Shu Uemura 新出粉餅 + 4 色眼影組合

幾時都話 Shu Uemura 出化妝品出得勁快勁多! 

剛剛先推介完佢新出的 100 色眼影，唔夠 2 星期又有新 item 喇!

幾件產品之中，我認為最吸引的仍然係 eyeshadow palette，至於 brow mascara (染眉霜) 就一向都好，只係今次出了新 color 咁解，而新出個盒白色粉餅都唔錯，易出油肌膚可入來望望~

(trial products given by Shu Uemura)

剛剛先玩完日韓 feel 100 色眼影，今次植村秀又玩咩風格?

就係呢類型格、有 character 的個性裸妝喇 →

雖然日常出街唔會化到咁誇，但顏色確係靚，個妝又型又正! 

自化唔化咁誇就 ok 啦~

新登場主角「nude atelier 裸色眼影組合」→

只需心水清少少一諗，其實呢 3 個新組合，都係由剛剛推出個 100 色眼影內的 color 砌成，而分別就係: 

平時自揀顏色砌一盒要 $140 單色 x 4 粒 + 盒 $80 = $640

而今次 nude atelier 3 款組合顏色已 fix 好，冇得揀色就 $480 set 

平左 $160!! (缺點只係冇得逐粒揀色)

實物圖 →

我呢盒係中間 "暖色系眼影組合"，實物顏色其實係同官網圖一樣的，冇色差，只不過可能今日 8 號風球，全日天陰陰，所以影出來有色差。

放假冇化妝，宅在家零底妝都忍唔住堆晒 4 隻色試上眼玩，不單止顏色靚，仲好貼皮膚好顯色 ^^ 都係個句，Shu 的眼影 quality 唔會差，out job 一向用緊~

第 2 主角新出「Stage Performer 透亮粉餅」→

具創新配方 Cockpit Shield Complex (滑石粉末 + 高反光油份 + 聚酸甲脂)、Blurring Powder Complex (2 種彈性微細粉末)、吸水珍珠岩、油面控油粉末等，有效折射光線，增強肌膚透明度及明亮感，定妝 / 補妝用都 ok。

"白色透明碎粉" 我估好多人都用過，相比起普通碎粉，"白粉" 控油度係會比較強，冇咁厚粉，仲可以 blur 到少少毛孔，摸上手又會滑 d。

至於呢類白色粉餅 = 壓縮版的 "白色透明碎粉"，功效係一樣。

我工作上有用緊 NARS / M.A.C 的同款白色粉餅，如對比呢盒 Shu Uemura，就 NARS / M.A.C 光澤感強少少，而 Shu 就更啞緻，控油效果更好，更適合偏油肌膚用 / 夏天用~


摸上手係白色，但印上臉後會變透明冇色 →

不過膚色太深的人都係唔建議用，幾透明都好，用在深膚色上都會有 dddd 顯白。

白色粉餅我自己係唔會用，只在 out job 為客人補妝用，點解?

上段提及過佢係屬於 "控油度強" 的粉餅嘛，而我係乾人，夏天搽少陣補濕都甩皮，所以用唔到~

除了補妝，定妝用佢又得唔得?

唔係唔得，只係壓縮形式的白色粉餅係好難沾粉的，一定要用粉樸先得，唔用得碎粉掃，會唔夠力沾粉，但唔用碎粉掃定妝呢，個妝又冇 hold 得咁仔細均勻，加上剛剛化完粉底皮膚濕度較重，用粉餅 + 粉樸定妝會特別厚粉兼容易浮粉，所以......

但如果影妝相 studio 拍攝用佢定妝呢，咁又唔同喎，會特別凸顯出肌膚剔透感，所以都好視乎用途同方法，如自用都係用來補妝好 d~~

粉餅 $270 / 粉盒 $60 / 毛絨粉樸 $55 @ http://www.shu-uemura.com.hk

仲有第 3 主角「tint-in-gelato 絲滑胭脂唇蜜」→

屬胭脂霜 / 唇蜜兩用妝品，呢支一向都有，只係今次推出了 3 款限量新色 (粉紅 / 珊瑚橙 / 紫紅)。

質感屬 matte finish 啞緻 feel 的 cream 狀，搽嘴係非常 ok 的，感覺啞身得來好柔滑，只不過用來當胭脂霜搽就會易溶妝 d (夏天熱嘛)，夏天始終都係用胭脂粉更好~

$220 @ http://www.shu-uemura.com.hk

第 4 主角「eyebrow manicure 染眉霜」→

呢款我有用開，又係平時都有，但今次就推出了 2 款新 color 咁解，重點係全部染眉霜已換了做新的 "迷你刷頭"! 

刷的時候確係更方便易用~ 正~

Shu 的染眉霜出了名防水，兼含眉毛護理成份，游水用都唔怕甩色~

染了新髮色的話就可以配返支，眉毛同髮色望上去會更一致~

(色號 #terra brown)

共 7 色 

$230 @ http://www.shu-uemura.com.hk

題外話，囝囝成日見我影化妝品 / skincare 相，問我呢 d 係咩野?

"哦~ 係媽咪 d 玩具呀，好似你 d 玩具咁，不過唔同款之嘛"

然後前日經過百貨公司專櫃，囝囝突然話....

"媽咪! 呢度有好多你 d 玩具呀! 不過你唔好停低睇喎，爸爸唔俾睇玩具呀，唔買得呀"

hahahaha~