本地創作「ZOAY」化妝掃 😍 平靚正!!

上星期行行下商場見到有間精品店, 耳環首飾 / 香薰 / skincare / 擺設 / 手機殼乜都有, 全部都係唔同牌子寄賣形式咁, 走入去行個轉八卦下啦, 竟然見到有化妝掃賣喎! 

仲多到有幾十款揀, 有齊 tester 任試𠻹! 結果摸摸下就摸咗 2 支返屋企喇 💸🤣 

重點係勁平 $69 蚊支咋!! Quality 仲要唔差!  😱

決定買之前都諗過, 咁平通常唔係台灣就內地造吧? 上網 search 完原來係本地創作, 所有化妝掃都係「人造纖維」製 (非動物毛), 仲有唔少 blogger 推介過~

但亦要留意本地「創作」未必等於「製作」, 除非講明係 made in hk (唔見 website 有寫), 否則大多都係 OEM 畫圖俾廠商生產, 而一般咁平嘅化妝掃大有可能都係 designed in hk 但 made in China 或 Taiwan 等等。 

最緊要都係買咗要洗過先好用 😉

ZOAY Website : https://www.zoaybeauty.com

Facebook 專頁 : https://www.facebook.com/ZOAYbeautybrushes/

網店係香港包平郵, 便利店 / 順豐站 / 智能櫃自取免運費, 買滿 $180 就免速遞費送上門

#1 香檳金大頭伸縮掃 $69 →

最近想買支方便帶出街補妝 / 去旅行用嘅「有蓋 mini 伸縮碎粉掃」, 睇過好多, 一係就太細支毛量唔夠多、一係就柄身太長或太濶唔夠 mini、一係就毛質勁差、一係就外型勁 cheap, 總之全部都買唔落手, 直到遇上呢支 🥰

淺香檳金色柄身設計, 望上去完全 presentable 出得廳堂~  

係略嫌柄身輕身咗少少啫, 唔夠手感, 但咁嘅價位都無謂雞蛋裡挑骨頭 😜 

毛質方面係夠鬆軟舒服, 一啲都唔刺肉, 邊沿 tip 位亦剪裁得夠尖幼夠 smooth, 毛量夠多兼每條毛毛都好幼細, 以 $69 支纖維掃嚟講質量已算好 top, 唔係嗰啲 cheap cheap 纖維毛 👍🏻 

唯一美中不足係人造纖維造, 而非山羊毛, 雖然現時興用纖維掃 (售價平 + 可乾濕兩用 + 愛惜羊毛), 但如有得揀的話, 個人偏愛碎粉掃還是羊毛的好......

人造纖維 vs. 動物毛化妝掃

動物毛 : 呈彎曲狀 + 表層有凹凸毛麟, 抓粉力及貼粉度特別好, 毛質亦較鬆軟, 尤其適合掃乾粉類妝品 (如碎粉 / 胭脂粉 / 眼影粉..... 總之任何粉), 唔會出現跣粉浮粉 / 脫妝 / 唔均勻問題

人造纖維 : 呈直線膠質滑面, 質感較挺身硬淨, 本身係為任何濕嘅化妝品而設 (如粉底液 / 遮瑕膏 / 胭脂膏 / 眼線膏), 如夾硬用嚟掃乾粉會較易出現跣粉滑粉 / 較厚妝或唔均勻情況

其實 2 款毛質嘅結構原理 + 用途性質 + 用法方式本來就有分別, 有時用錯質地亦非技術能搭救, 當然夾硬化係冇話化唔到嘅, 只要唔係完美主義者的話~

如只為補妝 / 去旅行但求輕便計, 又真係唔使太高要求嘅, 睇在 $69 蚊份上我配合 😂

另外通常買親「伸縮蓋化妝掃」都會有個 concern, 就係用用下會開始損耗, 蓋位易變鬆關唔實咁點算?? 呢個情況係好常見㗎喎??

勁在 ZOAY 啲掃咁平竟然係包 1 年保養! 有壞包換! 真係嚇死~~ 🤩

(不過諗深一層呢, 其實咁平如有壞的話, 直接換支新嘅俾你成本亦唔高嘅)

#356 香檳金短毛粉底掃 $69 →

類似嘅圓頭濕粉掃我係有嘅, 不過就唔夠呢支咁 mini, 加上又想試下佢咁短毛好唔好用, 見佢外貌設計夠簡潔夠潮, 柄身手感同重量亦夠扎實, 望上去絕對唔似廉價貨, 價錢咁平一試無妨 😌

官網描述 : 可輕易推開液狀 / 霜狀 / 膏狀粉底, 打造持久貼服底妝的好幫手, 妝感透薄自然

至於上粉效果呢~

買得呢類圓頭 foundation brush 就梗係為貪快貪方便啦! 可以碌幾碌就上完粉底~

分別試過用佢掃唔同質地粉底, 都 ok 唔錯喎! 毛質纖幼得來都頗有回彈性, 毛量又勁多, 上粉效果好均勻, 絕對係平得嚟好有誠意嘅作品! 👍🏻

不過就要留意因為呢支 brush 毛頭極短, 令毛毛變得更集中更挺身, 所以粉底份量一定要勁少勁少, 否則會厚妝及有掃痕。

建議先將極少量粉底用手指分幾點印上面 (面珠 + 額頭 + 鼻尖 + 下巴), 然後先用呢支掃碌開。如直接將粉底唧落支掃碌上面, 就會勁厚勁多掃痕。

暫時覺得呢 2 支都唔錯, 用過幾次又唔見有甩毛, 值得推介 👏🏻

但係咪幾十個款支支掃都咁好用呢? 咁又未必兼唔知道喇, 雖然我支支 tester 都摸過, 但始終都係要試上面化起妝先知, 而且化妝習慣 + 喜好呢樣嘢又人人唔同, 好難一概而論~