「Crème de la Mer 精華面霜」10 年前 vs. 10 年後用後感

La Mer 呢樽皇牌精華面霜, 我曾經都 K.O 過好幾樽, 約 10 年前 yahoo blog 年代都有介紹過, 並唔係咩新嘢, 用過嘅人亦唔少。

對於未用過嘅人嚟講, 呢樽 cream 永遠都好似好神秘咁, 長年有大批明星 / KOL / 用家讚好熱推, 但亦有人用過話只係好普通, 究竟邊句先係真?

如果你都心思思諗緊咁貴買唔買好, 不如就睇埋呢個 review 先再決定啦~ ☺️

關於 La Mer 研創嘅故仔, 已經係街知巷聞, 等我用幾句勁快交待先 😆 

科學家研創人 Max Huber 博士因一次實驗意外燒傷, 於是自己利用蘊含豐富賦活成份嘅深海巨藻, 經過 12 年研究 + 6000 次實驗研創出獨有秘方, 精鍊出能促進細胞再生嘅成分「Miracle Broth™」, 注入呢樽「Crème de la Mer 精華面霜」內療癒自己被燒傷嘅皮膚。

產品資料 →

蘊藏珍貴滋養 Miracle Broth™活膚精華, 萃取深海巨藻強效再生滋養特性, 有效為肌膚灌注水潤呵護與修復能量, 使肌膚更光澤剔透, 並能顯著減褪幼紋, 展現柔滑緊緻的年輕膚質, 3 天即可療癒乾燥肌膚。

備有 5 款質感選擇, 並不含防腐劑、鄰苯二甲酸酯及硫酸鹽。

$800 (15ml) / $1500 (30ml) / $2700 (60ml) @ https://www.lamer.com.hk/

呢樽 cream 絕對係經典中嘅經典~ 😌

雖然而家出多咗唔同質感, 但個人認為最好用都係 original 潤身嗰款 (我又乾又唔怕潤嘛), 輕透版我用過就覺得一般。

溫馨提示 👉🏻

呢款係只適合 dry skin / 成熟肌夜晚用, 用後會反光油淋淋, 絕對唔啱年輕肌 / 偏油肌, 會潤得滯出油脂粒。 

而佢亦有自己獨特嘅搽法 →

詳細用後感 👉🏻

第 1 次用佢時我只得 28-29 歲, 屬輕熟肌階段, 當年仲算年輕未曾用過啲咁高效嘅抗老面霜, 所以初用呢樽 La Mer 時, 確實係曾經有驚天動地嘅感覺! 

覺得夜晚搽完佢之後, 第二朝皮膚真係好有光澤 + 冇晒乾紋 + 膚質勁飽滿平滑, 一句講晒就係正! 所以隨後就 keep 住回購咗幾次 👍🏻

後來用耐咗就開始覺得膚質已經改善到盡頭, 冇再改善落去了, 於是又不停試其他 brand.....

之後大家知啦, 護膚品選擇愈出愈多, 研發技術又愈來愈 high tech, 平過 La Mer 嘅取代品選擇極多, 就算取代品質感效果唔係同佢 exactly the same 都好, 都似乎冇乜必要再買佢咁貴了。

而家相隔 9-10 年再用返佢, 我覺得效果已經變得一般, 再冇當年初次用佢時嘅驚嘆感喇......

佔大部份原因係 10 年前第 1 次搽高效抗老面霜嘛, 肯定係會比用開嘅普通面霜有明顯改善啦, 但之後呢 10 年間都已 keep 住用過唔少高效護膚品了, 變得有比較, 加上皮膚話晒都老咗 10 年, 唔係就咁搽隻貴價面霜就能夠換來驚喜了。

所以會認為如果係 dry skin / 成熟肌, 未用過呢樽 La Mer, 又想短時間內 K.O 乾紋 + 回復光澤 + 改善粗糙感, 咁用佢確係 good 嘅~ 尤其係開始用第 1 樽時會覺得一流, 但再用第 2-3 樽就可能會變得麻木, 可以再 shop 下其他~ 😉