可以慳返 👎🏻 網紅美國 LASVÉ「Mega-Defense Reyouth Serum 瓷肌再生精華」

呢支唔少明星 / youtuber 推介過嘅美國「LASVÉ 瓷肌再生精華」, 出名在有突破性全球獨家專利成份「仿生皮膚透明質酸」, 比普通透明質酸更親膚, 能長效補水保濕之餘, 仲可以即時平滑粗糙肌膚, 撫平皮膚紋理, 屬美國科研品牌, 講到好好用咁, 我都有買嚟試。

不過試完之後, 我只能夠講句 "冇下次"...... 🙁

LASVÉ Mega-Defense Reyouth Serum 瓷肌再生精華 →

周汶錡都有於 IG post 過 →

Sales 姐姐熱情推介話佢勁保濕, 好啱中女皮膚用, 講到話有好多人讚、好多人買咁樣......

產品資料 →

LASVÉ  Mega-Defense Reyouth Serum 

瓷肌再生精華

蘊含高活性白藜蘆醇 + 雙效美白 Brightenyl®成份 + 多種專利如「仿生皮膚透明質酸」+「結締組織重整配方」等等, 有效提高肌膚自我補水及骨膠原增生能力, 從而達到顯著的補濕鎖水、 抗皺、亮澤功效。

精華質地幼滑如絲, 能精準截擊第一道紋, 更具有抗醣化及抗氧化特性, 可防止自由基侵襲, 促進膠原合成, 有效減少並撫平幼紋, 令肌膚重拾緊緻飽滿, 保持水嫩。(濕疹肌及孕婦均可使用)

$780 / 30ml @ http://www.lasve.com.hk

FB 專頁 : https://www.facebook.com/lasve.beauty/

以一個唔算好出名嘅牌子計, $780 真係貴咗啲! 不過當時心諗有啲外國專利科研精華都要咁上下價錢, 如果搽完真係如佢所講咁正, 咁至少都叫值回票價嘅, 都明白要親身試過先知好唔好用, 學費總要付出下.......

奇就奇在呢隻 LASVÉ 打正旗號屬美國牌子, 但就揾唔到美國 website, 冇任何外國網有售, 亦冇任何外國用家 review, 只得 HK 官網, 所以估計應該都係本土牌子但揾外國廠製。

我覺得如果好用嘅話, 係唔係本土牌子都唔緊要嘅, 弊在佢貴得嚟唔好用呢..... 😑

質地屬凝膠狀, 摸上去係厚身啫喱 feel →

一推開嗰下已經覺得好膠, 好滑潺潺, 如同 "遮毛孔 base" 嗰種充滿 silicone (矽) 嘅質感 →

所以冇錯, 佢真係一搽勻就可即時撫平晒啲毛孔細紋, 但卻只留於表面, 屬即時掩眼法效果, 洗完面又打回原形了......

俾我嘅感覺佢真係似化妝用嘅遮毛孔 base 多啲, 頂多係一支添加咗精華嘅毛孔 base......

重點係佢話有補濕鎖水 + 抗皺 + 亮澤 + 水嫩功效, 但我用咗 3 星期不單止唔覺得有補濕到, 反而仲覺得皮膚乾咗, 一搽勻皮膚就啞緻晒, 直頭係控咗油, 摸上去更加係清爽霧面 feel, 搽上面嘅感覺根本就同搽毛孔 base 一樣, 仲要有啲侷身, 好似俾層膠膜封住咗咁, 完全談不上有保濕鎖水 / 亮澤水嫩感 👎🏻

以 $780 計, 我買支保濕精華, 再買多支毛孔 base 分開搽都得, 分分鐘唔使咁貴𠻹!

但唔買都買咗, 而家唯有當佢係一支勁貴嘅控油遮毛孔 base 咁用...... 😔