Shiseido 新出「Synchro Skin 感肌同步持久底妝系列」用後報告

今次敗家係俾個客引誘嘅~ 話說客人過來紋眼線時話 Shiseido 出咗新粉底, 好似好好用咁, 問我試咗未? 於是我放工就即刻走咗去 Shiseido 八卦 😆

發現成個「Synchro Skin 底妝系列」原來都出咗幾多嘢喎! 剛好見 counter 冇乜人我就全部試試, 最後買咗粉底液 + 遮瑕膏 + 碎粉, 用咗 2 星期, 報告一下效果先~ 

全新 Synchro Skin 感肌同步持久粉底 SPF35 PA++++ →

質感仿如護膚乳液, 無重清爽零負擔, 採用 ActiveForce™專利技術, 能自動感應肌膚狀態, 無懼潮濕炎熱天氣, 持續為底妝注入清爽感覺, 具完美遮瑕度之餘能自然得媲美素肌, 更可自由調節重疊遮瑕度, 妝效 24 小時長效持久, 全日清爽自然。

不含香料, 經皮膚科專家敏感程度測試, 不易形成粉刺

$360 / 30ml 共 12 色選擇 @ Shiseido

官網 : https://www.shiseido.com.hk

FB 專頁 : https://www.facebook.com/SHISEIDOHK

主 sell 自然妝感 + 清爽兼保濕 + 防水防糊化抗潮濕 + 防脫色

btw 自從上年 Shiseido 妝品改晒用黑紅色 packing 之後, 即刻洗脫娘味變潮咗! 👍🏻

買嘅係 #230 Alder →

刻意揀比自己膚色深少少, 個人偏好用深半號色 foundation 可 cover 更多瑕疵, 搽上面其實並唔覺太深色, ok 的~

屬乳液質感 liquid foundation →

質地順滑, 易推開易塗抹 →

試過用手指 / 濕粉掃 / Kabuki brush / beauty blender 搽佢全都 ok, 但認為用 Kabuki brush 或手指搽呢支粉底效果最好 😉

用後感在底部, 介紹埋支 concealer + 碎粉先~

Synchro Skin 感肌同步水凝遮瑕膏 →

嶄新設計結合 3 種尖端啫喱質感, 質地柔潤順滑易推, 妝感如氣墊般輕盈透氣無重不卡粉, 能瞬間遮蓋瑕疵及皺紋, 同時抗潮濕抗糊化, 長效貼服 24 小時, 帶來全日水潤保濕效果。

具中度遮瑕, 經皮膚科專家敏感程度測試 + 眼科專家測試

$260 共 6 色選擇

特別愛用呢類 concealer stick 遮瑕棒, 使用方便之外, 又冇 "開口瓶式" 嘅遮瑕膏咁易接觸到空氣 + 細菌 + 塵, 萬一污漕咗都只需用紙巾抹走頂嗰層就 ok, 感覺較衛生 😊

試上手質感的確係好軟滑柔潤, 完全唔覺得乾 →

至於試上面效果係點?

等我介紹埋佢盒碎粉一次過講 ☺️

Synchro Skin 感肌同步絲滑蜜粉 →

蜜粉表面覆蓋護膚成份, 令蜜粉更貼肌膚, 如空氣般輕盈透氣舒適, 如絲般順滑易推。微細的蜜粉能抑制油光, 撫平毛孔及幼紋, 塑造持久妝效。

經皮膚科專家敏感程度測試, 不易形成粉刺

$350 / 6g 共 2 款選擇 (光感 / 啞緻)

採用彈性網層設計 →

因粉質特幼, 所以網層密度都比市面上其他牌子更密 →

容量只有 6g, 比一般碎粉細盒, 好似唔多抵......

不過用後就覺得佢啲粉真係好貼面, 唔需要太多粉量都定到妝, ok 吧

設 #01 Radiant 光感 / #02 Matte 啞緻 2 款質地選擇 →

2 款都係透明粉, 適合任何膚色, 油性肌可揀 Matte, 乾肌或愛有少量透光感的可揀 Radiant

我買嘅係 Radiant 😊

btw 買嗰陣剛好做緊 promotion, 買滿 $970 有一套 travel set 送 →

Shiseido 就係有呢度好, 成日都有嘢送 🎁

送嘅 travel set 包括有 →

洗面膏 + 卸妝油 + 健膚水 + 面霜 + 化妝鏡, 除咗面霜比較細盒之外, 其他都算大支

三件妝品搽上面效果 →

粉底

質地好貼面,  冇任何卡粉 / 難推 / 唔均勻問題, 感覺偏清爽啞緻, 冇油膩感冇油光滿面, 雖則唔算話乾, 但保濕度亦唔係高, 以而家初秋天氣搽完 skincare 用佢還可以, 冬天就應該會唔夠潤 (我乾)。

Coverage 方面都算高! 均勻到膚色, 遮掩到 8-9 成泛紅同雀斑之餘, 妝效又的確係好自然, 唔厚粉冇面具 feel, 皮膚冇負擔透到氣。持久度都唔差, 雖然冇佢所講可以 last 24 hrs 咁耐, 不過半日 6-7 hrs 係冇問題, 期間都只係 T-zone 出咗啲啲油 (好輕微), 但遮瑕度就仍然 keep 到。

感覺油性肌 / 混合肌會適合啲, dry skin 用就一般般 😊

遮瑕膏

質地真係好夠柔潤保濕 + 唔起紋 + 貼皮膚, 眼底乾的人會好鐘意! 不過遮瑕度 + 持久度就唔算好高, 只屬中等, 我用就要印多兩層先 cover 到個黑眼圈, 亦未覺得有佢所講咁抗潮濕, 約幾個鐘後都有少少溶化要補妝。

只勝在質地夠潤吧, 都係一個優點嚟嘅, 雖則我認為遮瑕度唔夠高

碎粉

盒碎粉有驚喜~!! 😚

我買的 #01 Radiant 光感定妝粉, 唔係一粒粒閃嗰種, 屬於輕度透亮半啞緻妝效, 最啱我呢類怕乾 / 唔鐘意 matte look 嘅人 (太 matte / 太控油皮膚望上去會顯紋兼冇光采)

微光得來又唔會似出油, 反而仲覺得控油度 / 持久度幾 ok 𠻹! 粉質又超細滑極輕薄, 少少粉量就定到妝, 好貼面好 natural, 真係仿如無物咁, 又撫平到毛孔細紋! 好 good~~ 😍

唯一就係呢.......

粉質真係打磨得 超∙勁∙幼, 所以個彈性網層密度都係特別高, 用一般碎粉掃係完全攞唔到粉, 倒粉出嚟用亦唔得, 啲粉仲輕身過輕煙, 一陣風就冇咗, 只能用附送嘅粉樸 / 或佢新出嗰支紅色成朵花嘅 kabuki brush 上粉。

我係用佢附送嘅粉樸上粉, 啲粉輕飄飄到都睇唔到粉樸沾咗幾多粉, 只能靠估靠感覺, 同埋每次用都必定會有啲粉飄落地嘥咗  😅

不過妝效好就得啦~