The Body Shop 新出有效擊退暗瘡之「Matte Clay Skin Clarifying Foundation」 (啞緻無瑕粉底液) review

近來 blog 文寫少了，video 反而多拍咗，唔知大家鐘意睇文定睇片多啲呢?~ 

我自己就比較 old school，鐘意寫文多過拍片，特別因為我唔太上鏡嘛，拍咗咁多年都仲係唔慣見到自己個樣，總係覺得樣衰衰唔係好似自己咁~ 😆

所以試完一輪密集式拍片後，又再寫返多啲文先~

今次 review 嘅係 The Body Shop 新出「Matte Clay Skin Clarifying Foundation」 (啞緻無瑕粉底液) →

講到化妝同時有效擊退暗瘡 + 高遮瑕度 + 全效啞緻 + 24 小時控油，好似好啱夏天用咁，又等我 try try~

(trial product given by The Body Shop)

產品資料 →

蘊含有機茶樹油精華 + 礦物泥成份，化妝同時有效擊退暗瘡、淨化皮膚、打擊面上油光、透氣度高，具高遮瑕度 + 全效啞緻 + 24 小時控油持久妝效。

不阻塞毛孔配方、不含礦物脂、礦物油，100% 純素主義者適用。特別適合敏感肌 / 油性皮膚肌膚。

$129 / 30ml (共 8 色選擇) @ http://www.thebodyshop.com.hk/tc/Index.aspx

優點係價錢極平，顏色選擇亦頗多，由白晳膚色至古銅膚色都可以揀到心水色調。

質地屬 liquid 及 cream 中間 →

冇粉底液咁薄身，但亦冇粉底霜咁厚重。

都算容易推勻 →

而且頗貼皮膚 →

但由於屬控油粉底 x 啞緻妝效類別，質地的確會有啲乾，遮瑕度亦唔算太高。

試上面近睇 →

(只搽了粉底，未上遮瑕膏及碎粉)

雖然我夏天都會出面油，但本身始終都係乾性皮膚底，所以用呢類啞緻控油粉底難免會覺得乾，搽完會見到毛孔 + 乾紋現晒形，仲差過未搽粉底之前...... (所以揀啱自己膚質適合用嘅粉底真係好緊要!)

遮瑕度就可以見到真係唔太高，只能薄薄均勻膚色，斑點 / 紅印等等全都遮唔晒，未如官方介紹所指屬高遮瑕度。而且因為比較薄身，底妝好快就消失得無影無蹤，持久度著實唔算高。

化完全妝後 →

遠睇都 ok 嘅.....

不過因為支粉底試落我度確實係有啲乾，攪到連搽遮瑕膏都唔係好貼面，掃埋碎粉定妝之後仲更加 dry，導致成個底妝都唔係好貼粉......

估計真係要油性肌 / 學生 / 冇乜瑕疵嘅皮膚先用到喇，唔太適合中女 dry skin 用~