新手好 / 熟手好, 你估日日條眼線都可以畫得咁 perfect 咩~ 趕起時間上嚟都會手震㗎~ 😆
尤其每個人眼皮 / 眼型 / 眼尾都總有點鴛鴦, 左右眼要畫嘅眼線長短 / 角度 / 粗度都可能要調較, 就算幾熟手都實有甩漏要修改少少嘅 moment 吧? 要抹要改嗰陣大家又會用咩方法?
用棉花棒乾抹? 捽到又紅又痛都未抹到啦.......
用棉花棒沾卸妝水? 會抹到連眼影都冇埋喎......
用棉花棒沾粉底抹? 會有粉底痕兼未必完全抹得甩.......
用細 size 遮瑕掃 + 遮瑕膏抹? 好微細嘅瑕疵就得, 而且個妝都係會花.......
所以呢~ 其實你點抹都係死路一條, 攪到愈抹愈花到時又要再畫過, 倒不如睇下今次推介呢支日本「CM Eyeliner Eraser」幫唔幫到你手~ 😃
Eyeliner Eraser (眼線擦除修改液筆) 並唔係咩新嘢, 類似產品外國有大把, 只係歐美 brand 嘅筆嘴都比較粗身, 係粗到成支 marker 筆咁款, 咁外國人鐘意畫極粗眼線嘛, 當然要用粗筆嘴嘅 eyeliner eraser 先夠抹啦~
但對於鐘意畫幼身眼線嘅人嚟講就冇咁方便了, 一抹就成忽冇咗, 想剩係修改刪走少少位就難啲喇...... 😔
而呢支日本「CM Eyeliner Eraser」就只有 0.1mm 極尖筆嘴, 想修走少少多餘嘅眼線尾 / 眼線頂 / 眼線底...... 都係零難度! 👏🏻
購自 Aeon 百貨, 印像中大約係 $100 有找 →
內含卸妝液 + 美容液, 用後無需過水洗, 可重複使用 N 次, 不過筆嘴就冇得替換, 抹完污糟咗可用紙巾清理一下, 唔會阻礙下次使用。
看圖識字一睇已經明白佢嘅用途 →
話說如果某日你一個唔覺意畫咗條咁長嘅眼線 →
又或者畫得太粗 / 太下垂 / 太上揚....... 總之係唔啱心水嘅眼線.......
只需用呢支「CM Eyeliner Eraser」畫於想清除嘅部份, 就可即時刪走不留痕跡 →
就連超級防水嘅眼線筆 / 眼線液 / 眼線膏都抹得走! 👍🏻
而且佢筆嘴只有 0.1mm, 尖身到幾微小嘅線條都抹得到, 抹完唔會好似崩咗一忽咁「掘」, 眼尾部份抹完都仍可維持尖尖幼幼, 唔使從新補畫過條眼線~
既然連 eyeliner 都抹得走, 咁 eyeliner 底下搽過嘅粉底 / 遮瑕膏當然都會一齊被消失啦~
只需用搽過粉底嘅粉樸印一印 eyeliner 附近, 補返啲啲粉上去就 ok, 其實都好容易啫~ ☺️
雖然未必會日日用得著, 但趕起時間上嚟眼線畫衰咗要改嗰陣, 就會知佢嘅好處了!
沒有留言:
發佈留言
注意：只有此網誌的成員可以留言。