲透度都比普通精華液高, 效果更具針對性, 所以售價都會較貴。

至於 Bobbi Brown 呢套原液, 官網同包裝盒就完全冇 mention 濃度 % 係幾多, 不過原液呢樣嘢亦唔係高濃度就代表一定高效, 或低濃度就一定低效嘅, 都係要試過先知 😉

每支 $420 / 14ml @ http://www.bobbibrown.com.hk

老實講咁細細支賣成 $420 係貴嘅! 不過因為係濃縮版每次只需用 2-3 滴, 我用咗 1 個月都仲有半支剩, 估計每支約可用 2 個月, 都算係咁啦。

但如果平時叫我買就未必會吼佢喇, 都係睇在上次 sale 有唇膏送份上先買嚟試下 😅

透明質酸補水原液 →

為強效保濕配方, 能即時為乾燥肌膚補充水份, 同時活化肌膚天然儲水功能, 肌膚用後瞬即水嫩, 綻放健康光澤。

我一向慣用至少 2 款唔同大小份子精華, 會先用細份子精華補充肌底水份 + 再用大份子精華保養肌膚面層, 認為咁先夠全面, 而呢支「透明質酸原液」係屬於細份子的, 超快滲透。

沒藥樹抗皺原液 →

蘊含多種天然抗皺成份, 有效減少皺紋深度, 平滑肌膚紋理, 能即時並長效地解決紋理問題, 同時能刺激肌膚膠原蛋白生長, 支撐肌膚的脂質屏障, 明顯提升及緊緻肌膚。

呢支係屬於中細份子, 又係秒速吸收嗰種。

2 支嘅質地分別 →

左 : 透明質酸補水原液

右 : 沒藥樹抗皺原液

用後感 →

先講支「透明質酸補水原液」, 延展度雖好, 用 2 滴已可搽勻全塊面, 亦能秒速吸收, 不過補濕度就真係弱咗啲, 搽完好似一陣風冇搽過嘢咁, 搽勻唔使 5 秒摸上塊面經已係清爽嘅, 係勁微弱嘅補濕感...... 

當然我唔可以話佢零效果, 肌底都吸收到少少嘅, 只係 so sorry 無論感覺上 + 肉眼睇我都係只 feel 到補濕咗丁點...... 🙄

至於支「沒藥樹抗皺原液」就好好多!

搽完真係即刻睇得到有泵漲咗紋理 + 毛孔, 皺紋望上去確係平滑啲, 整體膚質都 smooth 啲, 摸上塊面亦 feel 到皮膚軟綿綿 soft 咗咁~ 👍🏻

但缺點又係冇乜補濕度。我皮膚咁乾, 夜晚用咗佢就算隨後再搽 night cream 都覺得唔夠潤, 中間都要再加多支補濕 serum 先夠。同埋呢支原液嘅延展度係好低, 變相每次份量要用多啲先夠搽勻全面, 效果好但就唔多抵用。

另外 Bobbi Brown 姐姐話呢支原液可以 mix 眼霜搽, 我就冇 mix, 直接當佢係 eye serum 搽埋眼底, 撫平眼紋效果確係正嘅! 仲即時睇到少少效果𠻹! 🥰

認為呢支都算值得試, 只係咁細支全面搽就嘥啲囉, 如果剩係局部用嚟搽眼底 + 面上有皺紋或毛孔位置, 咁就值回票價~