「heme 矽膠粉樸」 review

幾個月前 IPSA 推出過嘅 "透明矽膠粉樸" (購物附送形式)，完全顛覆傳統，唔單止質地 Q 彈 + 方便清洗 + 節省粉底，外型仲勁 cutie，非常有噱頭，隨即瘋魔整個化妝界，唔少人用過都讚好!

不過 IPSA 我就搶唔到喇，退求其次唯有改買網絡瘋傳嘅台灣「heme 矽膠粉樸」試啦，見佢質地近乎一樣，亦有好多人讚，效果應該都差唔多嘅。

試咗幾日，又係時候寫個 review~

質地有 d 似矽膠鞋墊 / 胸墊 →

摸上手非常柔軟，有種想不停捏佢嘅衝動 hahaha~

賣點
- 水滴型尖角設計方便用於鼻翼 / 眼周等微細部位
- 採用具彈力與透明度的醫療級矽膠，粉底不會滲入粉樸，不浪費粉底
- 易於清洗，比傳統粉樸更衛生，壽命可長達 10 年
- 可配合粉底液 / cushion 粉底 / 胭脂霜使用
- size 細小，可放入粉餅盒方便補妝

$49 @ Wishh!

用後感 →

我分別試過用佢嚟上唔同牌子及質地嘅粉底液 / Cushion 粉底 / 粉餅。

首先上粉感覺的確係超順滑，亦有一種富光感嘅水嫩底妝效果，而且好慳粉底~

不過就非常之跣粉，感覺係 d 粉完全吸附唔到皮膚，浮咗响面層，而因為層粉浮响面層會無咁快被風乾，所以就會有種光感水嫩 feel，但缺點就係要等耐 d 先可以掃碎粉定妝，否則會因有濕氣而黏到大量碎粉 = 更厚妝 + 到下午會更易浮粉。

亦因為太跣粉，所以只能做到好薄嘅底妝，冇乜遮瑕度。若果有任何凸起嘅瑕疵，就更加唔使旨意遮到 (例如暗瘡 / 凹凸洞)，因為佢一去到凸起嘅位就會自動跣走 d 粉。

鼻翼位直頭係跣到上唔到粉，如果鼻位皮膚乾嘅話，仲會卡粉卡到爆炸.....

配合粉底液用都仲話勉強 ok (都真係好勉强)，但 cushion 粉底就真係唔得，氣墊粉底本身已經好薄，用呢個矽膠粉樸上粉就薄上加薄，直頭好似冇搽過粉底咁。而配合粉餅用就乾上加乾。

其實第 1 日試嘅時候已經覺得好一般，妝效一 d 都唔細緻，又唔貼粉，完全唔明點解會有人讚，但我都姑且試多咗幾日，睇吓配合唔同嘅粉底用會唔會好 d....

用完一星期係真心覺得麻麻，尤其乾性皮膚 / 有瑕疵嘅皮膚根本唔適合用，可能要瑕疵比較少 / 年輕肌 / 平滑 d 嘅膚質用先會覺得佢好吧??

而家個矽膠粉樸可以留俾囡囡當玩具玩喇....